Sakarias Nmewretho
Sakarias
Awehtoponhîrî Komo Yai Etaknamacoko
1
Taa, Kporin komo mtapotarî tan mewresî. Sakarias ow ha, Berekias mumuru. Itu pen mumutho mîk xakn̂e Berekias. Weronomano rin̂e ow ha, Sakarias. 2 cimn̂ipu tak xakn̂e kayaritomo me Tar̂u yehtoponho, 8-nhîrî nuun̂i po ha. Ero yimaw tak Kporin komo mtapotarî wencekn̂e.
2-3 On wara kekn̂e owya, Aporin komo Ow ha, awantoman̂e ro komo. Pahxa ka kîrwonakn̂e aporin pen komo poko. Ero ke on wara kasko yîwya so, On wara kesî Kporin komo awya so, ohyaka amohcoko hara. Amokuche so tak ahyaka so kmokyas Ow hara, kesî Kporin komo, kantoman̂e ro.
4 Aporin pen komo wara tak exihra ehcoko. N̂examro pen panatanmekyatken̂e rma re weronomano rin̂e pen komo. On wara ketken̂e yîwya so, On wara kesî Kporin komo awya so, Kicicme awehtoponhîrî komo tak ahsîpînkacoko, emetanmekno rirî poko awehtoponhîrî kom ha, kes awya so, ketken̂e yîwya so. Omtapotarî yentara ro makî tko xatken̂e okwe, oyewetîra marha xatken̂e okwe, kesî Kporin komo awya so.
5 On wara marha kesî Noro awya so, Ahto tak natu aporin pen komo? Ahce wa natu weronomano rin̂e pen komo, eroromero katî wa nat ha waipîn me ro mak awya so?
6 Ahce wa tko xakn̂e omtapotachonho hara, pantanmekno ritoponho owya? Ero wa men kasko Ixaw Yana komo ya, wîîkekn̂e oyanton pen komo ya, n̂examro weronoman̂e pen komo ya. Omtapotachonho yaw roro exihra katî xatken̂e aporin pen komo awya so? Ero wa kacho yentan̂enho komo mokyatken̂e ohyaka hara. On wara tak ketken̂e, Kpanaretopo komo nîhtînoyakn̂e Kporin kom ham. Kicicme kehtoponhîrî komo yaw roro rma kpanaretken̂e so oko. Ero wara rma kiir̂atken̂e so Kporin komo tînîhtînoputhîrî yaw roro rma, ketken̂e, kesî Kporin komo awya so.
Kawaru Mkawno Komo N̂een̂asî Sakarias
7 Taa, 2 cimn̂ipu rma ka xakn̂e kayaritomo me Tar̂u yehtoponho, 11-nhîrî nuun̂i po tak xakn̂e, sebace po ha. 24-nhîrî kaamo mîn xakn̂e. Ero yimaw xa hara Kporin komo mtapotarî wencekn̂e. Sakarias ow ha, weronomano rin̂e. Berekias mumuru ow, Itu pen parînho.
8 Kosope on warai ween̂akn̂e, tooto ween̂akn̂e kawaru mkawno. Cucure xakn̂e kawaru. Tarenakem yaw n̂ecececekn̂e muhta yepu chew. Noro mkai tak ween̂akn̂e kawaru xa hara yaake. Anarî komo xatken̂e cucure so, anarî komo xatken̂e xahr̂ape so, anarî komo xatken̂e tumutwe so.
9 Ero ke on wara wîîkekn̂e, Apa, onoke mîkyam kopi? wîîkekn̂e. On wara oyeyukyakn̂e ancu, oyakro nîmtapowakn̂e noro, Taa, wenpesî tak awya n̂examro yehtopo, kekn̂e owya.
10 Ero yinhîrî tak muhta yepu chewno oyeyukyakn̂e hara. On wara kekn̂e owya, Kporin komo n̂en̂epetho komo mîkyam. Roowo poko hakî so etaritome n̂examro n̂en̂epekn̂e. Noro yipu komo mîkyam, kekn̂e owya.
