Taa,

Xesus Kristu ya kakir̂wamacho komo tan wekatîmyas awya so.

Kaan Mumuru xa Mîk Xesus.

Wihciyasî mak yîwya kakir̂wamacho komo yekatîmtopo.

2 On wara tî kekn̂e weronomano rin̂enho pen pahxa,

Isaias pen ha.

Awesamaka wen̂epesî awekaiporen̂e awesamarî yakir̂waman̂e me,

3 Pohnîntawno me mak nasî noro amn̂e.

Iito tak n̂ekatîmyasî omtapotarî tîhyaka mohxapu komo ya.

Kar̂pe xa nîmtapowasî.

On wara kesî,

Kporin komo yesamarî ka akir̂wamacoko.

Pataw men ciicoko ha,

kesî,

kekn̂e tî weronomano rin̂enho pen.

4 Ero wara rma takî tî Xuaw mokyakn̂e.

Meye makî tî xakn̂e pohnîntaw.

Tîhyaka mohxapu komo ya tî Kaanî mtapotarî n̂ekatîmyakn̂e.

On wara tî kekn̂e yîwya so,

Kicicme awehtoponhîrî komo tak poxunkacoko ha.

Ero wa awexitaw so tak Kaan nîhcamnoyasî kicicme awehtoponhîrî komo.

Memihcaxe marha tak ero yimaw,

kekn̂e tî Xuaw mohxapu komo ya.

5 Mer̂pono pîn komo tî cetken̂e yîhyaka.

Xuteia pono komo tî cetken̂e mîn hak ewto pono komo.

Xerusaren pono komo marha tî cetken̂e.

Ero wa tî cetken̂e yîhyaka.

Mohxapu komo ahnoro n̂emicinoyakn̂e Xuaw Xotaw kwaka.

Kicicme cehtoponhîrî komo tî n̂ekatîmyatken̂e cemicitome so.

6 On wara tî xakn̂e Xuaw,

kameru poci makî tî xakn̂e noro ponon.

Paaka picho xakn̂e aan̂apotun.

Taritari warai tî xakn̂e iyotî.

Ween tî xakn̂e yîn̂emerî comota pono.

Ero wa tî xakn̂e Xuaw.

7 On wara marha tî kekn̂e Xuaw mohxapu komo ya,

Anarî mokyas hara amn̂e ohretawno tak.

Karitî Mîk Noro oyopono ro mak.

Katuhtara wasî yîhtarî mici yîmhokaxi yîxawyakan me ro mak oyexirî ke.

8 Tuuna kwaka makî reha ow kemicinoyaxe so.

Kir̂wanî ro Yekatî kwaka reha awemicinoyaxe so Noro amn̂e,

kekn̂e.

Ero wa tî kekn̂e Xuaw tîhyaka mohxapu komo ya.

9 Ero yimaw takî tî Xesus marha mokyakn̂e Xuaw yaka.

Nasare poi tî mokyakn̂e.

Karireia pono rma tî mîn Nasare.

Ero poi tî mokyakn̂e Xesus Xuaw yaka.

Noro marha takî tî n̂esemicinopekn̂e Xuaw ya Xotaw kwaka.

10 Yukwai Xesus yawomuche takî tî kaapu n̂etahrunkekn̂e Noro wero ro.

Kaan Yekatî marha tî nîhcekn̂e Noro wero ro kah yai ha.

Potkuku me tî nîhcekn̂e,

n̂etahsîyakn̂e Xesus pona.

11 Ero yimaw takî tî kah yawno mtapotarî n̂esenceken̂e.

On wara kekn̂e,

Omumuru cik Amoro okwe.

Tawake xa was apoko okre,

kekn̂e.

Ero wa kacho n̂esencekn̂e.

12 Ero yinhîrî rma takî tî Xesus naar̂akn̂e Kaan Yekatî mooxe pohnîntaka.

13 Iito takî tî n̂enmayakn̂e Xesus 40 kaamo okwe.

Iito exitaw tî Noro nukukmekn̂e Satanas,

kicicitho poko tî pohkekn̂e.

On wara marha tî xakn̂e Xesus ero yimaw,

okno pîn komo chew makî tî xakn̂e.

Kamara komo chew,

okoyi komo chew,

ero warai komo chew makî tî xakn̂e.

Ancu komo rma tko tî mokyatken̂e karihtoso.

Ero wa tî xakn̂e Xesus.

14 Taa,

On wara takî tî Xuaw pen n̂iir̂akn̂e Eroces,

nahruyakn̂e okwe kahrutopo yaka.

Noro pen yahruche takî tî Karireia pona cekn̂e hara Xesus.

Tmaywen me awahsîyaxe so Kaan okre,

kacho tî n̂ekatîmyakn̂e mohxapu komo ya.

15 On wara tî kekn̂e,

Kaan maywen me awehtopo komo me tak nasî pahnoke xa,

kekn̂e.

