Ero yinhîrî tînîhtînorî tak n̂enpekn̂e Kporin komo Kaan owya owosoto me mak. Makaka warai komo nakîhcekn̂e mer̂pono pînî ro mak. Puruma yeperîrî ka nîhkocetken̂e kayaritomo maywen komo. Ero yinhîrî natîkwakn̂e xa hara ponan hara.

2 Ero yimaw mokyakn̂e tak makaka warai kom hara. Ahce na atîhtaxapu nîhkocetîkekn̂e okwe exihra cehso ro. Ero yipu ween̂akn̂e owosoto me. Ero yinhîrî kîmtapowakn̂e Kporin komo Kaan yakro, On wara wîîkekn̂e yîwya, Apa, Xako yepamtho komo yehtoponho cma re mîhcamnoyasî, kicicme ehtoponhîrî komo. Waihtîketu men okwe. Asak mak naxe n̂examro okwe, wîîkekn̂e Kporin komo ya.

3 Ero ke ero warai yîhtînopîra tak xakn̂e Kporin komo enmetopo komo. Taa, makaka warai komo yekîhra wai ham, kekn̂e owya.

4 Ero yinhîrî tak on warai n̂enpekn̂e xa hara owya Kporin komo Kaan n̂examro yemetanmecho xa hara. Wehto tak n̂ekmexpekn̂e n̂examro pen yemetanmecho. Ero ke tak n̂etahsîyakn̂e, tuuna imo nakn̂itîkekn̂e, roowo marha nakn̂iyakn̂e okwe.

5 Ero yenîche kîmtapowakn̂e xa hara Kporin komo Kaan yakro. On wara wîîkekn̂e yîwya, Apa, wehto cma re meihkesî. Waihtîketu men okwe. Asak mak naxe n̂examro okwe, wîîkekn̂e yîwya.

6 Ero ke ero warai emetanmetopo komo yîhtînopîra tak xakn̂e Kporin komo. Taa, wehto yekmexpora wai ham, kekn̂e owya.

7 Ero yinhîrî on warai tak n̂enpekn̂e xa hara owya tînîhtînorî xa hara, waaca kanahtaw xakn̂e Noro. Pataw ciixapu mîn xakn̂e waaca, pataw ehtopo yukuknomacho ke ciixapu mîn xakn̂e, xapopo warai ke ciixapu ha. Ero yipu yukuknomacho rma xakn̂e Kporin komo yemyaw.

8 Ero yinhîrî on wara kekn̂e Kporin komo owya, Ai Amoso, ahce meen̂a tan? kekn̂e owya. Waaca yukuknomacho tan ween̂asî, pataw ehtopo yukuknomacho xapopo warai ha, wîîkekn̂e. On wara kekn̂e hara Noro owya, Ixaw Yana komo yehtopo yukuknomacho wiir̂asî n̂examro cheka, pataw ehtopo komo yukuknomacho ha. N̂examro yari tohra xa hara wasî, kekn̂e owya.

9 N̂etakuhr̂apesî tak amn̂e onok na ya tîmsom yaponho, îh pono mko ha. Isake pen yepamtho n̂iritho mîn n̂etakuhr̂apes okwe. Ponaro Ixaw Yana komo yehtopo mîn wixkesî. Xeroboaw yepamtho pen paraxkachome marha tak kawomyasî. Okaciparanî imo ke rma paraxkesî, kekn̂e Kporin komo owya. Ero wa kekn̂e.

10 Ero yinhîrî takî tî tîmtapotarî yekatîmn̂e n̂en̂epekn̂e Amasias Xeroboaw ya, Ixaw Yana komo kayaritomon ya. Tîmsom pokono mîk xakn̂e Amasias, Betew pono ya tîmsom pokono ha. On wara kacho tî kamexpekn̂e yîwya, Ai apa, moso Amos aaxatîmnokapes okwe amaywen komo ya kica, Ixaw Yana komo ya. N̂examro tak men nahwokamexpesî ro mak okwe.

11 On wara men kesî noro apoko kica, Pahxaro tak waihyasî amn̂e Xeroboaw pen waapa kaciparan ke oko. Ixaw Yana pen komo marha naar̂axe waapa komo anarî rowon pona. Iito tak naxe mokuhnî me ro mak okwe. Tîrowon pohra ro makî tak naxe okwe, kesî Amos kica, kan̂e n̂en̂epekn̂e kayaritomo ya.

12 Ero yinhîrî Amos ya rma tak tî kekn̂e hara Amasias. On wara kekn̂e. Ai, Kaan n̂enporî yenîn̂e amoro, etoko kr̂a miya Xuta komo rowon pona. Iito tak awru tohko, iito mak weronomano cirko.

13 Tan Betew po ekatîmra ro mak tak esko. Ponaro kayaritomo yehtopo mîn nasî tan, kayaritomo mîn marha, kekn̂e Amasias Amos ya.

14 On wara n̂eyukyakn̂e Amos, On warainhîrî owî, weronomano rin̂enho pîn ow. Weronomano rin̂enho pen mumutho pîn marha ow. Oper̂a yosomînho mak ow. Sikomoro yepu yeperîrî pokononho ro mak ow.

15 Oyantomekn̂e Kporin komo oper̂a yentopo poko rma oyexitaw. On wara kekn̂e Noro owya, Ai Amos, oyanan komo yaka etoko Ixaw Yana komo yaka. N̂examro weronomaxi etoko, kekn̂e Kporin komo owya.

16 Ero ke oroto tak wekatîmyasî Kporin komo mtapotarî apokono hara. Ero ke omtapotarî ka entakî, On wara mîîkes owya, Ixaw Yana komo weronomacho yekatîmra ro mak tak men esko. Isake yepamtho komo yahwokacho yekatîmra marha esko, mîîkes owya.

17 Ero ke on wara men kesî Kporin komo apoko hara, On wara tak nasî apici amn̂e, kîrkomo pohkan̂e ro me tak nasî ewto imo po. Amumuthîrî pen komo reha waihyaxe kacipara ke, awemsîthîrî pen komo marha. Arowonthîrî marha nukuknomexe tooto komo, nîraconkexe marha anarî komo ya tîmsom me. Amoro tak mîwaiyasî anarî yana komo chew, kicicitho komo chew. Ixaw Yana komo rma naar̂axe waapa anarî yana komo cheka mooxe, tîrowonî ro komo pohra ro mak okwe, wîîkes awya, kekn̂e Amos Amasias ya. Ero wa kekn̂e.