On wara marha kesî Kporin komo awya so, Ai, Siaw pono komo amyamro, eserepokan komo ka amyamro, on wara wîîkes awya so, mîwaiyaxe men amn̂e. Ero wa xa marha maxe amyamro hara Samaria Yîpîn pona enîn̂e kom hara. Anarî rowon pono komo yopono rma re amyamro. Amtapotarî komo yentaxi mokyaxe Ixaw Yana komo. Awaikacho komo tko awepor̂axe so amn̂e.

2 On wara tak ehcoko, Kawn̂e pona etocoko. Itono komo encoko. En̂exa tak etocoko hara Amace yenso hara. Ewto imo xa mîn Amace. Ero yinhîrî Kace pona etocoko hara Piristew komo yewton pona. Kir̂wan̂he ma re matu n̂examro yopo? Porin me ma re xakn̂e yîrowon komo arowon komo yopo?

3 On wara mîîkexe amyamro, Pahkî exiche mak tak n̂enmaya tantono pen komo waihtopo me, mîîkexe. Pahnoke tko nasî waihkano ritopo awanme so rma okwe.

4 Kir̂wanî ro pona metîrapexe akaman komo pona. Erepanci yotho ke porokutoxapu mîn awetîrapotopo komo. Metîrapexe aweremacho komo pona marha. Kahn̂eru pun nasî awotî komo me awokuthîrî komo punu rma. Paaka xîkîtho pun marha nasî awotî komo me, tupurukyem pun.

5 Pioraw warai mîyorkexe. Anarmerpan warai makîhcexe raatî mko Tapi pen wara rma.

6 Uupa yukun meer̂axe parakwe yawno. Kir̂wanî ro ke marha mekapexe katî ke. Wara rma ahwokara rma maxe Xose yepamtho komo yîwîrîmacho poko okwe.

7 Ero ke yihcirî me awar̂axe so awaparî komo. Anarî roowo pona thakwa awar̂axe so okwe mokuhnî me hara. Ero yimaw awahwotacho komo me eseresmara tak maxe, awapon komo pona marha expotara tak maxe.

8 Ero ke apoko so nîmtapotai Aporin komo Kaan. Yaarono me ro mak nîmtapotai, cehtopo rma n̂etahce towîhnî me ro mak yîhtînomexpotome tîmtapotachonhîrî. On wara kekn̂e, On wara xa wîîkes Ow Aporin komo Kaan, mer̂pono pîn komo yantoman̂e, Kicicitho me ro mak nas owya Xako yepamtho yehcoyoponkacho. Yîmîn komo xera ro mak wasî cepethîkemu mko ha. Ero ke iitono komo war̂mapesî waapa komo ya. Ahnoro ero pono mko wîmyasî yîwya so.

9 Waapa mokyataw 10 na natu kîrkomo ero re yaw mîîmo yaw. Ero wa exitaw so n̂examro pen waihyaxe okwe.

10 Ero yinhîrî na mokya waihkaxa pen yananînho okoputhîrî yaaso. Naar̂a tak mîîmo yai akn̂itome. Iito rma exitaw tooto mîîmo yaw rma on wara kesî yîwya, Nai rma tooto yokoputho iito ahyaw? Exihra tak ha, kesî iitono. Ero yinhîrî on wara kes hara, Tîtken̂e mak esko. Kporin komo yetacira ro mak men cexpore nasî, kesî. Ero wa nîmtapowaxe amn̂e.

11 Awaparî komo nantomesî rma Kporin komo amînthîrî komo yakuhr̂apocho poko. Ero ke porin penî mko nakuhr̂apesî mîîmotho, wahrai penî mko marha.

12 Ahce wa kawaru nai awya so, kar̂pe ma re cee toh pore? Toopu porin ma re mîpometu mararî me, paaka ke mîpomet ha? Amyamro tko miir̂axe yaaro en̂ekano ritoponho anarme ro mak, erexkuthîrî warai me miir̂axe kica. Kir̂wan̂he awehtoponhîrî komo mîîr̂axe cîmîkno warai me mak kica.

13 On wara marha maxe, mahwowaxe ero pîntho poko. On wara marha mîîkexe, kar̂pe cehtîkexe kanme ro so rma okre.

14 On wara marha kesî Aporin komo Kaan, awantoman̂e ro komo, Ai, Ixaw Yana komo, anarî rowon pono komo men werepokesî awaparî komo me mohtome. N̂examro tak men awemetanmekyaxe so ahnoro. Amace pona rorono pen komo n̂emetanmekyaxe, Araba woskaran pona rorono pen komo marha. Ero warai pen komo n̂emetanmekyaxe okwe, kesî. Ero wa men kesî Aporin komo Kaan.