Ero ke kicicme awehtoponhîrî komo men poxunkacoko ha.

Kaan ya awakir̂wamacho komo ponaro marha tak ehcoko,

kekn̂e tî yîwya so.

Ero wa tî kekn̂e Xesus Karireia pono komo ya.

16 Ero yimaw takî tî Karireia n̂ikithon yecihtari cekn̂e Xesus.

Iito takî tî n̂een̂akn̂e Simaw.

Noro yakno marha tî n̂een̂akn̂e,

Antre.

Mîîye tî nar̂metken̂e n̂examro n̂ikitho imo kwaka.

Ootî yanîmn̂e ro tî mîkyam xatken̂e.

17 On wara tî kekn̂e Xesus yîwya so,

Amohcoko tak owenari.

Tooto yanîmn̂e me tak kiir̂axe so hara,

kekn̂e tî yîwya so.

18 Ero ke ero yimaw rma takî tî cetken̂e n̂examro Xesus wenari.

Nahsîpînketken̂e takî tî tîmîyenthîrî komo Noro wenari tîtotome so.

Ero wa tî xatken̂e.

19 Ero yinhîrî takî tî cekn̂e xa hara Xesus meyehra mak.

Iito tî n̂een̂akn̂e Ciaku hara.

Xuaw marha tî n̂een̂akn̂e akno rma hara.

Sebetew mumuru komo tî mîkyam xatken̂e.

Kanawa yaw tî xatken̂e mîîye yeemirî poko.

20 N̂examro marha tî nan̂ikyakn̂e Xesus.

Ero ke takî tî tîîm komo nînomyatken̂e kanawa yaw rma,

Sebetew pen.

Tanton komo yakro makî tî n̂etînomyakn̂e Sebetew,

epethîrî pona cetapickaxmu komo yakro ha tî.

Xesusu wenari takî tî cetken̂e Ciaku komo.

Ero wa tî xatken̂e.

21 Ero yinhîrî tak Kapanaun pona takî tî cetken̂e Xesus komo.

Sabatu po tak Xesus cekn̂e iitono komo yesenmetopo yaka panatanmekno riso.

22 N̂eserepoketken̂e xa takî tî iitono komo yîmtapotarî yencetaw.

On wara ketken̂e,

Xutew panatanmetopo mewren̂e komo warahra ro mak kesî Moso kopi.

Etanwekpon me xa nîmtapowas okyo,

ketken̂e tî.

Ero ke tî n̂eserepoketken̂e ro mak yîmtapotarî poko.

23 Iito tî xakn̂e worokyam ken̂arî esenmetopo komo yaw rma.

Noro takî tî nîmtapowakn̂e Xesus yakro kar̂pe xa.

24 On wara kekn̂e,

Ahce wa wa amna miir̂a ha ke?

Amna yîhcamnoso kr̂a katî wa mîmoko ha?

Xesus Amoro Nasare pono ha.

Aaxera ro kr̂a nas amna.

Kaan yawno ro xa Mîk ham kir̂wanî ro,

wîîkes apoko,

kekn̂e tî yîwya.

25 Yîmtaka rma tko tî n̂eyukyakn̂e hara Xesus.

Tîtken̂e esko.

Noro ropotai kr̂a tak epatakak ha,

kekn̂e tî.

Ero wa tî kekn̂e Xesus worokyam ya.

26 Ero ke takî tî tooto pen nîrohnonmekyakn̂e worokyam,

yîropotawno ha.

N̂emtarakekn̂e marha tî kopi.

Ero yinhîrî takî tî n̂epatakekn̂e yîropotai.

27 Ero ke n̂eserepoketken̂e xa tak tî enîn̂e komo,

esenmexapu kom ha.

On wara tî ketken̂e,

Onoke warai xa Moso hara kopi?

Anarme ro mak kpanatanmekyaxe so okyo.

Anwekîn me marha nîmtapowasî worokyam yakro,

kicicitho komo yakro.

Ero ke n̂epatakexe rma kopi,

ketken̂e tî Xesus poko.

28 Ero yinhîrî takî tî miya so ro mak Xesus yehtopo n̂esencekn̂e.

Ahnoro Karireia rowon pono komo takî tî n̂encetken̂e.

Ero wa tî xatken̂e.

29 Ero yinhîrî esenmetopo komo yai takî tî n̂epataketken̂e Xesus komo.

En̂exa rma takî tî cetken̂e Simaw mîn yaka hara.

Antre mînî rma tî mîn xakn̂e.

Ero re yawno tî mîkyam xatken̂e.

Ciaku komo marha tî cetken̂e akro so,

Xuaw kom ha.

Ero wa tî cetken̂e Xesus yakro.

30 Iito tî xakn̂e Simaw pici yon.

Namotoyakn̂e okwe,

kama po makî tî xakn̂e ocoro cexirî ke.

