Taa, Obacias ow ha. On̂enîtho tan wekatîmyas awya so. On wara kesî Kporin komo Kaan Eton pono komo poko. Noro mtapotarî amna n̂encekn̂e n̂examro poko. On wara amna n̂encekn̂e, tmaywen tî n̂en̂epekn̂e Noro mîk hak rowon pono komo cheka tîmtapotarî yekatîmn̂e. On wara tî kamexpekn̂e yîwya so, Amohcoko amyamro Eton pono komo waparî me, kamexpekn̂e.

2 Ai, Eton pono komo, on wara wîîkes awya so, asak makno me tak kiir̂axe so anarî rowon pono komo xawyakan me. N̂examro nîwîrîyakarî me tak maxe.

3 Anarî komo yopono me mesehtînoyatken̂e okwe. Ero warai me awesehtînotopo komo rma awemîknoyatken̂e so okwe. Toopu imo yewtarî nasî aweken komo me. Kawno po rma nas amîn komo îh po. On wara mîîkexe aropotaw so, Onoke ma re kar̂metu so roowo pona hara? mîîkexe.

4 Anarimaw na metmînmetu yaimo wara rma. Anarimaw xa na metmînmetu xir̂ko cheka rma. En̂exa rma tko kenîhcexe so kr̂a, kesî Kporin komo.

5 Ahce wa awir̂atu so cen̂epan̂em komo kosope tmokyataw so ahyaka so? Awîrîmacho komo xa awepor̂axe so men okwe. Cen̂epan̂em komo mokuche ahyaka so atî wicakî awemyawnonhîrî komo naar̂atu? Cecenarî so mak naar̂axe. Ahce wa natu uupa yeperîrî yenmekn̂e komo ahyaka so mokuche? Nînomyaxe rma eperîthîrî cik wahra mak.

6 Esau yepamtho komo yemyawnonho penî tko naatîkexe ro mak okwe. Ceyamso rma re nasî anarî mko cepethîkem ha. Ero yipu rma tko n̂epor̂axe aatome okwe.

7 Anarme tak naxe awakrononhîrî komo rma, Cetkurunpecerî, kan̂enho kom ha. Awen̂epexe so tak arowon komo yemyatkoso. Cetkurunpesom me cehcerî, kan̂enho komo rma awemîknoyaxe so tak okwe, awar̂mexe so okwe. Awru tokn̂enhîrî komo rma n̂iir̂axe awemcinotopo komo warai. Ero yenîhra rma tko maxe okwe.

8 On wara marha kesî Kporin komo, Ero kaamo po rma tak Eton pono pen komo waihkesî takîhsom pen komo rma. Esau yepamtho yîpîn pononho pen komo mîkyam yuhnari yîhtînon̂enho pen komo. Noro yipu pen komo Ow waihkesî.

9 Teman pono komo amyamro, on wara tak naxe asowtatun komo ero yimaw, n̂eraswaxe ro mak tak okwe. Ahnoro Esau yepamtho pen waihyaxe îh pono pen kom ha. Waihkexe waparî komo.

10 Awakno Xako yepamtho komo mîwaiketken̂e okwe. Ero poyero mîhyapamyaxe ro mak tak okwe. Awaparî komo awaikexe so epamra ro mak tak awehtome so okwe.

11 Pahxa Ixaw Yana komo waparî mokyatken̂e. Ero kaamo po mooxe n̂he mecececetken̂e. N̂examro sowtatun pen komo naar̂atken̂e anarî yana komo. Anarî rowon pono komo tak n̂ewomyatken̂e ewto pona n̂examro pen metatan yaka. Men̂ekacho nar̂metken̂e Xerusaren yemyawnonho yahsîtome tîwya so. Ero yimaw Xerusaren pono waparî komo yakronoman̂e wara rma mîxatken̂e amyamro hara kica.

12 Awakno pen yepamtho pen komo yîwîrîyakara ro mak cexpore xakn̂e ahwokacho chew xa exitaw so. Ero wa ham okre, kahra ro mak cexpore xakn̂e Xuta yepamtho pen komo waihketaw waapa ya. N̂examro pen iyoponkan̂e me yîmtapotara ro mak cexpore xakn̂e n̂examro yahwokacho yimaw.

13 Oyanan pen komo waihyataw n̂examro yewton pona tohra ro mak cexpore xakn̂e. Ahwoketaw so xa, Awya kr̂a, kahra ro mak cexpore xakn̂e, n̂examro yemyawnonho yarîhra marha cexpore xakn̂e n̂examro pen yetwîrîmetaw.

14 N̂examro yesamarî motaw mecececetken̂e kica. Emahcixapu komo paraxkachome iito mecececetken̂e. Waipîn komo rma mahsîyatken̂e, waparî komo ya anîmrî komo me kica. Ero wa exihra ro mak cexpore xakn̂e amyamro.

15 Pahnoke tak men nasî Kporin komo kamon mîk hak rowon pono pen komo yîwîrîmacho kopi. Pahxa yîwîrîmano miir̂atken̂e amyamro. Ero ke ero wa xa marha awîrîmexe so amyamro hara anarî komo. N̂examro pen yîwîrîmachonho tak n̂etîramesî apona so hara.

16 Wooku meer̂atken̂e amyamro oyîpînî ro po, ero wa xa marha mîk hak rowon pono komo n̂eer̂axe hara. Pahkî n̂eer̂axe oko. Ero yinhîrî n̂ehcamnoyaxe ro mak tak okwe.

17 Tukurui so rma tko naxe amn̂e Siaw Yîpîn pono komo. Kîr̂wanî ro me xa tak naxe ero yimaw. Tîrowonî ro komo tak nahsîyaxe Xako yepamtho komo ero yimaw.

18 Wehto wara rma naxe Xako yepamtho komo. Wehto wara xa marha naxe Xose yepamtho kom hara. Puruma yeputho wara reha naxe Esau yepamtho komo. N̂examro pen nakn̂iyaxe Ixaw Yana komo exihra cehso ro okwe. Etîmtoxapu komo exihra ro mak tak naxe Esau yepamtho, kesî. Ero wara kesî Kporin komo.

19 Suu n̂ixan komo tak nahsîyaxe Esau yepamtho pen komo yîpîntho. Woskara pono komo tak nahsîyaxe Piristew pen komo rowontho. Eprain yepamtho komo woskaran marha nahsîyaxe, Samaria woskaran marha. Benxamin yepamtho komo marha tak nahsîyaxe Xireace tîrowon komo me.

20 On wara naxe Ixaw Yana komo, waapa narîthonhîrî komo, Kanan pen komo rowontho tak nahsîyaxe miyanî rma Sarepace pona rorono. On wara marha naxe Xerusaren pono, waapa narîthonhîrî komo marha Sarepace pono kom ha, suu n̂ixanî mko nahsîyaxe ewto mko ha.

21 Yukurunpeno rin̂e komo tak mokyaxe Siaw Yîpîn pona. Esau Yîpîn pononho komo yen̂ekan̂e me tak naxe. Kporin komo xa nasî kayaritomo me xa tak. Ero wa nas amn̂e.