Taa, ero wa enîche Xonasî ya, Kica, kekn̂e takî. Nîrwonakn̂e okwe.

2 Ero ke Kporin komo yakro tak tî nîmtapowakn̂e. On wara tî kekn̂e yîwya, Apa kah yawno, ero wara rma wa wîîkekn̂e apoko meye rma ka oyexitaw oyeken po rma. Kîpînîn yawno ro mak Mîkro okwe, wîîkekn̂e apoko. Wakreno ciin̂e ro marha mîk ha, wîîkekn̂e. Yamoro cetîrwonmesom Mîk ha, etîxatî ro xa. Yîwîrîmano wiir̂asî, kan̂enhîrî yîwîrîmano cirihra rma nasî, wîîkekn̂e apoko ha. Ero ke kemahciyakn̂e, Tahsisi pona owto xe wîxakn̂e.

3 Ero ke on wara tak wîîkes awya Apa, ow tak waihkakî. Wara n̂he tko wasî owaipuche. Ahwora men wasî waipîra rma oyexitaw, kekn̂e tî. Ero wa tî kekn̂e Xonas Kporin komo ya.

4 On wara tko Kporin komo n̂eyukyakn̂e, Ai, Xonas, ahce kacho mîrwona kica? Kir̂wan̂he ma re nai arwonîmtopo awya? kekn̂e tî yîwya.

5 Ero yinhîrî tak ewto poi cekn̂e Xonas resce yaw roro. Iito tak tîmîn cik n̂iir̂akn̂e pawxi matko warai makî. Ero yekatî yaw tak n̂eremekn̂e ewto yentome en̂exa. N̂examro waparî komo kyam na mokya. Mokuhra katî wa nai ha? Wensî ika, kekn̂e tî.

6 Ero yimaw tak tî urutu yatî natîkrekn̂e Kporin komo rma. Xonas mîn tî nahruyakn̂e. Yîhtîpîrî yawarparecho mîn natîkrekn̂e Kaan cexpore n̂he tak ehtome Xonas. Omîn tan ham okre, kekn̂e tî Xonas urutu yarî poko.

7 Ero yinhîrî kokmamyakn̂e xa hara. Enmaporo tak orko mak hara tî n̂ekpekn̂e Kaan urutu yatî yîmîtkoton̂e okwe. Ero ke naawaiyakn̂e tak okwe urutu yatîtho pen.

8 Kaamo yawomuche tak ocowo n̂ekmexpekn̂e hara Kaan resce n̂ixan. Ocorono xa mîn xakn̂e oco ocowo, karitî marha. Xonas pen tîpîrî takî tî n̂ipikekn̂e oco kaamo. Ero ke kar̂pera tak xakn̂e. Ero yimaw twaipu xe xa tak tî xakn̂e. On wara xa hara tî kekn̂e, Wara n̂he tak wasî owaipuche. Ahwora ro mak wasî waipîra oyexitaw, kekn̂e okwe.

9 On wara tko kekn̂e Kaan yîwya, Ai, Xonas, Yaaro ma re mîrwona urutu yatî poyero? kekn̂e tî. Nhnk, yaaro xa kîrwonas ha. Owairî me rma wa kîrwonasî kica, kekn̂e tî Xonas kopi.

10 On wara tko Kporin komo n̂eyukyakn̂e, Ai ha, an̂irithîrî pîn mîn n̂eexi urutu yatî, anatîrî pîn marha mîn n̂eexi. Yohno ro mak natîhtai cewn̂e ro kokmamrî mak. Cewn̂e ro kokmamyataw xa hara waihye tak.

11 Ero ke Ninipe pono komo pînîn yawra ma re wai awya ewto imo pono komo pînîn yawra? Merpono pîn mîkyam ewto imo pono komo, 120.000 kacho yopo n̂he. Camkîno tko mîkyam on pono komo. Ahn̂i xa nai kaari oyamorî, ahn̂i xa nai poowa hara oyamorî awya, ketaw yîwya so camkîno mak mîkyam okwe. Mer̂pora marha nas iyoh komo. Noro yipu komo pînîn yawra ma re wai awya? kekn̂e tî. Ero wa tî kekn̂e Kporin komo Xonas ya. Ero wa mak kekn̂e.