On wara marha kesî Kporin komo awya so, Ai, paaka woosî warai komo amyamro, Basan pono komo warai. Samaria Yîpîn pono komo amyamro wooxam komo, omtapotarî ka entacoko. Yupurantamnî komo mapickexe epeman me ro mak okwe. Emyawnomnî komo yemyawnonho maatîkexe kica yîhyai so. On wara mîîkexe aan̂o komo ya, Kawaxiyem ka eeko kwokru, mîîkexe.

2 Apokono komo rma tko n̂ekatîmyakn̂e Kporin komo, yaarono xa ha. Yaaro xa wasî kir̂wanî ro me ero wa xa marha yaarono tan wekatîmyas awya so, kekn̂e. Awatopo komo me men n̂enmayasî pahxaro. Kiiwi warai ke rma awar̂axe so Noro oko. Awepamthîrî pen komo marha naar̂asî kiiwi warai ke oko, yîmtoxapu pen komo.

3 Pataw tak mîîcexe ewto poi. Cetawkaxi tak nas ewto wacan. Ero yaw rma mîîcexe awkaxapu yaro. Miya kr̂a awen̂epexe so Ahmon wece, kesî Kporin komo awya so.

4 On wara marha kesî Noro, Amohcoko rma Betew pona. Iito tak oyanwekn̂e me ehcoko. Xiwkaw pona marha amohcoko apanatanmetopo komo yanweso emapona roro. Enmar̂atîxera ehcoko awokuthîrî komo pun tîmsom me. Asorwaw ro enmapuche roro marha ehcoko awemyawno komo raconho, cisimu me tîmsom.

5 Puruma marha akn̂icoko wahrututpamnoxapu, Kir̂wan̂he mai ham okre, kacho ha. Apoyino komo an̂ihcoko ero yipu tîmyataw awya so, awanme ro so tîmsom tîmyataw ha. Tpoxwe ro mak nasî ero yipu poko awehtopo komo awya so, Ixaw Yana komo ya, kesî Aporin komo Kaan awya so.

6 On wara marha kesî Noro awya so, On wara cma re ka wîxakn̂e apoko so, yusmumnî me ayorî komo wiir̂akn̂e ahnoro ewto pono komo. Iyurumnî me marha kiir̂atken̂e so amyamro ewto pono komo. Wara rma ohyaka mokuhra rma mîxatken̂e okwe, kesî Kporin komo awya so.

7 Tuuna marha ekmexpora wîxakn̂e amararîn komo yatîkren̂e. Osorwaw nuun̂i ka xakn̂e anatîrî komo yeperîrî yenmetopo ero yimaw rma tuuna yekmexpora wîxakn̂e. Anarimaw so anarî pona tuuna wekmexpekn̂e, ewto pona. Anarî pona ekmexpora wîxakn̂e hara. Anarî mararîn pona mokuhra xakn̂e tuuna okwe. Ero ke thakwa naawaiyakn̂e iitono naatî pen okwe.

8 Tutunarî komo ka cetken̂e apoyino komo anarî ewto pona. Ero wa cetken̂e 2 ewto pono komo, 3 ewto pono komo anarimaw. Epîrkaporono wara mak cetken̂e okwe. Wahra so makî tko nanîmyatken̂e tutunarî komo cesemetanmeso okwe. Wara rma owece etaknamara rma mîxatken̂e okwe, kesî Kporin komo.

9 Emapona roro anatîrî komo yipin̂on̂e wekmexpekn̂e. Anatîrî komo yeperîrî payarecho tak wekmexpekn̂e, naatî yeper̂an marha okwe. Anarimaw so tahwore natîkwakn̂e anatîrî komo, uupa yatî, piiku yepu, oripa yepu marha. Makaka warai tko mokyakn̂e yaarî yahn̂e hara okwe. Wara rma ohyaka xa hara mokuhra mîxatken̂e okwe.

10 Aweper̂an komo marha wekmexpekn̂e okwe, Exitu pono komo yeper̂an warai xa marha. Apoyinonhîrî pen komo marha waihkekn̂e, kar̂pamxan pen kom ha, kacipara imo ke Ow waihkekn̂e. Awokuthîrî komo marha Ow waihkekn̂e kawaru pen, anahsîthîrî komo rma. Okoputhîrî komo tak kowakn̂e ro mak awetarî komo yawno rma kica. Wara rma ohyaka xa hara mokuhra mîxatken̂e okwe, kesî Kporin komo awya so.

11 Awewton komo marha wakn̂iyakn̂e anarî komo mak. Sotoma pen wara xa marha wakn̂iyakn̂e, Komoha pen wara marha. Wehto kametho wara rma mîxatken̂e, wehto ywai towxapu wara. Ero wara mîxatken̂e okwe. Wara rma oyaka xa hara mokuhra ro mak mîxatken̂e okwe, kesî Kporin komo awya so.

12 Ero ke ero wara rma xa hara kemetanmekyaxe so amn̂e. Ai, Ixaw Yana komo amyamro, on wara wîîkes awya so, Ponaro awehtopo komo tak meen̂axe amn̂e. Ero ke tak etakir̂wamcoko ha men kopi.

13 On warai Mîkro awemetanmekn̂e komo, îîpî ciin̂e Mîkî capahno me ehxapunhîrî, ocowo yekmexpon̂e marha Mîkî, cesehtînotopo yîhtînomexpon̂e marha kîwya so. Saa kachonho yawarparen̂e marha Mîkî. Îîpî meretwo roro cetarisom marha, roowo poko hakno komo pore cetarisom ha. Kporin komo Kaan xa Mîkî, Noro yosotî, kantoman̂e ro, ero wa nasî Noro yosotî.