On wara kekn̂e xa hara Kporin komo owya, On wara marha naxe anarî komo, Kicicme ciino ritopo nîhtînoyaxe kica tanme ro so mak. Kicicme ro mak ciino ritopo nîhtînoyaxe tîkaman komo po rma okwe. Enmayataw tak tînîhtînoputhîrî komo yaw roro rma n̂iir̂axe kica kar̂pe so cexirî ke so. Ero wara naxe okwe. Ero ke n̂etwîrîmexe ro mak noro yipu komo okwe.

2 Mararînano tow xe naxe anarimaw. Ero ke osomînhîrî pen tak n̂etapetu ahsîtome tak okwe. Mînînano poko marha pohnaxe, ero mko marha nahsîyaxe okwe. Tpoyino komo yekenho rma nowyaxe kica Kporin komo nîmîtho n̂examro porin pen komo ya.

3 Ero ke on wara kesî Kporin komo, Owî reha tak wîhtînoyasî oyanan komo yîwîrîmacho hara. Awîrîmacho komo aweporîche so emahcira ro mak maxe okwe. Ero yimaw tak apoyino komo yopono wara etarira ro mak tak maxe. Awîrîmacho komo me xa tak nasî ero yimaw.

4 Ero yimaw awîrîyakacho me nîmtapowaxe tooto komo. Apoko so nîmtapowaxe cewru komo yarîrî me rma. On wara kexe, Tîwîrîmaxi ro mak taxe okwe. Opoyino komo yekenho tak nasî tîraconkaxi okwe. Omararîntho nowyakn̂e Noro okwe. Kaan pona enîhkan̂e komo ya nîmye hara okwe, kexe apoko so.

5 Ero ke Kaan yanan komo yesenmekyataw amn̂e apînîn yawno komo exihra ro mak nas okwe antomano rin̂e me cehsom. Men̂ekacho yar̂man̂e exihra nasî, Iitono xa nasî noro yeken me, kan̂e exihra. Ero wa thakwa maxe amn̂e.

6 On wara tko kexe owya weronomano rin̂e komo, Ai, Mikeias, Ero yipu poko weronomano cirihra ro mak tak esko kica. Kîwîrîmacho komo poko weronomano cirihra tak esko kica. Yîwîrîman me ro mak wa taxe, kexe owya.

7 On wara wîîkes hara yîwya so, Ai, Xako yepamtho amyamro, on wara wîîkes awya so, Kporin komo Yekatî mtapotarî mera katî mencetu awîrîmacho komo pokono? Ero yipu poko tîmtapotaxmu me rma nai Noro awya so. Awakîretopo komo me rma tan kîmtapowas apoko so. Kir̂wan komo reha n̂etakirexe rma omtapotarî yentarî ke.

8 On wara marha kekn̂e Kporin komo Ixaw Yana komo poko, Kokon̂oro tak n̂esehtînoce n̂examro ooxatî pîn me okwe. Ahyari so tîtosom komo ponontho mîmohkexe ahnorono, awrutathîrî marha. Ero wa maxe apona enîn̂enhîrî komo poko rma kica. Sowtatu wara rma maxe waapa me toxapunhîrî wara.

9 Oyanan komo men̂epexe kica yîmîn komo yai, wooxam komo, kir̂wan yai so men̂epexe. Yîmxîkrî komo yakronoma xe cma re wasî. Kir̂wan̂e xa oyesenpotopo tko meyamyaxe kica, eroromero meyamyaxe kica.

10 Etocoko tak miya ha. Awepokaretopo pîn tan arowon komo. Kicicme mak nas okwe, tîwîrîmaxi nasî etakir̂waman me ro mak okwe.

11 Anarimaw cemarontaxmu na mokya, awemîknon̂e kom ha. On wara na nîîke awya so, Kaanî mtapotarî wekatîmyas awya so. Awokpexe so ro mak tak Kporin komo uupa yukun ke, kawaxiyem ke meero, kesî Kporin komo, kee na noro yipu komo. Ero wa kan̂e xa tak n̂iir̂axe moxam tweronoman̂e komo me, kekn̂e owya Ixaw Yana komo poko.

12 On wara tko kesî Kporin komo awya so Ixaw Yana komo ya, Pahxaro tak kenmekyaxe so hara ahnoro amyamro Xako yepamtho komo. Ixaw Yana komo wenmekyasî etîmtoxapu komo. Tooku oper̂a n̂enmekyas osom waaca yaka, anarimaw n̂enmekyasî woskara po rma cuh ken̂arî pona. Ero wara rma moxam wenmekyasî. Mer̂pora ro mak tak naxe tooto komo ero yimaw. Ero ke kar̂pe so n̂emtarakexe.

13 Moxam yesamarî yînankan̂e cesî poturme so. Ewto metatan tak nahrunkexe ewto poi totohme so. Metata yaro tak cesî moxam kayaritomon poturme. Kporin komo rma cesî noro poturme hara. Ero wa naxe n̂examro amn̂e.