Kporin komo mtapotarî tan wekatîmyas awya so yaarono xa. Ixaw Yana komo n̂enîrî tan mewresî. Marakias ow ha.

2-3 On wara kesî Kporin komo awya so, Aaxatî ro komo Ow ha meexa ro, kesî. On wara tko mîîkexe, Amna xe ma re mai awya? mîîkexe. On wara tko aweyukyaxe so Noro, Onoke warai mîk xakn̂e Esau pen awya so? Xako pen yakno pîn katî mîk xakn̂e Esau? Wara rma Xako xe mak wîxakn̂e, Esau xera ro mak wîxakn̂e. Mînto nai noro yepamtho komo yekenho îîpî. Ero tak wîwîrîmekn̂e ro mak okwe. Kamara warai komo yeken me mak tak wiir̂akn̂e okwe, axawa imo pono yeken me.

4 On wara tko na ketu Eton pono komo, Cetwîrîmaxi rma re nasî amna yekenho. Wara rma amna ces hara cewtonthîrî ciiso hara, kexe. On wara tko kes hara Kporin komo, kantoman̂e ro, Cewtonthîrî komo rma na re n̂iir̂at hara. Yin̂irithîrî komo tko wixkes hara okwe. Kicicitho Yekenî Ro, kacho me tak nasî yîrowonthîrî komo. Poko Kporin komo yîrwonîmtopo ro mîkyam miya roro okwe, kexe tooto komo n̂examro poko.

5 Yîwîrîmarî komo rma meen̂axe amyamro amn̂e awewru komo ke rma. On wara tak mîîkexe ero yimaw, Aro yimaw kyopono ro me Noro yehtopo n̂een̂axe Ixaw Yana komo mkaino komo meero. Ero wa n̂een̂axe amn̂e.

6 On wara naxe kar̂pamxan komo, tîîm komo n̂een̂axe ponaro xa cehtopo komo me. Ero wa xa marha naxe tooto yanton kom hara, tantoman̂e komo n̂een̂axe tîn̂ewetîrî me hara. Ero ke aamo komo me oyexitaw ahcemaw tak, oponaro xa matu okwe? Awantoman̂e komo me marha oyexitaw ahcemaw tak oyewetîn̂e me mat hara? kesî Kporin komo awya so. Ero wara wîîkesî owya tîmsom pokono komo ya, oyosotî yîwîrîyakan̂e komo ya ha. On wara tko mîîkexe owya, Ahce wa awosotî nîwîrîyaketu amna awya? mîîkexe owya.

7 On wara oyosotî mîwîrîyakexe, kicicitho mak makn̂iyaxe kica owya tîmsom yapon pona, awokuthîrî komo pun ha. On wara tko mîîkexe hara, Ahce wa xa awîrîyakan̂e me nai amna awya? mîîkexe. On wara mîîkexe, Ero pîntho ro mak mîn ha Kporin komo ya tîmsom yapon, mîîkexe kica. Ero wa karî ke awya so owîrîyakan̂e me maxe okwe.

8 Ewuhnî pun makn̂iyaxe anarimaw so awokuthîrî komo pun owya tîmsom me kica. Kicicme exihra ma re nai awya so noro yipu pun tîmtopo awya so? Anarimaw so yîhrepun pun mîmyaxe owya, ceper̂ayem pun anarimaw so. Kicicme exihra ma re nai awya so ero yipu tîmtopo owya? Noro yiputho xe ka tîmcoko akopenaton komo ya. Kir̂wan̂he ma re awen̂atu so noro yipu pun tîmn̂e me awexitaw so? Omaywen mexan amoro okre, nîîke ma re apoko so? kes awya so Kporin komo, kantoman̂e ro.

9 On wara kacoko Kaan ya, kantoman̂e ro ya, Apa kah yawno amna pînîn yaw cma re masî, amna cma re makronomesî, kacoko ika yîwya. Awakronometu so ma re kicicitho tîmn̂e me awexitaw so kica? Oyanton mexan amoro ham okre, nîîke ma re awya so?, kesî Kaan awya so.

10 Iito exi xe ro mak was apoyino komo omîn metatan yahrun̂e. Ero wa ahruche tohnaw ro mak yirihra tak maxe wehto owya tîmsom yan̂itopo pona. Kir̂wan̂he awenîra so ro mak wasî, kesî Kporin komo, kantoman̂e ro komo. Anîmrî komo yahsîra ro mak wasî.

11 Pahxaro tak twerî tak oyetacaxe Xenciu komo. Resce n̂ixan komo rma naxe ero wara, oesce n̂ixan komo meero. Tanhamyan komo ro mak kotoporem nakn̂iyaxe, kir̂wanî ro marha tokuthîrî komo nakn̂iyaxe owya tîmsom me. Tîyopono me ro mak tak oyen̂axe mîk hak rowon pono komo. Twerî xa tak oyetacaxe, kesî Kporin komo, kantoman̂e ro komo.

12 Noro pîntho me ro makî tko oyosotî menpexe amyamro reha. On wara mîîkexe kica, Kicicme nasî kica Kporin komo ya tîmsom yakn̂itopo. On wara marha mîîkexe ero pono poko naatî yeperîrî komo poko, ahnoro erewsî poko, Kicicitho ro mak mîn ero pono kica, Kporin komo ya tîmsom, mîîkexe kica.

13 On wara marha mîîkexe, Kpokare xa thakwa Kporin komo ya tîmsom yakn̂itopo, mîîkexe. Kica, mîîkexe ro mak ero poko, kesî Kporin komo. En̂epatho komo, yîhrepun komo, kar̂pen komo, noro yipu pun mekyaxe kica owya tîmsom me. Noro yiputho komo ma re wahsîya anmîthîrî komo awya so? kesî Kporin komo.

14 On wara maxe anarimaw so, awoku rma re nai ahyaw so kîîrî. Noro xa wîmyas amn̂e Kaan ya. Yaaro xa wîîkesî cemaro pîn, mîîkexe rma re. Ero yinhîrî tak ceper̂ayem pun mak nîmyaxe hara kica owya, Aporin komo ya. N̂etwîrîmacowpe rma ero warai komo, cemarontaxmu kom ha. Yukurumîkno ro makî tko Ow ha. Ero warai me tak oyen̂axe amn̂e mîk hak rowon pono komo. Ero wa men naxe amn̂e, kesî Kporin komo, kantoman̂e ro.