Taa, Mikeias ow ha Moraste pono. Pahxa ka wencekn̂e Kporin komo mtapotarî. Xotaw ka xakn̂e Xuta yepamtho komo kayaritomon me, ero yinhîrî xakn̂e Akas hara, ero yinhîrî Esekias xakn̂e hara. Ero wicakî xatken̂e Xuta kayaritomon komo Kporin komo mtapotarî yencetaw owya. Samaria pono komo pokono mîn wencekn̂e, Xerusaren pono komo pokono marha. Iitono komo yehtopo n̂enpekn̂e owya.

2 Ero ke on wara wîîkekn̂e, Ai, mîk hak yana komo amyamro, omtapotarî ka entacoko. Ahnoro roowo pono komo amyamro entacoko omtapotarî. Kicicme awehtoponhîrî komo men n̂ekatîmyasî Kporin komo awya so. Kporin komo rma Mîkî, tîmînî ro yawno, kir̂wanî ro yawno ha. Noro xa n̂ekatîmyas awya so.

3 On wara men nasî Noro amn̂e, Kporin komo, ceken poi mokyasî. Roowo pona tak nîhcesî. Îîpî meretîrî pona napikyasî roowo pono komo meretîrî pona.

4 Ero yapikyataw îîpî mko nuxukrapamyasî. Woskara mko n̂etîmtakesî. Maan̂i nuxukrapamyasî wehto mîtkoso ciriche, ero wa nuxukrapamyasî îîpî. Tuuna wara cehso ro tak nasî îîpînhîrî, puhyaka tîhtosom me.

5 Ero wara nasî Noro tanwekn̂e me exirî ke Xako yepamtho komo, kicicme exirî ke so Ixaw Yana kom ha. Ahtono xa mîn ha Xako yepamtho ya oyanwetopo xa. Samaria pono rma mîn ha. Ahtono xa mîn îh pono kotoporem yakn̂itopo mko Xuta yepamtho komo ya? Xerusaren pono rma mîn ha.

6 Ero poyero Samaria tak wiir̂asî yukpurukpuruntho me mak kica. Naatî yewtî me mak tak nasî ero ewtotho, uupa yepu ciitopo me ha. Toopu marha kr̂a war̂mesî woskara pona, mîîmotho wacantho. Yîmînthîrî komo yaponho marha wahrunkesî yuhnawnonhîrî.

7 Mer̂pora nasî iito mîk hak warai me ciixaputho, ponaro n̂examro yehtopo. Eronhîrî mko tak nas amn̂e cecor̂or̂omaxi. Iito marha nasî mîk hak pohkan̂e me ehtoponhîrî komo yepetho. Ero marha tak n̂ecakyasî. Ciixaputho wakuhr̂apesî ahnoro, ponaro iitono komo yehtoponho. Wooxam komo yepetho pona ero mko nahsîyatken̂e, cipici pîn poko cehtamci komo. Ero ke ero yipu xa marha tak nahsîyaxe hara mîk hak wooxam komo poko ehtoponhîrî komo yepetho xa hara.

8 Ero ke iitono komo yîwîrîmarî ke kîwracesî. Oyewru mak waar̂asî. Yîhtara marha ketar̂asî, ponomra marha. Xapari wara rma wîîkesî tacixapu wara. Waw kan̂e wara marha wîîkes okwe.

9 On wara tak naxe Xerusaren pono komo, cerekyem wara naxe oko ecpîn ke cerekyem wara. Xuta pen komo tak n̂epore emetanmecho komo xa tak oko. Oyanan komo yaka xa tak mokye yîwîrîmacho komo, Xerusaren pono komo yaka.

10 Xerusaren pono pen komo yîwîrîmacho ekatîmra ehcoko Kace pono komo ya. Yîwratara ro mak ehcoko. Bece Apra po ehmamacoko roowo pore.

11 On wara naxe Sapiri pono pen komo, miya tak cexe ponomnî me, tîhyapamso xa. Cewton komo poi tohra ro mak naxe Saanan pono kom hara. Nîwracexe tak Bece-Esew pono kom hara. N̂examro yaponho tak nasî taaso okwe, ececetotoponhîrî kom ha.

12 Tahworetopo komo xe ro mak n̂ehce Maroce pono komo, expora ro mak n̂ehce ero xe. Ahwokano ritopo xa matko mokye Kporin komo n̂ekpotho rma. Xerusaren potaka rma mokye okwe.

13 On wara ehcoko amyamro Rakis pono kom hara, awoh komo yimicoko kawaru tarara poko. Amyamro ka mîxatken̂e kicicme so yihcirî me. Apoyero so rma tak Siaw pono komo tak xatken̂e kicicme so hara. Kicicme Ixaw Yana komo yehtoponho pokono me keen̂atken̂e so amyamro hara kica, Rakis pono komo.

14 Ero poyero Moresece Kace pono komo mîwakrexe awtorî komo me. Ixaw Yana kayaritomon komo n̂emîknoyaxe Akisibe pono kom hara.

15 Marexa pono komo amyamro, on wara wîîkes awya so hara, pahxaro tak awaparî komo wekpes okwe. Aturaw pona xa wekpesî poko Ixaw Yana komo yahwotacho.

16 Ero ke on wara ehcoko amyamro Ixaw Yana komo, ekanamurinkacoko amxîkîthîrî pen komo pînîn yaw, yîpînîmîkno komo pînîn yaw so ha. Yîhpora ro mak tak ehcoko kwacinama tîhke ha. Ahyai so tak cexe meyeno roowo pona, mokuhnî me hara cexe okwe, kekn̂e Kporin komo owya. Ero wa kekn̂e.