On wara marha kesî Kporin komo awya so, Tuu kacoko men Siaw po. Waapa kopi, kacho me rma tuu kacoko oyîpînî ro po. Tatanîmcowpe ahnoro orowon pono komo cerahtîmrî ke so. N̂enmayasî men amn̂e Aporin komo kamonî ro okwe. Pahnoke men nasî ero enmarî.

2 Xîrpe ro mak n̂enmayasî ero po, katpape exihra. Tuuna yewru ken̂e ro mak n̂enmayasî, awarpape ro mak kopi. Saa ketawno wara rma nasî kaapu smun, ero wara rma naxe awîrîman̂e komo, îîpî mko yahrun̂e me ro mak nasî. Tooto komo men mokyaxe kopi amn̂e. Mer̂pono pîn mîkyam kopi, karitî kom ha. Noro yipu komo exihra ro mak ka xatken̂e pahxa. Noro yipu komo exihra marha naxe amn̂e. Miya rorono komo rma noro yipu komo enîhra ro mak tak naxe.

3 N̂examro poturme wehto n̂etahsîyasî mîn hak yakn̂in̂e. N̂examro mahyaka hara wehto n̂etahsîyas hara. Tatîhtaxmu pen ka nasî n̂examro mokuhnaw, tahwore atîhtaxapu, Kaan natîrî wara ro mak nasî Eten pononho wara ro mak. Taa, ahyari so mohtîkache awîrîman̂e komo taakem exihra ro mak nasî. Axawa imo wara ro mak nas okwe. Taakem nahtîkexe yîmton me ro mak okwe.

4 Kawaru wara rma n̂esenpexe kopi. Kar̂pe tîtosom komo mîkyam karitî wara, kawaru wara rma.

5 Nupurwaxe ro mak mokyataw so tarara mer̂pono pîn wara rma kopi. Kar̂pe nahronaxe îîpî yepore so okyo. Mararî yecakyatawno wara ro mak nupurwaxe, Sowtatu komo wara rma naxe karitî komo wara, waapa me tîtosom wara.

6 N̂examro yeen̂ataw tooto komo ya n̂eraswaxe ro mak kopi. N̂ewxamanwaxe ro mak.

7 On wara marha naxe, kar̂pe mokyaxe tooto wara rma, karitî komo wara. Waaca mko pore kainaxe sowtatu komo wara. N̂etîywecexe ro mak cewyaro so tohra.

8 Etpo tohra marha naxe. Emapipo so mak n̂etîywecexe. Kacipara yotaw so rma cexe kopi etamara so.

9 Kar̂pe mokyaxe ewto pona. Waaca kanahtari so cexe kar̂pe. Mîîmo wacan pore kainaxe iina cewomtome so. Mîîmo yewkanapan yaro n̂ewomyaxe cen̂epan̂em wara rma kopi.

10 N̂examro mokyataw roowo pen tak n̂esewsîyasî. Kaapu marha nupurwasî kopi. Nawarpanwasî tak kaamo pen, nuun̂i pen marha kopi. Esenîcke marha tak nasî xir̂ko.

11 Tîsowtatun komo poturme mokyasî Aporin komo. Kar̂pe nîmtapowasî ero yimaw. Mer̂pora ro mak naxe Noro sowtatun komo. Karitî komo mîkyam Noro yewetîn̂e komo. Kerepokacho ro xa mîn Aporin komo kamon. Eraspetono me ro mak n̂enmayasî kopi. Ececetora men naxe tooto komo ero me enmayataw. Ero wa men n̂enmayasî.

12 Ero ke on wara kes hara awya so Kporin komo, Oroto xa tak owece tak etaknamacoko. Yaaro xa etaknamacoko. Awratacoko tak, Okwe, okwe, kacoko ro mak tak. Eseresmara marha ka ehcoko.

13 Aropotarî xa arixkacoko, aponon komo reha ahyaxkara ehcoko. Etîramacoko hara Aporin komo yaka, ponaro awehtopo komo yaka. Kir̂wanî ro Mîkî, apînîn yawno komo ro mak. Yamoro mak tîrwon̂em Mîkî. Kîîxatî ro xa Mîk. Awemetanmekî xera so nasî.

14 Anarimaw anarme tak na nîhtînoya Noro. Awemetanmetopo yekpora rma na nai. Apînîn yaw so rma na nai. Awakrecho komo xa matko na nîmya awya so. Tîwya tîmsom ke rma na awakretu so puruma ke, sepata ke, wooku ke marha. Aporin komo Kaan ya tîmsomu rma na nînomya tîcetaw hara.

15 Ero ke tuu kacoko Siaw po. Kaan poko awesenmetopo komo yaka awan̂itopo komo me tuu kacoko. Eseresmara ka ehcoko.

16 Enmekno ciicoko. Mokuche so on wara kacoko yîwya so, Kaan ponaro xa cehcerî oroto, kacoko. Poritomo komo meero an̂ihcoko, rikomo komo marha, moomo yeen̂e komo meero an̂ihcoko. Cipitaxmu komo meero mohcowpe tamtakpon yawnonho. Cin̂ontaxmu komo marha mohcowpe tamtakpon yawnonho.

