Ero yinhîrî tak Kporin komo mtapotarî n̂encekn̂e xa hara Axew, weronomano rin̂e. 7-nhîrî nuun̂i po, 21-înhîrî kaamo po, ero po xa yîmtapotarî n̂encekn̂e.

2 On wara kekn̂e Kporin komo yîwya, Ai Axew, amtapotakî xa hara Sorobabew yakro, Xuta komo kopenato yakro. Xoswe yakro marha amtapotakî Kaan yaka cewomsom yakro, ahnoro Xuta komo yakro amtapotakî etîmtoxapu komo yakro.

3 On wara kasko yîwya so, Onoke xa nai tan etîmtoxapu, pahxantho Kaan mîntho yenîn̂enho. Kir̂wanî ro mîn xakn̂e okre. Ahce wa tak meen̂atu on yaxan hara? Ero pîntho me tak na on meen̂atu?

4 On wara tko kesî Kporin komo awya so. Sorobabew amoro, Xoswe marha amoro Kaan yaka cewomsom. Ahnoro tantono komo ya kesî on wara, Kar̂pe ehcoko awetapickachome so. Awakro so men was ha, wîîkes Ow Aporin komo, awantoman̂e ro kom ha.

5 On wara wîîkekn̂e awya so Exitu poi amokyataw so, Awakro so nasî Oyekatî, wîîkekn̂e. Ero ke ero wara rma nasî Oyekatî oroto awakro so rma. Ero ke erasîra ehcoko.

6 On wara marha kesî Kporin komo awya so awantoman̂e ro komo, On wara men ciino wiir̂as amn̂e, cewn̂e ro xa hara kaapu wenuhmesî, roowo marha, tuuna imo, turpem marha, ero warai wenuhmes amn̂e. Pahnoke tak nasi ero yipu yenuhmacho owya.

7 Mîk hak rowon pono komo ahnoro wenuhmesî. Ero ke tîmsom n̂ekyaxe n̂examro, tpoxwem xa mîk hak rowon pono komo ya ero yipu n̂ekyaxe. Ero yipu ke tak on omîn warîhcetîkesî, kes awya so Kporin komo, awantoman̂e ro komo.

8 On wara marha kesî Kporin komo awya so, kantoman̂e ro Mîk kesî, Owyanî rma mîn prata, owyan marha ooru, kesî.

9 Kir̂wan̂he rma re xakn̂e omîntho pahxantho. Kir̂wan̂he xa tak nas on omîn erotho yopo, kesî Kporin komo. On yaw rma cerepore awehtopo komo wîmyas awya so, kesî. Ero wara kesî awya so Kporin komo, kantoman̂e ro komo.

10 Ero yinhîrî 2 cimn̂ipu ka xakn̂e kayaritomo me Tar̂u yehtoponho, 9-nhîrî nuun̂i po, 24-nhîrî kaamo po, ero po Kporin komo mtapotarî n̂encekn̂e xa hara Axew, weronomano rin̂e.

11-12 On wara kacho n̂encekn̂e, On wara kesî xa hara Kporin komo, kantoman̂e ro komo, Tîmsom pokono komo ya kasko on wara, Ai, oyakno komo, ahce wa nîîke kpanatanmetopo komo on yipu poko? Wooto na maar̂atu aponon komo yaw, Kaan ya tîmxapu na mîn maar̂atu. Ero yaar̂ataw aponon na napeya puruma, wooto tîyoxapu, wooku, aseci, ahce na napeya knahrî, Kporin komo ya tîmîhnî. Ero yipu yapeche ahce wa tak nai apexapu, Kaan ya tîmxapu me marha tak na nai tîmîhnînhîrî hara awya so? kacoko yîwya so. Pîra, ketken̂e tîmsom pokono komo.

13 Ero yinhîrî tak on wara kekn̂e hara Axew yîwya so, Taa, anarimaw anahrî komo na napeya tooto yokoputho ke yikicicirexapu hara. Ero yipu yaperî ke kicicme tak nai hara awya so? Nhnk, kicicme tak nai kica, ketken̂e tîmsom pokono komo.

14 On wara kekn̂e hara Axew, On wara kesî Kporin komo awya so, Ero wa xa marha maxe amyamro hara oyanan komo, oyanton kom ha. Ero wara maxe owya. Ahce na miir̂atu iito, ahce na mîmyatu owya iito. Ahnoro ero yipu nasî cikicicireso kica.

15 On wara marha wîîkes awya so, cehn̂axmu me awehtoponhîrî komo poko esehtînocoko. Pahxa omîn cirihra ka mîxatken̂e. Toopu ka cirihra mîxatken̂e etîmkasî re omîn wacan me.

16 Ero yimaw on wara mîxatken̂e okwe, puruma yeperîrî menmekyatken̂e tukuhkaw 20 yeen wicakî. Ero yinhîrî mîîcetken̂e ero yamehso hara. Ero yimaw 10 yeen wicakî makî tak xakn̂e okwe. Anarimaw uupa yewkukacho yaka mîîcetken̂e ewkuru ka. Yihcirî me apikmoche rma 50 yeen wicakî xakn̂e ewkukacho yaw. Ero yinhîrî iika awcetaw so 20 yeen wicakî mak tak xakn̂e okwe. Ero wa so xakn̂e anahrî komo okwe.

17 Anatîrî komo yipin̂otopo marha wekpekn̂e. Ero ke naawaiyakn̂e tak okwe, tpayaye marha xakn̂e okwe. Kehn̂anmekyatken̂e so okwe ahce na poko awexitaw so. Wara rma owece etaknamara rma mîxatken̂e okwe, kesî Kporin komo.

18 Oroto takî ciiso nas omîn mapatan. 9-nhîrî nuun̂i po miir̂atken̂e, 24-nhîrî kaamo po ha. Ero yimawnonhîrî rma tan ehn̂ara tak awehtopo kom hara encoko xe.

19 Nai rma anatîrî komo yatho mîîmo yaw yîmtotopo yaw? Epetara ka xakn̂e anatîrî komo uupa, piiku yepu, roman yepu, oripa yepu, ero yipu ahnoro epetara xakn̂e pahxa. Oroto tak kakronomexe so okre, miya roro rma kakronomexe so, kesî Kporin komo awya so.

20-21 Ero yinhîrî takî Kporin komo mtapotarî wencekn̂e xa hara, Axew ow ha. 24-n̂hîrî kaamo po wencekn̂e. On wara kekn̂e owya, Ai Axew, on wara kasko Sorobabew ya, Xuta komo kopenato ya, On wara kesî Kporin komo awya, Pahxaro tak kaapu pen wenuhmesî, roowo pen marha.

22 Kayaritomo pen komo Ow waihkesî yaake, yukurumîknonhîrî pen komo rma. Xenciu komo kayaritomon komo mîkyam war̂mesî, n̂examro sowtatun pen komo marha. Tarara pen war̂mesî, ero yaan̂enho pen komo marha. Kawaru pen marha waihkesî, yîmkaw so toxapunhîrî pen komo marha. Noro re me cehsom komo rma n̂etwaikexe okwe.

23 On wara marha wîîkes awya, Sorobabew amoro, Seawciew mumuru. Oyanton amoro. Kecehcesî, oyamoyeknarî warai me rma kiir̂asî. Onîhtînoputho amoro oyanton me, kesî. Ero wa kesî Kporin komo awya, kantoman̂e ro. Iina mak nai omtapotarî.