1-2 Ero yinhîrî Xonasî yakro tak nîmtapowakn̂e xa hara Kporin komo. On wara kekn̂e yîwya, Taa, Xonas, etoko tak ha ewto imo pona Ninipe pona. Îito awexitaw omtapotarî tak wekatîmyas awya. Ero ekatîmko iitono komo ya, kekn̂e.

3 Ero ke Kporin komo mtapotarî tak n̂ewehcakn̂e Xonas. Ninipe pona tak cekn̂e. Ewto imo xa mîn xakn̂e Ninipe. Ewto po kexitaw 3 kaamo tîhcexe pataw ewto pore ero poi cepatakaxi ro hara.

4 Ero pona tak cekn̂e Xonas. Cewn̂e kaamo ka cekn̂e Kaanî mtapotarî cekatîmro. On wara kekn̂e, 40 ro enmapuche tak men N̂in̂ipe pono komo waparî mokyaxe. Awar̂mexe so okwe, kekn̂e roro tî.

5 Ero yipu yentache, Kaanî mtapotarî tak n̂ewehcatken̂e Ninipe pono komo. On wara tî ketken̂e, Eseresmara ka cehcerî, ketken̂e tî. Kumixitho marha namruyatken̂e tponon me so. Ero warai namruyatken̂e poritomo me cehsom komo, kar̂pamxan me cehsom komo marha, ahnoro mak.

6 Ero yinhîrî takî tî Xonasî mtapotachonho n̂encekn̂e kayaritomo. Ero ke tapon poi takî tî nawomyakn̂e, kayaritomo ponon tî mohkekn̂e, kumixitho tî namruyakn̂e. Wemronho cheka takî tî n̂eremekn̂e.

7 Ero yinhîrî tmaywen komo yîtwermacho poko takî tî nîmtapowakn̂e. Ero wa kacho tî nakpayakn̂e Ninipe pono ya, miyan komo ya rma. On wara kekn̂e yîwya so, Omaywen komo, on wara wîîkes awya so, ow xa akayaritomon komo wîîkesî, antomano rîn̂e komo marha kexe, Eseresmara ro makî ka ehcoko, tuuna marha erîhra ehcoko. Ero wa xa marha ciicoko awoh komo, paaka komo, oper̂a komo, eseresmara xa marha n̂ehcowpe.

8 Kumixitho tak amrucoko aponon komo me. Ero yipu xa marha awoh komo mkahsî ciicoko. Kaan yakro tak amtapotacoko ahnoro cerewre kîpînîn yaw so ehtopo poko. Kicicme awehtoponhîrî komo marha ahsîpînkacoko. Awesetapacho komo marha ahsîpînkacoko.

9 Anarimaw kîpînîn yaw so tak na nai Kaan. N̂etîrwoxinke tak na kwaihkara so rma, kekn̂e tî. Ero wara tî tmaywen komo panatanmekyakn̂e Ninipe pono komo kayaritomon.

10 Ero ke ero wa exirî komo takî tî n̂een̂akn̂e Kaan. Kicicme ehtoponhîrî komo yahsîpînkacho tî n̂een̂akn̂e. Ero ke takî tî yîpînîn yaw so xakn̂e. Tîmtapotachonhîrî tak nowyakn̂e. Waparî komo yekpora rma tî xakn̂e. Ero wa tî xakn̂e Kaan.