Taa, pahxa tî Xoew xakn̂e Petuew mumuru. Noro ya takî tî tîmtapotarî n̂ekatîmyakn̂e Kporin komo.

2 On wara tî kekn̂e yîwya, Ai, poritomo komo, omtapotarî ka entacoko. Ahnoro on roowo pono komo amyamro, omtapotarî ka entacoko. Awemetanmetopo komo tan wekatîmyas awya so okwe. On wekatîmyas awya so ero yipu ma re meen̂atken̂e awya so? Aporin pen komo katî on yipu n̂een̂atken̂e awya so?

3 On wekatîmyas awya so ero ekatîmcoko amn̂e amxîkrî komo ya. Ero yinhîrî n̂examro n̂ekatîmcowpe tîmxîkrî komo ya hara. Ero yinhîrî n̂examro tak n̂ekatîmcowpe tîmxîkrî komo ya xa hara. Ero wa so n̂ekatîmcowpe amn̂e awemetanmetoponhîrî kom ha.

4 On wara wîîkesî, anatîrî komo yahn̂e mokyatken̂e mer̂pono pînî ro mak. Yihcirî me ka mokyatken̂e yawko warai. Ero yinhîrî tak mokyatken̂e makaka warai hara, cow wa so cetarisom. Yawko warai komo nîmtotho tak nahyatken̂e n̂examro hara. Ero yinhîrî tak anarî hara mokyatken̂e makaka rma, tîhtarî po tîtosom tak. Cow wa so tîtosom nîmtotho takî nahyatken̂e n̂examro hara. Ero yinhîrî tak anarî mokyatken̂e hara makaka warai rma, ahtîkan̂e xa tak ha. Tîhtarî po tîtosom nîmtotho tak nahtîketken̂e noro hara. Noro yipu mokyatken̂e okwe.

5 Ai, twenîmsom komo ro mak amyamro, on wara wîîkes awya so, apakacoko men, awratacoko marha. Ahnoro kawaxiyem yeen̂e ro komo amyamro, Awewru komo men aacoko. Okwe okwe, kacoko awokru komo exihtorî ke, ciixan exihtorî ke ha. Eer̂ataw rma awya so amtarî yai so naar̂atken̂e okwe awaparî komo.

6 Anarî rowon pono komo mokyatken̂e orowon pono pen komo waparî me okwe. Karitî komo mîkyam okwe. Mer̂pono pîn komo ro mak mîkyam yukuknomarî yopono ro mak kopi. Tîyokem komo mîkyam reaw yokem warai komo kopi. Reaw yohyaken komo mîkyam tmayan̂em yohyaken ha.

7 N̂examro tak nahtîketken̂e ro mak onatîtho uupa yatî okwe. Piiku yepu marha waihketken̂e onatîtho okwe. Piiku yepu n̂ipiketken̂e okwe. Nar̂mekn̂e tak yîhcîpîthîrî okwe. Tumutwe tak nasî onatîtho peremtho yipikaxapu.

8 Ero wa exirî ke anatîthîrî komo pen awratacoko tak emasî wara kumixitho ke tponoyem wara. Ero wa nîwracesî emasî ciin̂onhîrî pen waipuche. Ero wa xa marha awratacoko amyamro hara.

9 Puruma yarîhra tak naxe tooto komo Aporin komo mîn yaka Noro ya tîmsom. Wooku yarîhra marha naxe iina yîwya tîmsom ha. Cewru mak naar̂axe Aporin komo ya tîmsom pokono komo okwe.

10 Yiponomra tak nasî amararîn kom okwe. Tîwrataxmu wara rma nas arowon komo. Tmataxi tak nasî anatîrî komo puruma. Tuturpamtîkaxi tak nasî awokruthîrî komo ciixanînhîrî. N̂enahce tak aseci anatîrî komo poxuretopo.

11 Tîhyapamso mak ehcoko amyamro mararî ciin̂e ro komo. Awratacoko amyamro hara uupa ke tînatkem komo. Puruma pînîn yaw awratacoko, sepata pînîn yaw marha. Matatîkai tak okwe anatîrî komo yeperîtho pen okwe.

12 Naawaitîkekn̂e anatîthîrî pen komo uupa yatîtho. Taatupe marha nasî anatîthîrî komo piiku yeputho. Ero wa xa marha nasî roman yeputho, kuum yepu waraitho, orosî yepu waraitho. Ahnoro tak nasî taawaitîkaxi anatîthîrî komo weewe yepu mko. Aawaixapu wara marha naxe tooto komo, tahwore exihra ro mak okwe.

13 On wara wîîkes hara awya so tîmsom pokono komo amyamro, kumixitho yaw tak ehcoko aponon me so. Awewru komo aacoko. Kaan ya tîmsom yakn̂itopo pokono komo amyamro, okwe okwe, kacoko. Amohcoko oona kumixitho yaw. Ero yaw rma etîrapocoko cenmakaxi ro. Ero wa awratacoko amyamro ponaro oyehtopo ya tîmsom pokono komo. Ponaro awehtopo komo mîn yaka ekîhra tak naxe apoino komo puruma, uupa yukun marha. Ero yipu yekîhra naxe okwe.

14 On wara kacoko apoyino komo ya, Oyakno komo, eseresmara ka cehcerî pahkî. Cesenmecerî ka Kporin komo poko kîmtapotachome so. Poritomo komo an̂ihcoko, ahnoro on roowo pono komo an̂ihcoko. Aporin komo mîn yaka esenmecoko, ponaro kehtopo komo mîn yaka. Iito tak tîmtapotacerî Aporin komo yakro cerewre ro mak.

15 Awîrîmacho imo komo men n̂enmayas amn̂e okwe. Pahnoke tak nasî Aporin komo kamon. Karitî ro ya awîrîmacho komo me n̂enmayas amn̂e.

16 Knahrî komo naar̂axe kwero ro so rma okwe. Ahwora tak taxe Kporin komo mîn yaka kîwcetaw so tahwore ehxapunhîrî.

17 Nuskuruminwasî mak okwe naatî yatho roowo cheka ciixapu. Cixkaxi tak nas okwe knahrî komo yîmtotoponho mîîmo pen ha. Puruma yeperîrî yîmtotoponho macaketken̂e waapa komo. Naawaiyakn̂e thakwa okwe puruma yeputho, sepata yeputho marha.

18 Paaka meero nîwracesî. Expora nasî paaka komo. Ero wara nasî noro yipu komo yînahrî exihtorî ke cuupu. Oper̂a komo meero n̂esemetanmekyasî awemetanmetopo komo ke rma.

19 Apa kah yawno, awakro kîmtapowasî cerewre. N̂ecakye ro mak cuupu pen woskara pononho pen. Weewe pen marha n̂ecakye ahnoro okwe.

20 Okno pen komo marha nîwracesî an̂entarî me. Ero wa nîwracesî ewkun me exirî ke tuuna yepu, aporî komo marha. N̂ecakye marha cuupu pen woskara pononho pen. Ero ke nîwracesî noro yipu komo. Ero wara naxe.