Taa,

enmapuche tak tîmsom pokono yenîn̂e komo takî tî n̂esencetken̂e hara Xesus waihkacho poko.

Xutew poritomon komo yakro rma tî n̂esencetken̂e.

2 Ero ke Xesus takî tî n̂emeknumiyatken̂e.

Piratus yaka takî tî naar̂atken̂e.

Kopenato tî mîk xakn̂e Piratus.

Ero wa tî xatken̂e.

3 On wara takî tî xakn̂e Xutas,

Xesus yekanîn̂enho.

Twaihkapore kr̂a nasî Xesus,

kacho takî tî n̂encekn̂e.

Ero ke nahwokekn̂e ro mak takî tî tpoko rma.

Xesus yekanîn̂e me cexirî poyero tî nahwokekn̂e.

Ero ke 30-nhîrî mko takî tî naar̂akn̂e hara prata.

Tîmsom pokono yenîn̂e komo yaka tî naar̂akn̂e hara,

poritomo komo yaka marha.

4 On wara tî kekn̂e yîwya so,

Kicicme ro mak wex ham kica.

Kicicme exihnî ro mak Mîk wekanpo waihkachome awya so,

kekn̂e tî yîwya so.

Apohana,

amoro ha tko,

ketken̂e makî tî yîwya.

5 Ero ke Kaan mîn yaka makî tî pratatho pahyakn̂e Xutas.

Papuche miya takî tî cekn̂e exexewnuso okwe.

Ero wa tî xakn̂e Xutas pen okwe.

6 Ero yinhîrî tak prata mko namekyatken̂e tîmsom pokono yenîn̂e komo.

On wara tî ketken̂e,

Kaan purantan me enkapîra cexpore nasî onî yipu,

tooto waihkacho yepetho me exirî ke,

ketken̂e tî.

7 Ero ke n̂esencetken̂e ero poko.

Ahce wa ciir̂a?

ketken̂e.

Ero wa esentache so woskara raconho takî tî nahsîyatken̂e ero pona.

Er̂mo Kahn̂e Yekenho,

kacho tî mîn nahsîyatken̂e.

Anarî yana komo yokoputho yahrutopo me makî tî nahsîyatken̂e.

8 Anarî me takî tî nosohcetken̂e.

Kamxukutho Woskaran tak on yosotî,

ketken̂e.

Ero wa kacho me rma nasî oroto.

9 Ero yipu nahsîyatken̂e kweronoman̂e pen nmewretho yaw roro rma,

Xeremias pen nmewretho yaw roro ha.

On wara tî kekn̂e noro pen,

Noro tak n̂epemetken̂e Ixaw Yana komo.

30 nîmyatken̂e prata mko Noro yepetho ha.

Ero wicakî makî tî nîhtînoyatken̂e Noro yepemacho ha.

10 Ero pona tak nahsîyatken̂e Er̂mo Kahn̂e Yekenho,

kacho ha,

kekn̂e tî Xeremias pen.

Ero ke ero wa kachonho yaw roro rma tî nahsîyatken̂e.

Ero wa tî xatken̂e.

11 Taa,

ero yimaw Xesus takî tî n̂ecececekn̂e kopenato yeepatai.

On wara tî kekn̂e kayaritomo yîwya,

Xutew komo kayaritomon xa Amoro ha?

kekn̂e tî yîwya.

Noro rma Ow ha,

kekn̂e takî tî Xesus yîwya.

12 Iito marha tî xatken̂e tîmsom pokono yenîn̂e komo,

Xutew poritomon komo marha.

N̂examro takî tî n̂etahcatken̂e kicicme Xesus yehtoponho ha tî re Piratus n̂entarî me.

Yîmtapotarî komo tko tî eikura ro mak xakn̂e Xesus.

13 Ero ke on wara tî Piratus kekn̂e hara yîwya,

Entara ma mai ke yîmtapotarî kom ha?

Apoko mexe re kexe ha ta.

Mer̂pora cma re n̂etahcaxe kicicme awehtoponhîrî,

kekn̂e tî yîwya.

14 Eikura rma tî xakn̂e Xesus.

Ero ke n̂eserepokekn̂e ro makî tî kopenato.

