Onî reha Ninipe pono pen komo waihkacho pokono karita. Naun n̂enîtho tan, Ewkos pono n̂enîtho ha.

2 On warai Mîkî Kaan, tîrwonîmsom Mîkro kewyomacho ke, cesepansom marha Mîk ha. Tîrwon̂e xa n̂esepanîyasî. Tîîxatî pîn komo yepeman̂e ro Mîkro Kporin komo. Tîrwonîmtopo yîmton̂e marha Mîk tîîxatî pîn komo yemetanmetome amn̂e.

3 Yamoro tîrwonîmsom tko Mîkî Kporin komo. Karitî xa. Kicicme ehxapu komo yepemacho waton̂e pîn marha Mîkro. N̂expe mak noro emetanmekîn me, kan̂e pîn marha kicicme ehxapu komo poko. Noro ya ciino ritopo rma moro ocowo imo cetapomrisom kom ha. Tuuna yewru ken̂e exitaw kaapu on wara kacoko, Kaan tarî ke yîsînpecho mîn ham, kacoko.

4 Anarimaw tuuna imo n̂eiyasî Kporin komo. Napainokesî tak okwe. Tuuna yepu komo marha napainokesî. Ero wa ciriche yîwya Basan pononho pen tak naawaiyasî atîhtaxapunhîrî pen okwe, Kahmeru pononho pen marha okwe. Ribanu pono pen marha waihyasî epemrutun pen okwe.

5 N̂esewsîyasî tak îîpî mko Noro mokyataw. Nuxukrapamyasî marha matîwîn pen. Roowo tak n̂esewsîyasî Noro mokyataw. Tatanaxe marha tak ahnoro roowo pono komo Noro mokyataw.

6 Onoke thakwa re epîrkara nai Kaan yîrwonataw? Onoke thakwa re yîrwonîmtopo nînîmya tîrwon̂e xa exitaw kopi? Cetukmamsom wara rma nasî Noro rwon katî wara, wehto ke etahsîxapu wara. Toopu yahkan̂e marha Mîkro.

7 Kîrwan Mîkro Kporin komo, kecehton̂e Mîkî kesemetanmekyataw. Tpona enîn̂e komo ponarono Mîkro.

8 Tuuna yukmacho imo warai ke rma tko ewto imo pen nîhcamnoyasî. Miya ro mak tîîxatî pîn komo weken̂emekyasî awarpanaka roro.

9 Ahce poko ma re mesencetu, Kporin komo yemetanmetopo poko mesencetu? Awirponkexe ro mak Noro. Awîrîmetîkexe so ro mak okwe. Asakî ro aweporîra nasî awîrîmacho komo.

10 Ero yipu poko cesentaxmu komo tak n̂etamxikyaxe cekyekyem chekan wara, wenaxe marha. Ero wa cexitaw so rma n̂ehcamnoyaxe n̂examro puruma yeputho wara, turpem wara. Erotho n̂ecahtîkesî, ero wa xa marha n̂ehcamnoyaxe iitono pen komo.

11 Ai, Ninipe pono komo amyamro, awya so wîîkesî, apoyino rma nasî amn̂e Kporin komo yîwîrîmacho poko cesehtînosom. Kicicme awehtopo komo poko panatanmekno rin̂e rma noro.

12 On wara marha kesî Kporin komo, Erasîn me rma re naxe Ninipe pono komo. Mer̂pono pîn komo marha mîkyam. Noro yipu komo rma tko nar̂mesî Kporin komo, nîhcamnoyasî ro mak exihra cehso ro. Pahxa ka kemetanmekyatken̂e so amyamro. Wara rma awemetanmekîra so tak was hara.

13 N̂examro awantomexe so paaka yantoman̂e wara, tîpîmtarinoyem wara. Apîmtarinonhîrî komo tko waxikwesî. Awapomitoponhîrî komo marha wîmhokesî.

14 On wara tko kesî Kporin komo Asiriu komo ya, Owî rma wantomekn̂e oyanton komo awosotî yîhcamnotopo poko. Cekaiporesom me exihra tak nasî awosotî amn̂e. Ponaro awehtopo komo mîn yaw so nasî yaake onoke warai me ciixaputho mko, toopu ciixaputho komo marha, yukuixaputho marha. Erotho mko kr̂a tak wîhcamnoyasî. Awokoputhîrî komo yewtarî wahcesî kicicitho me ro mak awexirî ke so.

15 Mîkro tak encoko hara îh pono. Yîhtarî tak n̂esenpesî, kahwotacho yekaiporen̂e tarî. Aaxatî pîn komo exihra tak naxe, kan̂e mîkro. Ero ke ahwotacoko amyamro Xuta yepamtho komo awahwotacho ro komo yimaw so. Kaan n̂entarî me amtapotachonhîrî komo yaw roro rma etîmcoko yîwya. Awaparî me so mokuhra tak naxe kicicitho komo. N̂ehcamnoyaxe ro mak tak n̂examro pen. Exihra tak naxe. Ero wara naxe.