Taa, Abakuke ow ha, weronomano rin̂e ow. On wara kacho n̂ekatîmyakn̂e Kporin komo owya, kicicme Xuta komo yehtopo pokono, ero tan wekatîmyas awya so.

2 On wara wîîkekn̂e Kaan ya, Apa kah yawno, atî wicakî pahkînon kîmtapowa awakro oyakronomacho poko, an̂entatorî wara ro mak kîmtapowasî. Amna waparî komo mokyaxe kopi, wîîkesî cma re awya. Okurunpera rma tko mas okwe.

3 Ahce kacho kicicme cehsom komo menpe owya? Ahce kacho emetanmekno rin̂e komo menpe owya okwe? Emyawno poko n̂en̂epanaxe, waihkano marha n̂iir̂axe. Etpoko nîrwonaxe marha kica, n̂eseiyaxe marha kica. Ero warai komo menpes owya okwe.

4 Ewetîn me tak nasî kayaritomo komo mtapotacho. Yaarono me en̂ekano cirihra ro mak naxe. Kir̂wan pen komo mamcexe kicicitho komo kica. Ero ke tohnawno me ro mak en̂ekano n̂iir̂axe en̂ekano rin̂e komo. Ero warai komo menpes owya Apa okwe.

5 Ai Abakuke, mîk hak rowon pono komo ka enko. Noro yipu komo yenîche awya meserepokesî ro mak. Anarme xa tak ciino wiir̂as amn̂e. Owya ciino ritopo ka wekatîmyasî awya. Wara rma omtapotarî manwekyasî aweserepokarî ke.

6 Kawtew komo tak wepamnoyasî mer̂pora ro mak. Kîîxatî pînî ro komo mak mîkyam. Yohno so cemyawno komo ciin̂e marha mîkyam. Roowo poko hak tîtosom komo mîkyam. Ero wa so cexe mîk hak yewtontho yahsîso.

7 Yukurumîkno komo mîkyam, eraspoto ro mak ha. Tanme ro so mak cepanatanmesom mîkyam anarî komo yanmera ro mak. Kayaritomo me cehtopo komo ponaro mak naxe tanme ro so rma.

8 Kar̂pe tîtosom xa mîk n̂examro yoku kawaru. Reopahtu yoponkan̂e mîkyam. Tmayan̂em mîk iyoh komo kawaru, robu yopono, kokmamche cetarisom yopono. Kar̂pe xa tîtosom mîkyam kawaru mkawno komo. Meyeno mohxapu komo mîkyam kawaru mkaw so tmohsom komo. Kurum wara xa mokyaxe korîn wece tîhtosom wara.

9 Ahnoro n̂examro mokyaxe waihkano riso mak okwe. Pataw mak mokyaxe ocowo wara, resce n̂ixan wara. Mer̂pora ro mak nahsîyaxe tooto komo. Axawa wara ro mak naxe yînahsîrî kom ha.

10 Kayaritomo pen komo mak tak nîwîrîyakexe kica. Antomano rin̂e komo poko mak n̂etaporexe. N̂ewrexe mak ewto poko, twacayem poko rma. Ero yipu yahsî xe cexitaw so roowo n̂enmekyaxe cehyun komo me, waaca yepore tîtotome so. Ero wa ewto mko nahsîyaxe.

11 Ero yinhîrî tak anarme n̂esehtînoyaxe hara. Kicicme so tak naxe kica. Kaan yanwekn̂e me naxe kica. Ponaro cehtopo ro komo poko mak nahwowaxe kar̂pe cehtopo komo yanme. Ero wa naxe Kawtew komo, kekn̂e Kporin komo owya.

12 On wara wîîkekn̂e hara Kporin koomo ya, Ai Apa, Pahxanî ro mak Amoro, yihcitopo ken̂arî pînî ro mak ha. Ponaro oyehtopo marha Amoro, Kir̂wanî ro xa. Waipîra nas amna amn̂e. Apa, epanîno rin̂e me an̂irithîrî rma mîkyam Kawtew komo. Toopu warai Amoro Apa, panareno rin̂e me xa n̂examro mîhtînoyakn̂e.

13 On warai tko Amoro, kir̂wanî ro mîn awewru, kicicitho komo wece enîn̂e pîn. Tohnaw emetanmekno ritopo yenîn̂e pîn Amoro. Ero ke ahce kacho yîwîrîmano rin̂e komo yînîmn̂e me mai hara? Kicicitho komo naxe ar̂mano rirî poko. Kir̂wan komo rma waihkexe kicicitho komo okwe. Ahce kacho tîtken̂e mak mai noro yipu komo yar̂metaw kicicitho komo ya?

14 On wara miir̂a ham tooto komo, ootî wara rma miir̂a ham, tuuna imo kwawno wara, Sehrere me tîtosom wara rma tooto komo miir̂asî, kayaritomomnî wara rma.

15 Noro yipu komo nanîmyaxe kiiwi ke. Anarimaw mîîye yaka nahsîyaxe. Anarimaw mîîye warai yaka nahsîyaxe. Anmîche nahwowaxe tak. Ero ke tawake naxe.

16 Ero ke tookuthîrî pun tak nakn̂iyaxe tîmîyen komo ya tîmsom me rma kica. Kotoporem marha nakn̂iyasî tîmîyen komo ya tîmsom me kica. Tîmîyen komo ke mak totke naxe. N̂emtawexe mak okre. Ero ke ero yipu ya tîmsom nîmyaxe kica.

17 Ahce wa natu noro yipu komo awya Apa? Miya roro rma katî tîmîyen komo yawnonho nahsîyatu, mîk hak rowon pono komo nar̂metu mîya roro yîtîhkan me ro mak? Yîpînîn yawno mera ro mak ma natu miya roro okwe? wîîkesî. Ero wara wîîkes awya Apa.