Ero wa tî xakn̂e.

15 Taa,

on wara xakn̂e roro kopenato ero yimaw so Xutew komo yahwotacho me exitaw,

ahruxapunhîrî nahrunkekn̂e Xutew poyino.

Cewn̂e mak nahrunkekn̂e yîn̂etacithîrî kom ha.

Ero wa xakn̂e roro kopenato.

16 Taa,

ero yimaw kicicme ehxapu tî xakn̂e kahrutopo yaw.

Miya rma cekaiporesom tî mîk xakn̂e.

Barabasî tî mîk xakn̂e noro yosotî.

17 Ero yimaw takî tî Piratus yaka mokyatken̂e Xutew komo mer̂pono pîn komo.

On wara kekn̂e noro yîwya so,

Onoke warai xa wahrunke ahyaka so?

Barabas katî,

Xesus xa katî,

Kristu kacho ha?

kekn̂e yîwya so.

18 On wara tî kekn̂e Piratus tîhnaw,

N̂examro yewresawra mer̂pora naxe Moso yentan̂e komo.

Ero ke n̂en̂ekapexe owya,

kekn̂e Piratus.

19 Ceremaxi rma ka exitaw en̂ekano ritopo po yîhyaka tî yipici n̂en̂epekn̂e tanton.

On wara tî kekn̂e yîwya,

On wara kacho entamexpota oyin̂o ya,

Kir̂wanî ro Mîkro,

oroto men̂ekesî Noro.

Ero ke n̂expe ro mak.

Oroto Noro wenwo owosoto kopi.

Eraspeto ro mak wenwo kopi.

Ero ke keserepokatîka kopi,

kacho entamexpota yîwya,

kekn̂e yipici tanton ya.

Ero ke ero wa kacho tî n̂entamexpekn̂e yipici yanton Piratus ya.

20 Panahnî wara ro makî tko tî ketîketken̂e tîmsom pokono yenîn̂e komo,

Xutew poritomon komo marha.

Esenmexapu komo yakro tî nîmtapowatken̂e cewetîso ro.

Xesusu kr̂a waihkak ha.

Barabas xa ahrunkak ha,

kacoko Piratus ya,

ketken̂e yîwya so.

Ero wa tî ketîketken̂e okwe esenmexapu komo ya.

21 Ero yimaw on wara takî tî kekn̂e hara kopenato yîwya so,

Asakî nasî ahruxapu.

Onoke warai xa katî ahrunka xe matu owya?

kekn̂e yîwya so.

Barabasî xa ahrunkak ha,

ketken̂e tî yîwya.

22 Ahce wa thakwa re wiir̂a Moso hara Xesus,

Kristu kacho ha?

kekn̂e hara tî yîwya so.

Amowopoko kr̂a ha,

ketken̂e tî yîwya.

23 Ahce wa exirî ke wamowope ha?

Ahce wa nai ha ke kicicme ehtoponhîrî awya so?

kekn̂e hara tî Piratus yîwya so.

Amowopoko makî,

ketîketken̂e okwe.

Kar̂pe xa takî tî ketîketken̂e.

Ero wa tî ketken̂e.

24 Taa,

ero yinhîrî on wara takî tî kekn̂e hara Piratus tîhnaw,

Omtapotarî yewetîra nat ham okwe.

Wara ro mak ketîkexe kica,

kekn̂e.

Ero ke tuuna takî tî n̂ekpekn̂e cesemokacho.

N̂esemokekn̂e takî tî esenmexapu komo wero ro.

On wara tî kekn̂e hara yîwya so,

Oyanmenkera ro mak Moso wamowopes ha,

awanme so mak was ha.

Apona so men wiir̂asî Moso waihkacho,

kekn̂e tî yîwya so.

25 On wara takî tî n̂eyukyatken̂e ahnoro esenmexapu komo,

Taa,

amna ponan me rma n̂expe Noro waihkachonho,

amna xîkrî ponan me marha,

ketken̂e tî.

Ero wa tî ketken̂e okwe Piratus ya.

26 Ero yinhîrî tak Barabas takî tî nahrunkapekn̂e Piratus n̂examro yanme rma.

Xesusu reha nîhyokpekn̂e.

