On wara marha kekn̂e Kporin komo owya, On wara tak ciino wiir̂asî Aporin komo kamon po, ehn̂an me tak Xerusaren pono komo wiir̂asî. Ahnoro Xuta komo ero wara wiir̂asî.

2 Ero yimaw tak Mîk hak rowon pono komo wekmexpesî ahnoro Xeosapa Woskaran pona. Iina tak n̂examro pen wen̂ekesî. Oyanan komo yemetanmekrî poyero yîwya so wen̂ekesî. Oyananî ro mîkyam Ixaw Yana komo. On wara tko n̂examro pen n̂iir̂atken̂e, nakpayatken̂e ro mak okwe mîk hak rowon pono komo cheka. Orowon marha nîraconketken̂e tînahsîrî komo me.

3 Oyanan pen komo marha nahsîyatken̂e tanton me so. Men̂ekacho nar̂metken̂e tînahsîrî ro komo yîhtînotome. Kîîrî mren komo nîmyatken̂e tooto yanton me so. Wooxam yahsîtopo yepetho me mak nîmyatken̂e, tweeno pîn yahsîtopo kica. Woosî mren komo marha nîmyatken̂e tooto ya twokru komo yepetho me mak kica.

4 Taa, Ciru pono komo amyamro, Siton pono komo marha, Piristew komo marha, noro yipu komo amyamro. On wara wîîkes awya so, Ahce wa oyexirî poyero wa ero wa matu oyanan komo poko? Awesepanpu xe na matu? Ero wara rma awya so yîhtînoyataw yohno rma men kesepanîyasî Ow hara. Akanakatapan̂e komo wara kesepanîyasî.

5 Oyemyawno rma maar̂atken̂e okwe prata, ooru marha. Ahce na komo maar̂atken̂e ponaro awehtopo komo mîn yaka. Cepethîkem xa mîn maar̂atken̂e okwe.

6 On wara marha mîxatken̂e, Xerusaren pono pen komo mîmyatken̂e Kreku komo ya epethîrî pona. Xuta yepamtho pen komo ahnoro ero wara mîmyatken̂e. Yîrowonthîrî komo poi mooxe en̂epe xe kr̂a mîxatken̂e.

7 N̂examro tak wekyas hara. Anmîthîrî yahsîn̂enho komo rowon poi wekyasî. Kicicme awehtoponhîrî komo wepanîyasî.

8 Amumuthîrî pen komo makîrha wîmyasî Xuta komo ya epethîrî pona. Awemsîrî komo marha wîmyasî yîwya so. N̂examro tak nîmyaxe amxîkîthîrî pen komo meyeno komo ya, Sabew komo ya. Aporin komo rma Ow ero wara wîîkesî. Ero wa men wîîkes awya so.

9 Taa, on wara men kacoko mîk hak rowon pono komo ya, Ai, tooto komo, akurun komo tak ahsîcoko etar̂maxi amohtome so. Karitî komo enpakacoko. Xiya mohcowpe ahnoro sowtatu komo.

10 Amararîn komo pomotoponhîrî tak ciicoko akaciparan komo me. Anatîrî komo yatîkronkachonho marha ciicoko arahnu komo me. On wara kacowpe kar̂penînhîrî komo, Kar̂pe tak wasî, kacowpe.

11 Oona men amohcoko amyamro mîk hak rowon pono komo. Oona esenmecoko cow wara. Apa kah yawno, asowtatun komo en̂epeko xiya kah yai.

12 N̂eserepokacowpe mîk hak rowon pono komo. Xeosapa Woskaran pona mohcowpe. Iina keremes Ow mîk hak rowon pono komo yen̂ekachome, orowon mamhokono komo yen̂ekachome ha.

13 Cohcow kasko puruma yepu koton̂e wara. Takîhso so tak nasî mararî pono yeperîrî. Xiya ahtoko ha uupa yeperîrî yapikmoso. Uupa yukun yen nasî copoyi, n̂etukmamyasî mak wok pen. Mer̂pora ro mak tooto komo yehtoponho nasî, kicicme ehtoponhîrî kom ha.

14 Mer̂pora ro mak naxe tooto komo iito woskara po, en̂ekano ritopo po. Pahnoke tak nasî Aporin komo kamon, woskara pona esenmexapu komo yen̂ekacho.

15 Ero po tak nawarpanwasî kaamo pen, nuun̂i pen marha. Esenîcke marha tak nasî xir̂ko pen okwe.

16 Ero yimaw mayanasî tak Aporin komo reaw wara Siaw po. Tarai wara marha kesî Xerusaren po. Yîmtapotarî yanme n̂esewsîyasî roowo, kaapu marha. Ero yimaw tak tîyanan komo wacan wara nas Aporin komo, Ixaw Yana komo karihton̂e me.

17 Ero yimaw on wara tak mîîkexe, Kporin komo xa Mîk ham Kaan, ponaro kehtopo kom ha. Siaw pono Mîk ham, tîyîpînî ro pono, mîîkexe. Oyewtonî ro mîn Xerusaren. Ero pona mokuhra ro mak tak naxe anarî yana komo waapa me.

18 Ero kaamo po tak îîpî rma n̂ewkwasî uupa yukun me ciixapu me. Paaka mown marha nîhcesî îh pononho tuuna yaporî wara rma. Ahnoro tuuna yaporî nasî tukmaxi tuuna ke, Xuta rowon pono mko ha. Kaan mîn yaw rma nasî tuuna pîtho. En̂exa tuuna nîhcesî Sitin Woskaran pore. Iitono komo natîrî tîhn̂e me nas okre.

19 Iiponomra tko nas amn̂e Exitu. Naatî yewtî mera ro mak nasî Eton. Ero wa nasî iitononhîrî komo Xuta yepamtho pen komo wapatho me cexirî ke so okwe. N̂examro rowon po kicicme exihnî komo rma thakwa waihketken̂e okwe. Ero wa ehtoponhîrî komo poyero iiponomra nasî yîrowonthîrî komo.

20 Xuta rowonî reha nasî tooto yeken me miya roro eroromero. Tooto yewton me marha nasî Xerusaren miya roro ehretawnomaxapu komo yewton me ha.

21 Kicicme rma re xatken̂e Xuta komo pahxa, waihkano rin̂enho me ehtoponhîrî ka yîhcamnopîra wîxakn̂e. Wara rma tak kicicme n̂examro yehtoponho wîhcamnoyas amn̂e. Aporin komo yewton me nasî Siaw. Ero ke ero wara Xuta komo nakronomes amn̂e. Ero wicakî mak nas omtapotarî.