Ero ke takî tî noro n̂ekatîmyatken̂e Xesus ya yohno rma.

Apa,

moso nasî ocoro okwe,

ketken̂e tî.

31 Ero ke takî tî Xesus cekn̂e yîhyaka.

Cow sai,

amorî poko takî tî nanîmyakn̂e.

Krei,

n̂etowyakn̂e takî tî ocoronthîrî.

Ero yinhîrî takî tî yînahrî komo n̂etakekn̂e noro amotoxapunhîrî rma.

Ero wa tî xakn̂e.

32 Ero ke kokmamrî me takî tî on wara xatken̂e iitono komo,

Xesus yaka n̂ekyatken̂e tamotosom komo ahnoro ro mak.

Worokyam ken̂arî komo marha tî n̂ekyatken̂e yîhyaka.

33 Simaw mîn potaka takî tî n̂esenmekyatken̂e mer̂pono pîn komo.

Ahnoro ro makî tî mokyatken̂e iitono komo.

34 Ero ke okoh komo takî tî nakir̂wamekn̂e Xesus mer̂pono pîn komo,

Anarmerpan ke ceper̂ayem komo tî nakir̂wamekn̂e.

Mer̂pono pîn marha tî n̂en̂epekn̂e worokyam tooto komo ropotai.

En̂epetaw on wara tî kekn̂e,

Tîtken̂e mak ehcoko ha,

kekn̂e tî.

Kaan mumuru Mîk ham,

karî ke yîwya so tî ero wa kekn̂e.

Ero wa tî xakn̂e Xesus.

35 Taa,

iito takî tî n̂etakriyakn̂e Xesus.

Enmaporo takî tî nîhcekn̂e kuywa poi.

Mîîmo yai tî n̂epatakekn̂e.

Miya tî cekn̂e ewto poi pohnîntaka ro mak.

Iito takî tî Kaan yakro nîmtapowakn̂e.

36 Amn̂e takî tî Simaw komo cetken̂e Xesus yeposo.

37 Noro yenîche takî tî on wara ketken̂e yîwya,

Apa,

awenî xe tî natu tooto komo ahnoro,

ketken̂e tî yîwya.

38 On wara tko tî kekn̂e Xesus,

Anarî ewto pona xa matko kaikatko.

Mîn hak pono komo ya cekatîmpore nasî Kaanî mtapotarî.

N̂examro ya marha ekatîmso mohxapu Ow ha,

kekn̂e tî Xesus yîwya so.

39 Ero ke tak mîn hak ewto pona takî tî cekn̂e Xesus.

Karireia pono mko n̂irikyakn̂e.

Ero po so takî tî Kaanî mtapotarî n̂ekatîmyakn̂e esenmetopo komo yaw so.

Worokyam marha tî n̂en̂epekn̂e iiken̂arî komo ropotai so.

Ero poko tî xakn̂e Xesus.

40 Taa,

ero yimaw takî tî repra ken̂arî mokyakn̂e Xesus yaka.

N̂eremekn̂e takî tî tosokmuru po.

On wara tî kekn̂e Xesus ya,

Apa,

oyakir̂waman̂e me kîhtînoyasî.

Ero ke owî cma re makir̂wamesî yiixe awexitaw,

kekn̂e tî yîwya.

41 Noro pînîn yaw tî xakn̂e Xesus.

Ero ke takî tî n̂etapoyankekn̂e teme kachome takî tî noro poko.

Awakir̂wama xe rma wasî,

n̂ecihpe tak apun ha,

kekn̂e tî.

42 Krei,

ero wa kache rma repra takî tî n̂etowyakn̂e.

Kir̂wan̂he takî tî xakn̂e yupun okre.

43-44 Ecpîche rma tak noro n̂en̂epekn̂e hara Xesus.

Cetaw rma tko tî weronomekn̂e cerewre.

On wara tî kekn̂e yîwya,

Awakir̂wamachonhîrî ekatîmra ro mak men esko.

Kaan yaka cewomsom yaka mak etoko.

Noro ya tak esenpoko.

Yîwya marha tîmko Kaan ya tîmsom,

Moises pen nmewretho yaw rorono rma.

Ero yipu tîmrî ke rma,

Akir̂wamano rin̂e Mîk ham Xesus,

kesî tak naoro opoko,

kekn̂e tî Xesus yîwya.

45 Ero wa kacho yentache takî tî cekn̂e repra ken̂arînhîrî.

N̂ekatîmyakn̂e rma tî takir̂wamachonhîrî miyan komo ya rma.

Ero ke kir̂wantaw tohra thakwa takî tî xakn̂e Xesus ewto pona.

Pohnîntaw so makî tî n̂enmayakn̂e.

Mokyatken̂e rma tko tî tooto pen yîhyaka mîn hak ewto pono komo.

Ero wa tî xatken̂e.