Ero yinhîrî takî tî narpekn̂e amowopotome takî tî sowtatu komo ya.

Ero wa Xesus n̂iir̂akn̂e okwe.

27 Ero ke tak Xesus naar̂atken̂e sowtatu komo tîmîn yaka.

Iina takî tî takrono komo nan̂ikyatken̂e ahnoro.

Xesus takî tî wamcetken̂e.

28 Xesus pen takî tî pononketken̂e okwe.

Anarî takî tî namrupetken̂e yîwya hara ahnorono,

cucurem.

29 Kpata warai marha tî kahyatken̂e aroko me.

Ero yipu takî tî n̂iir̂atken̂e Xesus yarokorî me oko.

Amoyi marha tî n̂iir̂atken̂e emyaka kaari n̂ixan yaka.

Ero wa exiche nutupenwatken̂e tosokmuru po so Xesus yamrinaka.

Ero wa tî n̂etaporetken̂e kica Xesus poko.

Ai,

Xutew komo kayaritomon xa Amoro ham,

ketken̂e takî tî yîwya.

30 N̂etakwatken̂e marha kica Xesus pore.

Amoyinthîrî tî mohketken̂e hara emyai.

Iike rma tak kanakatapetken̂e emapona.

Ero wa tî Xesus pen n̂iir̂atken̂e sowtatu komo.

31 Ero wa ciriche tak cucurem takî tî mohketken̂e hara poono.

Yîwyanî ro tî namrupekn̂e hara yîwya.

Ero yinhîrî miya takî tî naar̂atken̂e sowtatu komo amowotome.

Ero wa tî Xesus naar̂atken̂e okwe.

32 Ero wa Xesus yaar̂ataw Siren̂e pono takî tî n̂een̂atken̂e esama yaw.

Simaw tî mîk xakn̂e noro yosotî.

Noro ya takî tî tpanaxkem narpetken̂e Xesus yamowotopo ha.

33 Îh pona takî tî cetken̂e,

Korkota yîpîn pona.

Tooto Pîtho Yocho,

kacho tî mîn,

Korkota,

kacho.

Ero pona Xesus naar̂atken̂e.

34 Iito cexitaw so Xesus takî tî wokpetken̂e kawawano ke,

cîmîkno yakro esmaxapu.

Ero yipu Xesus n̂emeyakn̂e wahra mak.

Erî xera tko tî xakn̂e.

Ero wa tî Xesus xakn̂e.

35 Ero yinhîrî takî tî Xesus pen namowetken̂e tpanaxkem pona.

Amowoche Noro ponontho takî tî nahsîyatken̂e sowtatu komo tponon me so hara.

Tînahsîrî komo men̂ekacho tî nar̂metken̂e,

On wahsîya ow ham,

kachome tîwya so.

Ero wa tî Xesus ponontho nahsîyatken̂e kweronoman̂e penî mtapotachonho yaw roro rma.

On wara kacho tî noro pen mewrekn̂e,

Oponontho tak nahsîyatken̂e.

Tînahsîrî komo men̂ekacho nar̂metken̂e,

kacho.

Ero ke ero wa kachonho yaw roro rma tak nahsîyatken̂e.

36 Pononthîrî yahsîche iito rma takî tî n̂eremetken̂e Xesus yenîn̂e me.

37 On wara marha tî xatken̂e,

kicicme Xesus yehtoponho tî re mewretken̂e karita poko.

On wara kacho mewretken̂e,

Xesus Moso,

Xutew komo kayaritomon ha,

kacho tî mewretken̂e.

Ero wa kacho takî tî wetken̂e Xesus yepoi.

Ero wa tî n̂iir̂atken̂e sowtatu komo.

38 Cen̂epan̂em pen komo marha tî namowetken̂e Xesus panaka,

kaari n̂ixa anarî,

poowa n̂ixa anarî.

Ero wa tî namowetken̂e tpanaxkem pona so.

39 On wara xatken̂e iituxa tîtosom komo,

nîmtapowatken̂e takî tî Xesus poko kicicme ro mak okwe.

Tîhtîpîrî komo tî panametken̂e yîwîrîyakachome.