17 Ero yimaw nîwratacowpe Aporin komo ya tîmsom pokono komo. Iito nas omîn mahremacho. Mehxa nasî owya tîmsom yakn̂itopo, ero yotaw nîwratacowpe. On wara kacowpe n̂examro owya, Apa, ayanan komo cma re mîmcesî waipîra rma. Ayanan xa amna. Ero ke tooto komo nîwîrîyakarî mera takî cma re amna miir̂asî. Tîwîrîyakaxmu me rma amna n̂etahcaxe mîk hak rowon pono komo. Ero warahra cma re amna miir̂as Apa. Ahce kacho wa on wara ketu anarî yana komo n̂entarî me, Ahto nai hara Kaan, ponaro n̂examro yehtopo? ketu kica, kacowpe rma owya tîmsom pokono komo.

18 Ero wa kache yîwya so on wara tak nasî Aporin komo, tîrowon ponaro xa tak nasî, tîyanan komo pînîn yaw marha.

19 On wara tak n̂examro mtapotarî n̂eyukyasî, Taa, anahrî komo tak wekmexpesî puruma, sepata komo. Awokru komo marha wekmexpesî ero po rma ciixapu. An̂emerî komo marha wekmexpesî aseci. Yîromamra ro mak tak maxe okre. Mîk hak rowon pono komo nîwîrîyakarî me xa hara awirira so tak wasî.

20 Miya kr̂a tak wen̂epesî sowtatu komo, nohce n̂ixa mohxapunhîrî komo. Naatî yewtî pîn pona kr̂a tak wen̂epesî, ewturpamxapu pona. N̂examro poturme tîtosom komo tak wen̂epesî n̂ikitho imo kwaka roro, resce n̂ixan kwaka roro. N̂examro mapitawno pen komo kr̂a wen̂epesî tuuna imo kwaka roro hara oesce n̂ixan kwaka roro. Iito tak kowaxe ro mak kica. Pow kesî ro mak korî komo kica.

21 Aweserepokacho komo xa n̂iir̂asî Kporin komo. Ero ke on wara wîîkes awya so orowon pono komo ya, erasîra tak ehcoko. Aweserepokacho komo xa tak n̂iire okre Aporin komo.

22 Ai, okno komo, on wara wîîkes awya so hara, erasîra ehcoko. Cuupu tak natîkwasî woskara pore so. N̂eperwasî marha weewe komo. Piku yepu n̂eperwasî, uupa yatî marha.

23 Tahwore tak ehcoko amyamro Siaw pono komo. Aporin komo poko ahwotacoko ponaro awehtopo komo poko. Tuuna tak n̂ekpesî Noro, mohtopo ro watohra ro mak nasî. Anatîrî komo tîhtopo n̂ekmexpesî. Yihcirî me tmohsom n̂ekpesî, ero mahyakan marha.

24 Mer̂pora tak nasî puruma, sepata komo yîpîpîtîkacho po so. Uupa yukun yenî mko marha n̂etukmamyasî iyopo so exirî ke awokru komo. Katî yen marha nasî copoyi, n̂etukmamyasî marha.

25 Yaake cimn̂ipu anatîthîrî komo nahye kica makaka komo. Cow wara cehsom komo, roopore tîtosom komo, naatî yahtîkan̂e komo, amcikan̂e komo. Osowtatun warai komo mîk xakn̂e makaka mer̂pono pînî ro mak. Acheka so on̂en̂epetho mîk xakn̂e. Noro yipu komo naputho yecenarîno ke rma knahmexe so hara.

26 Tînahke xa tak maxe okre. Tmaxmitaxi ro tak meseresmexe ero yimaw. Aporin komo Kaan yosotî poko tak mahwowaxe. Aweserepokacho komo cirirî ke yîwya Noro poko mahwowaxe. Yîhyapamnî me ro mak tak maxe amyamro oyanan komo miya roro.

27 Ero yimaw on wara tak mîîkexe, Ixaw Yana komo chewno xa Mîkro Kporin komo. Noro xa Kporin komo, ponaro kehtopo komo. Anarî kaan exihra ro mak nasî, mîîkexe marha. Ero yimaw yîwîrîyakan me ro mak tak naxe oyanan komo.

28 Ero yinhîrî tak Oyekatî wiir̂asî ahnoro tooto komo ropotaka. Wooku yarkan̂e wara rma wiir̂asî yîropotaka so. Aweronoman̂e me tak naxe amumuru komo, awemsîrî komo marha. Wosowaxe marha tak aporitomon komo. Enîhnî yenîn̂e me marha naxe kar̂pamxan kom hara.

29 Oyanton komo pona tak wiir̂asî Oyekatî wooku yarkan̂e wara ha. Kîrkomo pona wiir̂asî, wooxam komo pona marha. Ero wa ciino wiir̂as amn̂e.

30 Aweserepokacho komo marha wiir̂asî kah yaw, roowo po marha. Kamxuku wenpes awya so, wehto marha, wehto yîsîn marha mer̂pono pîn.

31 Nawarpanwasî tak kaamo amn̂e, kamxuku wara rma tak n̂esenpesî nuun̂i. Ero wara nas amn̂e Kporin komo kamon pahnoke exitaw. Keserepokacho imo xa tak mîn Kporin komo kamon, eraspetono ro mak.

32 Ero yimaw Kporin komo yakro nîmtapowaxe anarî komo tukurunpetopo poko. Noro yosotî pona ween̂asî, kexe Kaan ya. Noro yipu komo tak nukurunpesî Kporin komo. Yaake naxe yunkurunperî komo Siaw Yîpîn po, Xerusaren po marha. Noro mtapotachonho yaw roro rma naxe tukurunpeso okre. Pahxa rma tînan̂ikîthîrî nukurunpesî asakî mak yîmtoxapu komo. Ero wa naxe amn̂e.