11 Ero yinhîrî tak Kporin komo yancun yakro tak nîmtapowatken̂e kawaru mkawno komo, muhta chewno yakro. On wara ketken̂e yîwya, Roowo pore amna n̂etariy. Cerepore so amna n̂een̂e roowo poko hakno komo. Ahce na poko eserepokan me so amna n̂een̂e, ketken̂e.
Tîyanan Komo Pînîn Yaw Nasî Kporin Komo
12 Ero yinhîrî on wara tak kekn̂e Kporin komo yancun, Apa, mer̂pono pîn komo yantoman̂e Amoro. Atî wicakî pahkî mai ha Xerusaren pono komo pînîn yawra okwe? Ahnoro Xuta yewton pono komo pînîn yawra mîxakn̂e. 70 cimn̂ipu n̂examro poko mîrwonakn̂e okwe, kekn̂e ancu.
13 Ero ke ancu yakro tak nîmtapowakn̂e Kporin komo, oyakro tîmtapotaxmu yakro. Tawake nîmtapowakn̂e noro yakro, erepotanmetopo poko ha.
14 Ero ke on wara kekn̂e hara ancu, oyakro tîmtapotaxmu, Ai, Sakarias, on wara men kasko apoyino komo ya, Ai, oyakno komo, on wara men kesî Kporin komo awya so, awantoman̂e ro komo. Xerusaren pono komo xe ro mak wasî, Siaw pono komo xe marha.
15 Kîrwonasî ro mak ha mîk hak rowon pono komo poko reha, eserepokan komo yakro. Kîrwonakn̂e poko so wahra mak ha ka. Miya xe xa tko orwonmekyatken̂e n̂examro okwe oyanan pen komo yemetanmekrî ke okwe.
16 Ero ke on wara tak wîîkes Ow, Aporin komo, Xerusaren pona kîwces hara. Iitono komo pînîn yawno me tak kîwcesî. Iina xa hara omîn n̂iir̂axe. Xapopo warai tak n̂ehyatkexe Xerusaren yukuknomacho, kesî Aporin komo kantoman̂e ro.
17 On wara marha ekatîmko yîwya so, On wara marha men kesî Kporin komo awya so, kantoman̂e ro, Mer̂pora tak nas amn̂e oyewtonî mko po iitono komo yemyawno pen, mîîmo komo yopo nasî. Siaw pono komo nahwores hara okre. Xerusaren Ow men̂ekesî hara oyewton me, kesî Aporin komo awya so, kasko, kekn̂e. Ero wa kekn̂e Kporin komo owya.
Paaka Meretîtho Yentoponho
18 Ero yinhîrî tak iina xa marha ween̂akn̂e hara. Iito tak paaka meretîtho warai ween̂akn̂e hara, 4 mak.
19 Ero ke on wara wîîkekn̂e ancu ya, oyakro tîmtapotaxmu ya, Ai apa, ahce kuknon mîn paaka meretîtho warai? wîîkekn̂e. On wara oyeyukyakn̂e, Xuta pen komo yakpan̂enho komo mîkyam paaka meretîtho warai komo. Ixaw Yana pen komo yakpan̂enho marha mîkyam, Xerusaren pono pen komo yakpan̂enho marha, kekn̂e owya.
20 Ero yinhîrî 4 tooto n̂en̂pekn̂e hara owya Kporin komo. Pehu pokono ro komo mîkyam xatken̂e.
21 Ahce wece mohxapu mîkyam hara? wîîkekn̂e yîwya. On wara oyeyukyakn̂e, Xuta pen komo yakpan̂enho mîkyam paaka meretîtho warai komo. Miya so ro mak nakpayatken̂e yîhkantan me ro mak ehtome so n̂examro pen okwe. N̂examro yeraspeso takî tko mohcow n̂examro hara pehu pokono komo. Paaka meretîtho warai pen komo tak nar̂mexe. Mîk hak rowon pono komo mîkyam paaka meretîtho warai komo. N̂examro mokyatken̂e Xuta komo yakpaxi. Taa, moxam yar̂maxi mohcow pehu pokono kom hara, Xuta komo yakpan̂enho komo yar̂maxi, kekn̂e Kporin komo owya. Ero wa kekn̂e owya.