Taa,

ero yinhîrî kepokaretoponhîrî kokmamche n̂enmayakn̂e hara yihcirî kaamo.

Saa kr̂owe ketaw takî tî Xesus yokoputho yahrutopo yenso cetken̂e wooxam komo asakî.

Maria Matarena tî cekn̂e,

Maria marha tî cekn̂e anarî hara.

Ero wa tî cetken̂e.

2 Ero yimaw tak roowo n̂esewsîyakn̂e hara.

Kar̂pe ro makî tî kekn̂e kopi.

Ero yimaw marha takî tî Kporin komo yancun nîhcekn̂e kah yai.

Noro takî tî cekn̂e ewtarî potaka.

Ahruthîrî tî nîhmamekn̂e anana.

Yîhmamache iipona tî n̂eremekn̂e.

3 Tîroromutwe ro makî tî xakn̂e noro yeepatarî,

pepe kacho wa mak oco.

Tumutwe ro makî tî xakn̂e noro ponon yukwarî wara ro mak.

4 Ancu yenîche sowtatu komo takî tî n̂eraswatken̂e xa.

Tatanatken̂e ro makî tî.

Waixapu wara ro makî tî xatken̂e.

Ero wa tî xatken̂e sowtatu komo.

5 Taa,

on wara takî tî kekn̂e ancu wooxam komo ya,

Esekatkara ro mak ehcoko.

Xesus yokoputho yenî xe mat ham,

amowoxapunhîrî ha.

6 Exihra tak nasî tan.

Paka wa ha tîmtapotachonhîrî yaw roro rma.

Entamcoko xe ka yîrapotoponhîrî.

7 Ero yipu yenîche tak awya so yohno etocoko ekatîmso yînpanatanmekrî komo ya.

On wara kacoko yîwya so,

Paka haram Xesus waixapu komo chewnonho.

Noro takî tî nîîce amn̂e aywapu so Karireia pona.

Iito rma takî tî meen̂atu amn̂e,

kacoko men yîwya so,

kekn̂e tî ancu wooxam komo ya.

8 Ero ke cetken̂e hara tî wooxam komo kar̂pe.

N̂eraswatken̂e rma tî,

tahwore xa tko tî xatken̂e.

Kar̂pe tî cetken̂e Xesusu npanatanmekrî komo yaka ekatîmso.

9 Cetaw so rma ka n̂esepor̂atken̂e takî tî Xesus yakro rma.

On wara tî kekn̂e Noro yîwya so,

Ai okopuci komo,

tan mat ha?

kekn̂e tî Noro yîwya so.

Ero ke takî tî yîhyaka cetken̂e.

Yîhtarî takî tî nahsîyatken̂e.

Amna Porinî ro Amoro,

ketken̂e tî yîwya.

10 On wara takî tî Xesus kekn̂e yîwya so,

Erasîra ehcoko.

On wara men katatko oyakno komo ya,

Karireia pona tî etocoko.

Iito takî tî Xesus meen̂atu amn̂e,

katatko yîwya so,

kekn̂e tî Xesus yîwya so.

Ero wa tî kekn̂e wooxam komo ya.

11 Ero ke cetken̂e tî wooxam komo.

Cetaw so rma sowtatu komo marha tî cetken̂e ewto pona Xesus yokoputho yewyoman̂enho komo.

Anarî komo makî tî cetken̂e.

Tîmsom pokono yenîn̂e komo yaka tî cetken̂e.

Ahnoro tîn̂enîthîrî komo tî n̂ekatîmtîketken̂e yîwya so.

12 Ero yipu yentache tîmsom pokono yenîn̂e komo takî tî n̂esenmekyatken̂e poritomo komo yakro cesentachome so.

Cesentache so tak sowtatu komo ya takî tî nîmyatken̂e puranta mer̂pono pîn.

13 On wara tî ketken̂e yîwya so,

On wara men kacoko amn̂e mîk hak ya,

Xesus yokoputho mak naar̂atken̂e okwe yînpanatanmekîthîrî komo rma.

Kosope mohce amna yîwînîkyataw,

kacoko men amn̂e.

14 Ero yipu yencetaw na kopenato ya nîrwona tak na apoko so.

Ero wa exitaw noro nîrwoxinkes amna apoko so awaikara so ehtome,

ketken̂e tî sowtatu komo ya.

15 Ero ke puranta tî nahsîyatken̂e sowtatu komo.

Tîmsom pokono yenîn̂e komo mtapotarî tî n̂ewehcatken̂e.

Yînpanatanmekîthîrî komo naace ham okoputhîrî,

ketken̂e okwe miyan komo ya rma.

Ero ke ero wara rma kexe oroto Xutew komo kica.

Ero wa kexe.

16 Taa,

ero yinhîrî tak Xesus npanatanmekrî komo cetken̂e Karireia pona hara,

11 komo.

Îh pona cetken̂e,

Iito men kepor̂axe so amn̂e,

kekn̂e Xesus,

ero pona.

17 Iito exitaw so tak Xesus n̂een̂atken̂e xa hara.

Noro mamakan me tak nutupenwatken̂e.

Amna Porinî ro Amoro,

ketken̂e yîwya.

Anarî komo tko nanwekyatken̂e rma okwe.

18 Ero yimaw tak Xesus mokyakn̂e yîhyaka so.

On wara kekn̂e yiwya so,

Miyan komo yantoman̂e me oriyakn̂e Apapa.

Kah yawno komo yantoman̂e me oriyakn̂e,

roowo pono komo yantoman̂e me marha.

19 Ero ke on warai poko kantomexe so,

miya so tak etocoko mîk hak rowon pono komo cheka watohnî me ro mak.

Opoko panatanmekno ciicoko oyakrono me tak ehtome so.

Emicinono marha ciicoko.

Apapa yanme emicinono ciicoko,

Yumumuru yanme marha,

Kir̂wanî ro Yekatî yanme marha.

Ero wa emicinono ciicoko.

20 Miyan komo rma panatanmetatko.

Apanatanmetopo komo mencetken̂e roro omtapotachonho,

ero rma mahrimacoko hara n̂examro n̂entarî me hara.

Ahna so na awcetaw so awakro so wa was ha.

Awakro so wasî miya roro on wara rma awehtopo komo yenatîtopo pona roro amen,

kekn̂e Xesus yîwya so.

Amen.