Taa, Amosî mtapotarî tan mewresî an̂enîrî komo. Oper̂a ke tokye so xatken̂e Tekoa pono komo. N̂examro yakrono rma mîk xakn̂e Amos. Ixaw Yana komo pokono taki tî n̂een̂akn̂e noro Kaan n̂enpotho. Ero yimaw Usia xakn̂e Xuta komo kayaritomon me, Xeroboaw xakn̂e Ixaw Yana komo kayaritomon me hara, Xoas pen mumutho ha. Asakî cimn̂ipu rma tî ka xakn̂e roowo yesewsîtopo. Ero yimaw tî Ixaw Yana pokono n̂een̂akn̂e Kaan n̂enpotho. Ero rma n̂ekatîmyakn̂e.

2 On wara kekn̂e, Mayanasî tak Kporin komo reaw wara. Siaw po rma ero wara kesî. Tarai wara ro mak kesî Noro Xerusaren po rma. Tîwrataxmu wara tak nasî woskara mko, oper̂a yosom yoku yetînamacho. Taatupe tak nasî naatî Kahmeru Yîpîn meretwono.

3 On wara kesî Kporin komo, Osorwaw nasî Tamasku pono komo yehtoponho, kicicme ehtoponhîrî komo. 4 xa matko nasî ero wara ehtoponhîrî komo. Ero poyero n̂examro yemetanmecho wahkotora wasî. On wara xatken̂e n̂examro, Xireace pono pen komo n̂emetanmekyatken̂e ro mak okwe. Puruma yîpîpîtîkacho warai ke rma n̂examro pen n̂emetanmekyatken̂e, pehu ciixapu warai ke oko. Ero warai ke Xiriace pono komo n̂emetanmekyatken̂e okwe.

4 Ero ke wehto men war̂mesî Asaew mîntho pona. Ben-Atace n̂irpotho marha wakn̂iyasî kayaritomo mîntho mko.

5 Ewto metatantho yecetî marha wîhkocesî, Tamasku metatantho yecetî pen ha. Apen Woskaran pononho pen komo marha waihkesî. Bece Eten pononho pen marha waihkesî kayaritomo yamoyin ke cemyarkem ha. Miya kr̂a tak Siria pono pen komo naar̂axe waapa komo Kiri pona, kesî Kporin komo.

6 On wara marha kesî Kporin komo, Osorwaw nasî Kasa pono komo yehtoponho hara, kicicme ehtoponhîrî komo. 4 me xa matko nasî ero wara ehtoponhîrî komo. Ero poyero n̂examro yemetanmecho wahkotora wasî. Ahnoro oyanan komo nahsîyatken̂e, napomiyatken̂e marha. N̂examro pen tak nîmyatken̂e Eton pono komo ya epethîrî pona so.

7 Ero poyero wehto war̂mesî Kasa wacan pona. Iitono pen komo mîntho mko wakn̂iyasî kayaritomo mîntho.

8 Astoce pononho pen komo marha Ow waihkesî. Askaron pono komo kayaritomon pen marha waihkesî. Ekron pononho pen komo yemetanmekn̂e me marha wasî. Piristew pen komo yakwenho waihtîkes okwe, kesî Kporin komo.

9 On wara marha kesî Kporin komo, Osorwaw nasî Ciru pono komo yehtoponho hara, kicicme ehtoponhîrî komo. 4 xa matko nasî ero wara ehtoponhîrî komo. Ero poyero n̂examro yemetanmecho wahkotora wasî. N̂examro marha oyanan pen komo nahsîyatken̂e, napomiyatken̂e marha. Apomixapu komo tak nîmyatken̂e Eton pono komo ya epethîrî pona so. Etakno me re cesencerî, kachonho ponarora ro mak xatken̂e okwe.

10 Ero poyero wehto war̂mesî Ciru wacan pona. Iitono pen mîntho marha wakn̂iyasî kayaritomo pen mîntho.

11 On wara marha kesî Kporin komo, Osorwaw nas Eton pono komo yehtoponho hara, kicicme ehtoponhîrî komo. 4 xa tko nasî ero wara ehtoponhîrî komo. Ero poyero n̂examro yemetanmecho wahkotora wasî. Takno pen yepamtho komo wenari rma cetken̂e paraxkaxi. Yîpînîn yaw so exihra ro mak xatken̂e okwe. Miya roro nîrwonatken̂e n̂examro pen poko. Etîrwoxinkan me ro mak xatken̂e okwe.

12 Ero poyero wehto war̂mesî Teman pona. Kayaritomo mîntho penî mko n̂ecakyas okwe Bosra pononho pen.

13 On wara marha kesî Kporin komo, Osorwaw nas Amonita komo yehtoponho hara, kicicme ehtoponhîrî komo. 4 xa matko nasî ero wara ehtoponhîrî komo. Ero poyero n̂examro yemetanmecho wahkotora wasî. Wooxam pen komo wetîhketken̂e oko tarkem pen komo. Ero wa xatken̂e Xireace pono pen komo poko tîrowon komo yenmamnotome mak kica.

14 Ero poyero wehto war̂mesî Haba wacan pona. N̂examro kayaritomon pen mîntho wakn̂iyas okwe, iitononhîrî pen. Ero yimaw rma yuu yuu kexe waapa komo etar̂mano ritopo me enmayataw. Ocowo imo me n̂enmayas ero po cetaporisom ha.

15 N̂examro kayaritomonînho pen tak naar̂axe waapa komo anarî rowon pona. Noro maywenînho pen komo marha naar̂axe antomano rin̂enho pen komo rma okwe, kesî Kporin komo. Ero wara kesî Kporin komo n̂examro poko.