40 On wara tî ketken̂e,

On wara kan̂enho mexe re Amoro ha ta,

Kaan mîn wixkes amn̂e.

Osorwaw ro mak kenmayas ciitopo poko hara,

kan̂enho mexe re ha ta Amoro,

ketken̂e.

Ero ke etwaikapora rma esko ha ke.

Ahtoko ika.

Kaan mumuru Ow ha,

mîîkekn̂e reha ta,

ketken̂e tî yîwya.

Ero wa tî ketken̂e Xesus ya.

41 Ero wa xa marha Xesus poko n̂etaporetken̂e tîmsom pokono yenîn̂e kom hara,

Xutew panatanmetopo mewren̂e komo marha,

poritomo komo marha.

42 On wara tî ketken̂e n̂examro hara,

Anarî komo cma tî re waipîn me n̂iir̂akn̂e Moso.

Ero wa ecirira nai ham Noro rma hara.

Ixaw komo kayaritomon tî re Moso ha.

Ero ke ahri ka nîhtope,

pona entome tak kîwya so,

ketken̂e kica.

43 Kaan pona enîn̂e tî re Moso.

Ero ke Noro rma yukurunpen̂e me n̂expe.

Kaan Mumuru xa Ow ha,

kekn̂e ha ta.

Ero ke yîpînîn yaw exitaw Noro,

mokope ika enîhtoso,

ketken̂e tî Xesus poko.

44 Ero wara rma ketken̂e hara cen̂epan̂emînhîrî pen komo amowoxapu xa marha.

Ero wa xa marha tî nîmtapowatken̂e Xesus poko kica.

Ero wa tî xatken̂e kica.

45 Taa,

kamarakataw tak kaamo pen nawarpanwakn̂e.

Awarpape tak xakn̂e roowo ahnoro kopi.

3 oora pona roro awarpape xakn̂e.

46 3 to exitaw on wara takî tî kekn̂e hara Xesus,

Eri eri rama sabaktan̂i,

kekn̂e tî.

Apa,

apa,

ahce yanme wa Ow mahsîpînka okwe?

kacho tî mîn ha.

Ero wa tî kekn̂e Xesus.

47 Iito ececetoxapu komo tî on wara ketken̂e Xesusu mtapotarî yentache,

Eriasî nan̂ikya ham,

ketken̂e tî.

48 Ero ke yohno rma anarî takî tî cekn̂e wooku kwaka tukpaxmu.

Ero yipu takî tî nukpekn̂e kawawano kwaka.

Arama potwo takî tî n̂iir̂akn̂e.

Xesusu mtaka takî tî nanîmyakn̂e emetome yîwya.

49 Anarme tko tî ketken̂e anarî komo.

N̂expe ha ka,

ketken̂e reha.

Erias mokrî ika cencerî enîhton̂e ha,

ketken̂e tî.

Ero wa tî ketken̂e.

50 Ero yimaw Xesus takî tî n̂emtarakekn̂e.

Kar̂pe ro mak tî kekn̂e.

Ero wa cexiche cekatî takî tî n̂en̂epekn̂e.

Ero wa tî Xesus xakn̂e okwe.

51 Ero yimaw rma Kaan mîn yahrutoponho takî tî n̂etahyaxkekn̂e poono,

Kaan yamtakpon yahrutoponho pen.

Kai ro tî n̂etahyaxkekn̂e roowo pona roro.

Ero yimaw marha roowo pen tak n̂esewsîyakn̂e.

Toopu mko marha n̂etîmtakekn̂e.

52 Okoputho yewtarî mko marha tî n̂etahrunkekn̂e.

Yîwînxapunhîrî komo takî tî paketken̂e hara yaake,

Kaan xatî pen komo.

53 Cewtathîrî komo yai takî tî n̂epataketken̂e.

Amn̂e Xesus pakache Kaan yewtonî ro pona tî cetken̂e,

Xerusaren pona.

Iitono komo ya tî n̂esenpetken̂e,

mer̂pono pîn komo ya.

Ero wa tî xatken̂e.

54 Taa,

iito rma xakn̂e sowtatu yantoman̂e tmaywen komo yakro.

Xesus yenîn̂e me tî xatken̂e.

