On wara marha kekn̂e Kporin komo apoko so, kicicme awehtoponhîrî komo poko. Entacoko ka, on wara kekn̂e, Ai, Ixaw Yana komo amyamro, kekyatken̂e so Exitu poi. Kicicme tko mîxatken̂e amyamro ahnoro okwe.

2 Mer̂pora naxe noro re cehsom komo, roowo yakwerî poko hakno komo. Amyamro makî tko kmen̂eketken̂e so oyanan komo me. Ero me amen̂ekarî ke so tak kpanarexe so. Kicicme awehtoponhîrî komo yepetho me rma kemetanmekyaxe so.

3 Iito re ma re cetar̂atu iito re esehtînopîra kexitaw so?

4 Ahce wa nai reaw awya so, mayana ma re comota chew otowara rma cexitaw? Cewtarî yaw cexitaw reaw, kar̂pamxan, mayana ha ma re totowarî yahsîra cexitaw?

5 Mîîye yaka ma re n̂emciya torowo roowo pona yaka, exihra ro mak exitaw mîîye? Ahce wa nai kiiwi etuntoxapu? Nawomya ma re kiiwi yahsîra exitaw ootî?

6 Ahce wa natu ewto pono komo tuu kacho yentache, Kopi, kahra ma re natu awya so? Esemetanmekyataw so ewto pono komo Kporin komo n̂ekmexpotho mîn okwe esemetanmetopo komo, kapore xa nasî.

7 Ahce na yekpora ro mak was Ow ha Aporin komo ekatîmra ka oyexitaw oyanton komo ya. Wekatîmyasî rma wa ero yipu aweronoman̂e komo ya.

8 Mayanmo reaw kopi. Ero ke erasîra ma re natu tooto komo awya so? Kporin komo rma n̂ekatîmye kîwya so centamexposom. Ero ke weronomano cirihra ma re tat ha?

9 Omtapotarî men ekatîmcoko Astoce pono komo ya, kayaritomo mîn yawno komo ya. Omtapotarî marha ekatîmcoko Exitu pono komo ya, kayaritomo mîn yawno komo ya xa hara. On wara kasko yîwya so, Ai, tooto komo, esenmecoko miya îh pona, Samaria yîpîn pona. Iito awexitaw so Samaria pono komo yehtopo encoko. Etpoko ro mak ehtopo komo encoko, tpoyino komo yemetanmetopo marha. Ero wara n̂examro yehtopo entatko.

10 Takîhso kehtopo poko camkîno komo mak n̂examro okwe, kesî Kporin komo. Kayaritomo mîn yaka rma n̂enmekyaxe tînwaikathîrî pen komo yemyawnonho, tînwîrîmathîrî pen komo yemyawnonho marha.

11 Ero ke on wara marha kesî Kporin komo Kaan, Awaparî komo men mokyaxe amn̂e. Arowon komo poko hak n̂etar̂axe. Asowtatun komo mîntho n̂ixkexe okwe. Akayaritomon komo mîntho yawnonho marha naatîkexe, kesî.

12 On wara marha kesî Kporin komo awya so, On wara na natu anarimaw oper̂a yosom komo, iyokuthîrî pen na n̂eske reaw. Ero yinhîrî reaw pen tak na waihke hara osomunhîrî. Yîmtai na nowya tookuthîrî petîtho asakî. Anarimaw panathîrî raconho mak nowya okwe. Ero wa xa marha n̂etîmcexe amn̂e Samaria pono pen komo. N̂examro yakro rma n̂etîmce anarimaw kamatho kotonho ciki, aponhîrî komo raconho marha na anarimaw. Ero wara mak n̂etîmcetu amn̂e Samaria pono komo amn̂e.

13-14 On wara marha kesî Kporin komo Kaan owya, Kantoman̂e ro ha, Ai Amos, omtapotarî ka entakî. Xako yepamtho komo yemetanmecho tan wekatîmyasî. Ero men ka entakî ekatîmtome tak yîwya so. Pahxaro tak Ixaw Yana komo wemetanmekyasî kicicme ehtoponhîrî komo yepetho me. Ero kaamo po rma anarî ro ya tîmsom yaponho penî kr̂a wakuhr̂apesî, Betew pononho. Paaka meretîtho marha n̂ehkocesî aponhîrî kanahtawnonho mko pen. Roowo pona mak n̂epîrkesî.

15 Mînînano marha kr̂a wixkesî cwotu yimaw yaw ehtoponhîrî komo, kaamo yimaw yaw ehtoponhîrî komo marha. Anarî n̂exixkesî mîîmotho mahpin ke ciixapunhîrî pen. Mîîmo imo penî mko n̂ehcamnoyas okwe kesî Kporin komo. Ero wa men kesî Noro.