Taa, pahxa Kporin komo nîmtapowakn̂e Xonas yakro, Amitai mumuru yakro.

2 On wara tî kekn̂e yîwya, Ai Xonas, ewto imo pona etoko, Ninipe pona. Iito awexitaw tak n̂examro yîwîrîmacho ekatîmko. Kicicme xa tak iitono komo yehtopo n̂esenpesî owya xiya roro xa tak, kekn̂e Xonas ya.

3 Anana tko tî cekn̂e Xonas okwe. Kporin komo yai ro makî cemahci xe xakn̂e okwe. Tahsisi pona tîto xe xakn̂e. Ero ke Xope pona cekn̂e okwe. Iito tak kanawa imo n̂een̂akn̂e tuuna imo kwaw tîtosom, Tahsisi pona tîtosom. Ero ke kanawa yosom n̂epemekn̂e Tahsisi pona taatopo yepetho. Ero yinhîrî n̂esenkayakn̂e tak akro so tîtotome Tahsisi pona. Kporin komo yai cesen̂epanmekî xe xakn̂e kica.

4 Ero yinhîrî tak, tuuna imo kwaw toche so n̂he kanawa yaw ocowo imo tak tî n̂ekpekn̂e Kporin komo. Yamarataka imo tî n̂iir̂akn̂e ocowo kanawa imo panaman̂e me ro mak okwe. Ewakrokarî yaro tak tî xakn̂e kanawa pen okwe.

5 N̂eraswatken̂e takî tî kanawa yaan̂e komo. Ero ke takî tî ponaro cehtopo komo yakro so nîmtapowatken̂e. Emyawno pen marha nar̂metken̂e kr̂a yukwaka, tînarîthîrî komo pen okwe. Ero wa nar̂metken̂e taponukye n̂he tak ehtome kanawa. Xonasî tko nîwînîkyakn̂e kopi. Kanawa imo yamtakpon yaka nîhcekn̂e, yuhnawno yaka xa. Iito nîwînîkyakn̂e yuhnari.

6 Ero ke yîhyaka tak cekn̂e kanawa yaan̂e komo yantoman̂e. On wara kekn̂e yîwya, Ai, oyakno, ahce kacho mîwînîkya kopi? Apakak ha kopi. Ponaro awehtopo yakro amtapotakî waipîra kehtopo komo poko. Kîpînîn yaw tak na nai, enorira na kiir̂atu so, kekn̂e. Ero wa kekn̂e aan̂e komo yantoman̂e Xonas ya.

7 Ero yinhîrî on wara takî tî ketken̂e aan̂e komo n̂examro re, On wara cehcerî, men̂ekacho tar̂macerî kicicitho yîhtînotome kîwya so. Onoke poyero na on moko ocowo imo kopi, ketken̂e tî. Ero ke tak men̂ekacho nar̂metken̂e. Xonas pona tko n̂epîrkekn̂e kopi.

8 Ero ke on wara takî tî ketken̂e kanawa yaan̂e komo yîwya, Oyakno, onok poyero on moko ocowo imo? Ekatîmko ka amna ya. Ahce pokono amoro? Ahtono amoro, ahce roowo pono? Onok yanan xa amoro? ketken̂e yîwya.

9 On wara tî n̂eyukyakn̂e Xonas, Ebrew Yana ow ha. Kporin komo ponarono xa ow ha. Kaanî ro xa Mîk Kporin komo, ponaro kah yawno komo yehtopo. Tuuna imo yakîhton̂enho Noro, roowo yakîhton̂enho marha. Noro ponarono xa ow ha, kekn̂e tî yîwya so.

10 Ero yipu yentache tak n̂eraswatken̂e ro makî tak tî aan̂e komo. On wara tî ketken̂e hara yîwya, Ahce kacho ero wa meexi kopi? ketken̂e tî yîwya. Kporin komo yai emahcitopo tî n̂encetken̂e. N̂esekatîmyakn̂e tî Xonas yîwya so.

11 Ahce wa amna awir̂a tuuna imo yîtîtmamtome hara? ketken̂e tî yîwya. Kar̂pe ro makî tî n̂ehtîkekn̂e ocowo kopi.

12 On wara takî tî kekn̂e Xonas yîwya so, On wara wîîkes awya so, Ow ka anîmcoko, ow tak ar̂macoko tuuna imo kwaka. Ero wa oyar̂mache nîtîtmamyasî tak tuuna imo. Opoyero on moko ocowo imo kîîpo so, kekn̂e. Ero wa tî kekn̂e Xonas yîwya so.

13 N̂ekaricetken̂e rma tko ka kanawa yaan̂e komo, kweikwei ketken̂e. Ecihtaka tîto xe rma tko re xatken̂e kweikwei po rma. Pîra rma xatken̂e okwe, n̂ehn̂etken̂e rma okwe. Kar̂pe ro mak takî tî n̂ehtîkekn̂e ocowo imo.

14 Ero yinhîrî Kporin komo yakro tak tî nîmtapowatken̂e kanawa yaan̂e komo, Apa kah yawno, moso amna nar̂mes okwe. Amna poko cma re yîrwomra masî moso yar̂macho poyero. Kicicme exihnî mîwaikacow okwe, kahra cma re masî amna poko. Awanme rma ha tko ocowo imo mekpo. Ero wa amna kes awya Apa, ketken̂e tî Kaan ya.

15 Ero ke Xonas pen tak nanîmyatken̂e. Pom, kopow, tuuna imo kwaka nar̂metken̂e. Ero yinhîrî, tîî, nîtîtmamyakn̂e tak tuuna imo, ocowo kom ha.

16 Ero ke n̂eraswatken̂e ro makî takî tî kanawa yaan̂e komo Kporin komo pona. Yîwya tîmsom tî nakn̂iyatken̂e. Aponaro xa tak nas amna miya roro, ketken̂e marha tî yîwya. Ero wa tî ketken̂e kanawa yaan̂e komo Kporin komo ya.

17 On wara tko Xonas pen n̂iir̂akn̂e Kporin komo, pahxa rma ootî imo nakîhcekn̂e noro pen yermomn̂e. Tow suru, n̂ermomyakn̂e tak okwe. Iito tak n̂enmayakn̂e noro pen 3 ro ootî imo ropotaw rma kica. 3 ro xa marha kokmamyakn̂e iito. Ero wa xakn̂e Xonas pen okwe.