On wara marha kesî Kporin komo, Osorwaw nasî Moabita komo yehtoponho hara, kicicme ehtoponhîrî komo. 4 xa matko nasî kicicme ehtoponhîrî komo. Ero poyero n̂examro yemetanmecho wahkotora wasî. Eton pono komo kayaritomonînho pen yochotho nakn̂itîkekn̂e ro mak kaw me cehso ro kica.

2 Ero ke wehto war̂mesî Moabita pen komo cheka. Kayaritomo mîntho mko n̂ecakyasî Kerioce pononho pen. Waihyaxe tak Moabita pen komo etar̂mano ritopo chew, yuu yuu kacho chew rma, tuu kacho chew marha.

3 En̂ekano rin̂enho pen marha waihkesî iitononhîrî pen. Akro rma iitononhîrî yantoman̂enho pen komo waihketîkesî, kesî Kporin komo.

4 On wara marha kesî Kporin komo, Osorwaw nasî Xuta yepamtho komo yehtoponho hara, kicicme ehtoponhîrî komo. 4 xa matko nasî ero wara ehtoponhîrî komo. Ero poyero n̂examro yemetanmecho wahkotora wasî. Aporin komo ya tpanatanmetopo komo nanwekyatken̂e kica. Ero wa men ehcoko, kacho yewetîra xatken̂e kica. Cemaro mak n̂ewehcatken̂e kica anarme cehtome so, tporin pen komo mtapotachonho mak n̂ewehcatken̂e kica.

5 Ero poyero wehto war̂mesî Xuta komo cheka. Kayaritomo mîntho mko n̂ecakyasî Xerusaren pono mko pen.

6 On wara marha kesî Kporin komo, Osorwaw nas Ixaw Yana komo yehtoponho hara, kicicme ehtoponhîrî komo. 4 xa matko nasî kicicme ehtoponhîrî komo. Ero poyero n̂examro yemetanmecho wahkotora wasî. Kir̂wan komo nîmyaxe tooto komo ya epethîrî pona so, prata pona. Yupurantamnî komo marha nîmyaxe epethîrî pona, tîhtarî komo pona mak kica.

7 Anarimaw nasî roowo yupurantamnî komo tîpîrî po. Ero tow xe rma re naxe n̂examro kica, cerekayakayan̂em wara naxe ero tow xe. Yukurumîkîra cehsom komo n̂emetanmekyaxe okwe. Noro re poko rma nasî yîîm, yumumuru marha kica. Ero wara naxe emasî poko. Ero wa exirî ke so oyosotî yîwîrîyakamexpon̂e me naxe kica. Kir̂wanî ro mîn oyosotî.

8 Tîmsom yapon mîtwo so n̂etîrapexe tooto komo ponon pona, Onîmîtho men epemak amn̂e, kachonho pona rma kica. Kawaxiyem marha n̂eer̂axe ponaro cehtopo komo mîn yaw so kica. Panatanmekno ritopo yanwetoponho yepetho me ahsîxapu n̂eer̂axe kica.

9 On warai tko Ow ha, Amohew pen komo yar̂mapon̂enho rma Ow yîwya so. Kawno komo ro mak mîkyam xatken̂e kopi Amohew komo. Setru yepu waraitho mak mîkyam kopi kawno. Karitî komo marha mîkyam xatken̂e kahpar̂u yepu warai komo. Wara rma noro yipu pen komo yeperîri warai war̂mai, yimicin warai pen komo marha war̂mai.

10 Exitu poi awekn̂enhîrî komo marha Ow. Axawa imo pore marha kaar̂atken̂e so 40 cimn̂ipu. Ero yinhîrî Amohew pen komo rowontho tak wîmye awya so.

11 Weronomano rin̂e me marha wiir̂akn̂e amumuru komo anarî komo mak. Nasirew me wiir̂akn̂e anarî kom hara, kar̂pamxan komo. Ahce wa katî Ow mencetu amyamro Ixaw Yana komo, yaarono mera katî Ow mencetu? Ero wara wîîkes Ow Aporin komo.

12 On wara tko mîxatken̂e, amyamro, kawaxiyem merpetken̂e kica Nasirew me cehsom komo ya. On wara marha mîîketken̂e kica weronomano rin̂e komo ya, Weronomano cirihra ro mak tak esko kica, mîîketken̂e okwe.

13 Ero poyero awapikmon̂e komo wara xa tak wasî. Ahce na napikme tarara puruma yeperîrî ke copoyem, ero wara awapikmon̂e komo wara wasî.

14 Kar̂pe tîtosomînhîrî komo kar̂pe tohra tak naxe okwe. Ekaritora marha naxe karitî komo rma ha re. Twaparî me mohxapu komo yopo exihra marha naxe sowtatu komo rma okwe.

15 Twaparî komo yopo exihra naxe waiwî yar̂man̂e komo. Kar̂pe tîtosom me rma re naxe anarî komo. Noro yipu komo rma tîwîrîmacho komo yai emahcira naxe okwe. Kawaru mkawno komo meero emahcira naxe okwe.

16 Kîî kan̂e pîn me rma re naxe anarî komo, sowtatu komo. Noro yipu komo rma tko n̂emahciyaxe ero kaamo po. Ponomra so mak n̂emahciyaxe okwe, kesî. Ero wa kesî Aporin komo.