Ai, Ixaw Yana komo amyamro. Apînîn yaw so kîwracesî. Ero wara owratacho tan wekatîmyasî. Ero ke omtapotarî ka entacoko.

2 On wara naxe Ixaw Yana komo, emasî wara naxe epîrkaxapu wara. Awomnî me ro mak tak n̂epîrkai okwe. Tîrapono wara mak nasî tîrowon po. Akronomra ro mak nas iito, anîmn̂e exihra ro mak nasî.

3 On wara kesî Kporin komo apoko so, Awewton pono komo ka cexe kîrkomo sowtatu me. Anarî ewto pono komo cexe 1.000 sowtatu me. 100 makî tko mokyaxe hara etîmtoxapu kom hara. Anarî ewto pono komo cexe 100. 10 mak mokyaxe hara etîmtoxapu kom hara. Ero wicakî so mak naxe Ixaw Yana komo, etîmtoxapu komo amn̂e.

4 On wara marha kesî Kporin komo awya so Ixaw Yana komo ya, Ow epocoko waipîra awehtome so.

5 Betew pona tohra ehcoko awakronoman̂e komo yeposo. Xiwkaw pona marha tohra ehcoko, Behseba pona marha tohra ehcoko. Xiwkaw pono pen komo tak naar̂axe waapa komo anarî pona roowo pona. N̂ehcamnoyasî tak amn̂e Betew, ewto pen ha.

6 Kporin komo mak xa epocoko waipîn me awehtome so. Noro ponarora rma awexitaw so Xose pen yepamtho yakn̂in̂e wara tak nasî Noro. Wehto yeihkan̂e exihra ro ma tak nasî Betew pono okwe.

7 On warai amyamro okwe, takîhso ciino rin̂e pîn komo amyamro. Ahwokano rin̂e me mak maxe tohnaw mak okwe. Kir̂wan̂he kehtopo yar̂man̂e me mak maxe roowo pona ar̂man̂e wara okwe.

8 On warai reha Mîk Kporin kom hara, xir̂ko imo yakîhton̂enho Mîk, yaipî yohyarî yakîhton̂enho marha. Awarpanawnonhîrî komo yenmanokan̂e marha Mîkî. Anarimaw so katpanînhîrî nawarpares hara kosope cehso ro. Tuuna marha nan̂ikyasî Noro tuuna imo kwawnonho. Ero tak nukmamyasî roowo pore miyan pore rma. Kporin komo xa Mîk ha Noro yosotî.

9 Karitî komo yîwîrîmacho yekmexpon̂e marha Mîkî. Ewto pen yakn̂in̂e marha Mîkî, twacayem yakn̂in̂e rma.

10 Anarî komo rma re kicicme ehtopo komo n̂ekatîmyasî roro po rma. Noro yipu komo xera ro mak naxe iitono komo. Takîhso tîmtapotaxmu komo yîwîrîyakan̂e marha mîkyam okwe.

11 Emyawnomnî komo yapikn̂e wara marha maxe okwe. On wara mîîkexe yîwya so, Ehcoko ha men puruma anaputhîrî komo raconho rma kayaritomo ya tîmsom, mîîkexe kica. Ero ke on wara men maxe amn̂e ero wa kan̂enho komo, amîn komo rma re miir̂atken̂e toopu ke twacayem. Ero yipu yaw rma tko exihra tak maxe amn̂e. Anatîrî komo marha re miir̂atken̂e uupa yatî tpoxwe cepetaxmu kom ha. Ero yipu yeperîrî yukun yerîhra marha maxe okwe.

12 Weenasî wa ha kicicme roro awehtoponhîrî komo. Kicicme xa mîxatken̂e emapona roro. Takîhsom yemetanmekn̂e komo amyamro okwe. Puranta marha mahsîyaxe kicicitho komo yen̂ekara awehtamci kom okwe. Emyawnomnî komo yemetanmekn̂e komo yen̂ekara marha maxe okwe.

13 Ero wa awexitaw so tîtken̂e mak naxe tweeno komo kicicme ro mak exirî ke so akayaritomon komo, en̂ekano rin̂e komo marha.

14 Kir̂wan̂he mak awexi xe tak ehcoko. Kicicme awehtoponhîrî komo poxunkacoko marha. Ero wara ehcoko waipîra so n̂he awehtome so. Ero wara awexitaw so tak awakronoman̂e komo me tak nasî Noro, Aporin komo, awantoman̂e ro kom ha. Noro nas amna yakronoman̂e me, mîîkexe tooto komo ya, ero wara rma tak nasî Noro ero yimaw.