N̂examro tî n̂een̂atken̂e roowo yesewsîrî,

kaamo yawarpantarî marha.

Ero ke n̂eraswatken̂e ro mak takî tî kopi.

On wara tî ketken̂e,

Kaan Mumuru xa Moso ham kopi,

ketken̂e tî.

55 Iito marha tî xatken̂e wooxam kom hara yaake,

Karireia pono kom ha.

Mooxe n̂he ciki tî n̂ecececetken̂e Xesus yentome mak.

Xesus yakronoman̂enho tî mîkyam xatken̂e,

wenari cetarisomîn̂hîrî kom ha.

56 Yaake xatken̂e wooxam komo iito,

Maria Matarena,

Maria xa hara,

Ciaku yon ha,

Xose yon marha mîk.

Sebetew xîkrî yon marha xakn̂e iito.

Anarî komo marha tî xatken̂e iito wooxam kom hara.

Ero wa tî xatken̂e.

57 Taa,

kokon̂i takî tî Xose cekn̂e Piratus yaka.

Ar̂mateia pono tî mîk xakn̂e.

Xesusu mtapotarî yentan̂e tî mîk xakn̂e.

58 Noro takî tî cekn̂e Piratus yaka.

Xesus yokoputho cma re waar̂asî,

kekn̂e tî yîwya.

Ero ke tî nîmpekn̂e yîwya.

59 Ero ke Xesus yokoputho takî tî nahsîyakn̂e Xose.

Poono ke takî tî karamiyakn̂e.

Kir̂wan mîn xakn̂e poono,

riin̂u kahxapu.

60 Ero yinhîrî takî tî Xesus yokoputho n̂ermonoyakn̂e toopu yexenawno yaka.

Ahtoxan tî mîn xakn̂e Xose nahtopotho rma.

Ero yaka rma tî Xesus yokoputho n̂ermonoyakn̂e.

Ermonopuche takî tî toopu nîhmamekn̂e ewtarî potaka,

ahrutopo ha.

Porinî tî mîn xakn̂e toopu.

Ero yipu ke nahruyakn̂e.

Ero wa ahruche anana takî tî cekn̂e hara.

Ero wa tî xakn̂e Xose.

61 Iito marha tî xatken̂e wooxam komo ceremaxi Xesus yahrutopo mîtwo.

Maria Matarena,

anarî hara Maria,

ero wa tî xatken̂e iito.

62 Taa,

kokmamyakn̂e tak erewsî ciitoponho,

Paskwa yimawno ciitoponho.

Enmapuche hara Piratus yaka takî tî cetken̂e tîmsom pokono yenîn̂e komo,

Parisew komo marha.

63 On wara tî ketken̂e yîwya,

Ai Apa,

Noro penî mtapotachonho ponaro rma nas amna.

On wara kan̂enho Mîk pen,

ewkukmano rin̂enho pen.

Amn̂e osorwaw ro enmapuche kpakes hara,

kekn̂e waipîra rma ka cexitaw.

Ero wa kachonho ponaro rma nas amna.

64 Ero ke sowtatu komo cma re mantomesî noro yokoputho yewyomarî poko.

Osorwaw kaamo men ka n̂ehcowpe iito.

Ewyoman̂e exihra exitaw mokyatu men yînpanatanmekîthîrî komo okoputhîrî yaaso tak okwe.

On wara men ketu,

Paka haram okre,

ketu kica.

Mer̂pono pînî rma re cemaro me panatanmekyakn̂e kica Noro pen.

Ero wa xa marha tak mer̂pono pîn xa tak panatanmekyaxe cemaro me hara kica akrononhîrî komo.

Ero ke sowtatu komo cma re men̂epesî ewyoman̂e me,

ketken̂e tî yîwya.

65 Taa,

aacoko ewyoman̂e komo,

kekn̂e tî Piratus yîwya so.

Okoputhîrî yewyomacho yîhtînocoko awanme ro so,

kekn̂e tî yîwya so.

66 Ero ke cetken̂e takî tî Xesus yokoputho yahrutoponho yaka.

Ahruru tî nahkorometken̂e.

Sowtatu komo nantometken̂e marha ewyomarî poko.

Ero wa tî xatken̂e.