Ero yinhîrî on wara wîîkekn̂e owî, Ai, Xako yepamtho komo yantoman̂e komo amyamro, Ixaw Yana yantoman̂e komo marha amyamro. Omtapotarî men ka entacoko. Kir̂wan̂he xa ciino ritopo yîhtînopîra ma matu okwe?

2 Kir̂wan̂he awexi xatî pîn komo ro mak amyamro. Kicicme awexi xatî mak amyamro kica. Oyanan komo pikan̂e mak amyamro oko. Yupunthîrî komo yukwaikan̂e marha amyamro iyochîrî poi.

3 Oyanan pen komo pun yonon̂e marha amyamro, mipikexe oko. Iyochîrî komo mîhkocexe pin̂ipici me cehso ro okwe. Moxam makpocaxe ro mak wooto wara tîyosom wara. Tahrem yaka takpotusom wara rma miir̂axe oyanan pen komo.

4 Amn̂e tak Aporin komo yakro nîmtapowaxe antomano rin̂e komo. Cerewre ro mak kexe yîwya. Eikura ro makî tko nasî Noro. N̂esewyahruyasî tak Noro n̂examro wece enîhra. Ero wara nasî n̂examro wece kicicme ro mak exirî ke so okwe.

5 On wara kes hara Kporin komo, On wara naxe weronomano rin̂e komo, anarmen poko oyanan komo weronomexe kica. On wara kexe tînahman̂e komo ya, Aweporîra ro mak nasî awahwokacho komo, kexe yîwya. On wara reha kexe tînahman̂e pîn komo ya hara, Awaparî komo men mokyaxe amn̂e okwe, kexe. Ero wara kexe kica.

6 Ero wara awexirî ke so awarpantaxapu wara tak maxe amn̂e. Kaan n̂enporî yenîhra ro mak tak maxe okwe. Awarpan chewno wara ro mak maxe, yuhnari yîhtînon̂e pîn me tak okwe. Kokmamxapu wara tak naxe amn̂e weronomano rin̂e komo. Awarpape nasî yîwya so enmarî rma okwe.

7 Tîhyapamso tak naxe Kaan n̂enporî yenîn̂enho warai komo. Cehn̂axmu me mak naxe Kaanî mtapotarî yentan̂e warai komo. N̂esewoponyaxe mak tîmtapotarî komo yeikura ro mak exirî ke Kaan okwe. Ero wara naxe weronoman̂e komo amn̂e.

8 Owî reha wasî okaritotopo ken̂e xa. Kporin komo Yekatî ken̂e xa wasî. Takîhso ciino ritopo ken̂e xa marha wasî, okaritotopo ken̂e marha. Ero wara wasî Xako yepamtho komo ya ekatîmtome Kaan yanwetoponho yîwya so. Ixaw Yana komo ya wekatîmyasî kicicme ehtoponhîrî komo.

9 Ero ke omtapotarî men entacoko amyamro Xako yepamtho yantoman̂e komo, amyamro marha entacoko Ixaw Yana yantoman̂e komo. Poxumra ro mak nas awya so yaaro en̂ekano ritopo. Yaaro en̂ekano cirihra ro mak maxe kica.

10 Waihkano ritopo ke rma mîîmo pen miir̂axe amyamro Siaw pono mko. Kicicme awehtopo ke marha mîîmo mko miir̂axe Xerusaren po ha.

11 On wara marha naxe iitono yantoman̂e komo, Kir̂wan ham amoro, kexe tupurantan komo tîmn̂e komo ya mak okwe. Cepemacho pona marha panatanmekno n̂iir̂axe kica Kaan ya tîmsom pokono kom hara. On wara marha naxe n̂examro weronoman̂e kom hara, Ero wa tî matu amn̂e amyamro, kexe cepeman̂e komo ya mak okwe. Noro yipu komo rma Kporin komo pona tî re n̂een̂atu. On wara kexe, Kîchewno Mîk okre Kporin komo. Ero ke kahwokacho komo keporîra so ro mak nas okre, kexe kica.

12 Ero ke ero wara awehtopo komo yanme rma mararî wara ro mak nasî Siaw amn̂e, pomoxapu wara rma okwe. Yukpurukpuruntho wara marha nasî Xerusaren ewtotho me tak ha. Peen ken̂e marha tak nasî yîtîwîn omîntho yekenho, comota pono wara ro mak okwe, kekn̂e Kporin komo owya. Ero wa kekn̂e.