Taa, on wara xakn̂e Soponias, Kporin komo mtapotarî n̂encekn̂e. Xosias xakn̂e Xuta yepamtho komo kayaritomon me, ero yimaw n̂encekn̂e. Amon pen mumutho mîk xakn̂e Xosias. Taa, Kusi mumutho mîk xakn̂e Soponias. Xetarias pen mumutho tî mîk xakn̂e Kusi, Amarias pen mumutho tî mîk xakn̂e Xetarias, Esekias pen mumutho tî mîk xakn̂e Amarias. Noro yipu mîk xakn̂e Soponias, Kporin komo mtapotarî yentan̂e.

2 On wara kesî Kporin komo, On wara men wîîkes awya so, Aporin komo Ow ha, ahnoro roowo pononho pen komo wîhcamnoyas amn̂e.

3 Tooto pen komo wîhcamnoyasî, okno pen komo marha, comota pononho pen komo marha. Tarin̂em pen komo marha wîhcamnoyasî torowo pen komo marha, ootî pen komo marha tuuna imo kwawnonho pen. Kicicitho komo wîhcamnoyasî, pona ehrokachonhîrî komo marha wîhcamnoyasî. Ero wa so yîhcamnono wiir̂as amn̂e, wîîkes Ow Aporin komo.

4 Xuta yepamtho pen komo marha wemetanmekyasî oyamorî ke, Xerusaren pononho pen komo marha. Baaw me enporixaputho mko marha wîhcamnoyasî ahnoro tantononho, yîmînthîrî komo marha, yîwya tîmsom yakn̂itoponho marha. Noro ya tîmsom pokono pen komo yosotîtho meero wîhcamnoyasî, anarî ro ya tîmsom pokono pen komo yosotîtho marha. Noro yipu pen komo wîhcamnoyasî.

5 Iito marha naxe kah yawno komo poko tahwotaxmu kom hara kica. Mîîmo meretwo so rma nahwowaxe ero yipu poko. Iito marha naxe Aporin komo poko tahwotaxmu komo rma re, Noro yetacin̂e komo marha mîkyam yaaro xa tîmtapotarî komo yentachome entan̂e komo. Miwkon yosotî marha tko n̂etahcaxe asakno rorono yosotî rma kica.

6 Iito marha naxe Aporin komo yahsîpînkan̂enho kom okwe. Iito marha naxe Aporin komo yepon̂e pîn komo, Ahce wara wai awya Apa? kan̂enho pînî ro komo okwe. Noro yipu komo wîhcamnoyasî.

7 On wara marha wîîkes awya so, tîtken̂e mak ehcoko Kporin komo yaw kexirî ke so. Pahnoke tak men nasi Kporin komo kamon. Kaamo nukuknomekn̂e Kporin komo tîmsom waihkacho ha. Tînan̂ikîthîrî komo tak nahsîyakn̂e ero yimaw twaihkaxmu.

8 Taa, on wara ciino wiir̂asî Aporin komo kamon po, tîmsom waihkacho me enmayataw, antomano rin̂e pen komo wemetanmekyasî kayaritomo xîkrî pen komo marha. Anarî yana komo ponon yawno pen komo ahnoro wemetanmekyasî.

9 Ero po anarî pen komo marha wemetanmekyasî. Iito naxe metata makokorono pore tahronîmsom ro komo. Noro yipu komo rma ponaro cehtopo komo mîn yaw so waihkano n̂iir̂axe okwe, cemaronwaxe marha ero yipu yaw so kica. Emapona roro naxe ero wara okwe.

10 On wara marha wîîkes awya so, Aporin komo xa Ow ha, ero kamon po tak yîwratano ritopo n̂esencesî metatawno. Ootî metatan mîtwono mîkyam nîwracexe. Emtacho pono komo marha nîwracexe. Esetapacho komo marha n̂esencesî, îh pono pen komo yesetapacho.

11 Awratacoko amyamro Makates pono pen komo. Ahnoro twarawantaxmunhîrî pen komo tak n̂etwaikexe okwe, puranta yemtakaiman̂enho pen komo marha tak naxe tîhcamnoso okwe.

12 On wara marha ciino wiir̂asî ero yimaw, Xerusaren pono komo wepotîkesî ramha ke. Eserepokan pen komo tak wemetanmekyasî. Uupa yukun yukumuru warai ro mak mîkyam kica. On wara kan̂e komo mîkyam, Ahce wa na kiin̂e pîn komo Mîkro Kporin komo. Kir̂wan̂he kirihra so nai, kîwîrîmara so marha nai, kan̂e komo mîkyam kica.

13 Ero ke n̂examro yemyawnonho pen tak naar̂axe waapa komo. Yîmînthîrî komo marha n̂ixkexe. Tîmîn komo rma re n̂iir̂axe, ero yaw so tko exihra naxe okwe. Tînatîrî komo rma re n̂iir̂axe uupa yatho. Ero yeperîrî yukunu tko erîhra naxe okwe.

14 Pahnoke xa tak men nasî Aporin komo kamon, awerepokacho komo xa tak. Yohno men ero me n̂enmayasî. Entacoko kapu. Kahwokatîkacho mak n̂esencesî ero po. Cerewre ro mak n̂emtarakexe karitînhîrî komo rma ero kaamo po.

15 Aporin komo yîrwonîmtopo xa mîn ero kaamo. Awemetanmetopo komo mîn, awewru komo yaatopo marha, awahwokacho komo, awîrîmacho komo marha. Awarpape men n̂enmayas ero kaamo, awahwotacho komo mera ro mak nasî. Tusmui men nasî kaapu ero kaamo po, cicwiye xa nasî.

16 Tuu kacho marha n̂esencesî ero kaamo po. Yuu yuu kacho marha n̂esencesî. Twacayem pono pen komo waparî mokyaxe. Kawno nasî mîîmo iito sowtatu mîn. Ero yawno komo waparî me marha mokyaxe.

17 Iitono komo yahwokacho wekpes okwe. Ewuhnî komo wara ro mak n̂etar̂axe okwe. Ero wara n̂examro pen wiir̂asî kicicme exirî ke so opoko, Aporin komo poko. Xoo kesî mak n̂examro kamxukutho roowo pupuntho wara, ar̂maxapu wara. Wexkiririnthîrî komo marha n̂emarakesî roowo pona wetî wara ro mak kica.

18 Yukurun komo mera ro mak nasî yupurantan komo ero kaamo po, Aporin komo rwonîmtopo po. Prata nasî yukurun komo mera, ooru marha. N̂etwîrîmesî tak roowo ahnoro Kporin komo yîrwonîmrî ke. Wehto wara ro mak nasî yîrwonîmtopo, tponarono komo yewyomacho ke nîrwonasî. Ponan̂e rma waihkano n̂iitîkesî, roowo pononho pen komo nîhcamnotîkesî ahnoro rma. Ero wa ciino n̂iir̂asî Kporin komo.