Ero yinhîrî takî Kporin komo yakro nîmtapowakn̂e Xonas, ponaro cehtopo yakro. Ootî imo ropotaw rma nîmtapowakn̂e.

2 On wara kekn̂e, Kesemetanmekye ro mak okwe. Ero ke Kporin komo yakro kîmtapowakn̂e, cerewre ro mak wîîkekn̂e. Oyeyukyakn̂e tak. Wehto imo ywawno wara rma wîxakn̂e okwe. Owî cma re makronomes Apa, wîîkekn̂e rma tko awya. Omtapotarî mencekn̂e okre.

3 Weyun yaka ro mak ow mar̂mai Apa tuuna imo kwaka, rakataka rma okwe. Yukmacho kwawno wara ro mak wîxakn̂e okwe. Oyopo ro mak xakn̂e an̂irithîrî yamarataka imo.

4 On wara ka wîîkekn̂e, Ahyai kr̂a ow men̂epekn̂e ham oyenîra tak awehtome okwe, wîîkekn̂e. Wara rma amîn wece cma re ween̂as hara, kir̂wanî ro wece, wîîkekn̂e rma.

5 Yukwaw ro mak wîxakn̂e okwe, kahwokekn̂e ro mak. Peen n̂ekaramiyakn̂e ohtîpîrî pore kica yukwawno ro.

6 Îîpî yapon yaka roro kîhcekn̂e kopi. Waaca yawno wara wîxakn̂e roowo yatumnaw. Kahrutopo yawno wara ro mak wîxakn̂e eroromerono wara. Weyun yawnonhîrî tko ow manîmyakn̂e hara Apa. Ponaro oyehtopo xa Amoro.

7 Oyahwokatîkache tak aponaro wîxakn̂e Apa. Ahyaka roro toi ham omtapotarî amîn yaka roro, kir̂wanî ro yaka.

8 On wara amna nai ham ero pîntho ponarono komo, enporixaputho ponarono kom ha, Kaan ya takronomacho komo yahsîpînkan̂e me mak naxe kopi.

9 Ero warahra tak was oroto. Ahce na tak wakn̂iyasî awya tîmsom me. Kir̂wan̂he xa mai ham okre, kacho marha tak waar̂asî waano ero yipu tîmrî me. Omtapotachonho yaw roro xa tak wiir̂asî, Ero yipu wîmyas Apa awya, kachonho yaw roro. Kporin komo mak nasî kicicitho yai kown̂e me. Ero wa nasî Noro.

10 Ero yinhîrî Kporin komo takî tî nîmtapowakn̂e xa hara ootî imo yakro. Ero ke Xonas tak tî narîrkekn̂e roowo pona hara. Ero wa xakn̂e Xonas.