15 Kicicme awehtoponhîrî komo xatî pîn me tak ehcoko, Kir̂wan̂he awehtoponhîrî komo xatî me tak ehcoko. Yaaro mak en̂ekano rin̂e me ehcoko. Ero wa awexitaw so tak apînîn yaw so na nai Aporin komo, awantoman̂e komo. Xose pen yepamtho pînîn yaw tak na nai, etîmtoxapu komo pînîn yaw ha.

16 Ero ke on wara kes hara Kporin komo awya so, kantoman̂e ro, Amn̂e tak tîwrataxmu komo naxe ahnoro esama yaw so. Okwe okwe, kexe tarara yesamarî yaw so. Amohcoko yîwrataxi, kexe mararî yosom komo ya, yaana me tîwrataxmu komo ya marha.

17 Uupa yatî chew so marha naxe tîwrataxmu komo. Ero wa nîwracexe achere so owtorî ke, kesî Kporin komo awya so.

18 On wara marha kesî Noro awya so, Cetwîrîmaxmu ro mak amyamro Aporin komo kamon yenî xatî komo. Ahce wa awehtome so Aporin komo kamon yenî xe mat ha? Awarpape men n̂enmayasî ero po, katpape enmapîra ro mak nas okwe.

19 On wara maxe amyamro ero kaamo yenî xatî komo, reaw na n̂een̂a cesetakaxmu, twece tmohsom n̂een̂a kopi. Ero ke n̂emahciya. Ero wa emahciyataw uhsu makîrha tak mokya hara noro wece. Anarimaw tîmîn yaka n̂ewomya tooto. N̂etamoyececesî iito twacan po. Ero wara cecececetaw okoyi tak namoyeske oko. Ero wara rma maxe amyamro Kporin komo kamon yenî xatî komo.

20 Awarpape ro mak tak men nasî Aporin komo kamon. Katpape exihnî me ro mak nasî. Awarpape ro mak nasî, katpape exihra ro mak okwe. Ero wa men nasî Aporin komo kamon.

21 On wara keen̂axe so, mahwowaxe ha re awahwotacho ro komo po so kaamo po. Ero wara awahwotacho komo xera ro mak tko wasî kica. Kicicme ro mak nas owya. Yînmîra ro mak wasî Kaan poko awesenmetopo komo.

22 Awokuthîrî komo punu rma re mekyaxe takn̂itîkaxmu me, puruma marha mekyaxe anatîrî komo yeperîrî. Owya tîmsom me rma re mekyaxe. Ero yipu tko ahsîra ro mak wasî. Anarimaw tupurukyem pun mekyaxe awokuthîrî komo pun owya tîmsom me, Aaxe xa was okre, kacho me tîmsom. Ero yipu ponarora ro makî tko was okwe.

23 Opanapickan̂e wara mak wences okwe awanorî komo. Arîhra tak ehcoko on̂entarî me. Waano me marha mîyorkexe ahpa. Ero wa iyorkacho yentara ro mak was okwe.

24 On wara xa matko ehcoko, yaaro mak ciino rin̂e me roro ehcoko. Eepu wara rma ciicoko ero wa awehtopo komo, porin eepu wara. Kir̂wanhe awehtopo komo ciicoko tuuna yaporî wara, apaipînî ro wara.

25 Ai, Ixaw pen yepamtho komo amyamro, on wara marha wîîkes awya so, ahce wa mîxatken̂e pahxa axawa imo po awexitaw so. Owya tîmsom ma re makn̂iyatken̂e awokuthîrî komo pun, anatîrî komo yeperîrî marha? 40 cimn̂ipu ero yipu makn̂iyatken̂e rma re, onoke ya tîmsom me mak ha tko na okwe.

26 Moroke mîn xa matko maar̂atken̂e akayaritomon mîn ha. Mîn hak mak maar̂atken̂e ciixaputho, ponaro awehtopo komo kica. Xir̂ko marha maar̂atken̂e ponaro awehtopo komo kuknon. Ero yipu miir̂atken̂e ponaro awehtopo kom ha.

27 Ero ke ken̂epexe so tak miya Tamasku mkaino pona. Mokuhnî me ken̂epexe so, wîîkes Ow aporin komo. Kaan, awantoman̂e ro komo, kacho Ow, oyosot ha, kesî Noro. Ero wara kes awya so.