Taa, Oseias yakro tak nîmtapowakn̂e Kaan pahxa. Beeri pen mumutho mîk xakn̂e Oseias. Ero wara yimtapowataw Usias pen xakn̂e kayaritomo me, noro pen retawno xakn̂e hara Xotaw, noro pen retawno xakn̂e hara, Akas, noro pen retawno xakn̂e hara, Esekias. N̂examro xatken̂e Xuta yepamtho komo kayaritomon me Kaanî mtapotarî yencetaw Oseias ya. Ero yimaw Xeroboaw xakn̂e Ixaw Yana komo kayaritomonî reha, Xoas pen mumutho ha.

2 Ero yimaw tak tîmtapotacho n̂ihciyakn̂e Kporin komo Oseias yakro, yîn̂ekatîmrî hara. On wara kekn̂e yîwya, Ai Oseias, on wara wîîkes awya, apici tak ahsîta kicicme cehsom ha. Tîmxîkyem ahsîta wayamnu xîkrî yon ha. Noro wara xa marha naxe arowon pono komo. Ciin̂o yairono wara ro mak naxe kica itono komo Aporin komo yahsîpînkarî ke, kekn̂e. Ero wa kekn̂e Kporin komo Oseias ya.

3 Ero ke cekn̂e tak Oseias. Kome tak nahsîyakn̂e cipici me Cimrain yemsîrî. Ero yinhîrî n̂etahsîyakn̂e tak noro, n̂ewruyakn̂e kîîrî ciki Oseias mumuru.

4 Ero yinhîrî on wara kekn̂e hara Kporin komo Oseias ya, On wara osohtoko amumuru ciki, Xisirew me osohtoko. Pahnoke tak nasî Xeu pen yepamtho waihkacho owya. Xisirew pono pen komo waihketken̂e n̂examro. Ero yanme n̂examro pen wepanîyasî. Ero yimaw marha kayaritomomra tak wiir̂asî Ixaw Yana komo.

5 Amn̂e tak Ixaw Yana komo krapantho waxikwesî Xisirew woskaran po rma, kekn̂e. Ero wa kekn̂e Kporin komo Oseias ya.

6 Ero yinhîrî tak n̂etahsîyakn̂e xa hara Kome. N̂ewruyakn̂e hara woosî ciki tak. Noro yewruche on wara kekn̂e Kporin komo Oseias ya, On wara osohtoko awemsîrî ciki, Yîpînîmîkno Pîn, kacho me. On wara tak wasî Ixaw Yana komo poko, yîpînîn yawra so tak wasî. N̂examro pen tak wen̂epetîkesî.

7 Ero warahra reha wasî Xuta yepamtho komo poko, n̂examro pînîn yaw rma wasî. N̂examro wukurunpesî. Yîkrapan komo ken̂ehra wukurunpesî, kaciparan komo ken̂ehra marha, ketar̂macho ken̂ehra marha, kawaru ken̂ehra marha, kawaru mkawno komo ken̂ehra marha, noro yipu komo ken̂ehra rma n̂examro wukurunpesî. Owî rma wa wukurunpesî, ponaro n̂examro yehtopo, n̂examro porin ha. Noro yipu Ow yukurunpen̂e kom ha, kekn̂e Kporin komo yîwya.

8 Ero yinhîrî tak moomo yahsîpînkache Yîpînmîkno Pîn ya n̂ewruyakn̂e xa hara Kome kîîrî cik hara.

9 Ero yinhîrî on wara kekn̂e Kporin komo noro poko ciki, Oyanan Pîn, kacho me tak noro osohtoko hara. Oyanan pîn amyamro Ixaw Yana komo. Ponaro awehtopo pîn komo marha Ow hara, kekn̂e Kporin komo.

10 On wara marha kekn̂e Kaan Oseias ya, On wara tko naxe Ixaw Yana komo amn̂e, mer̂pora ro mak tak naxe. Axawa wara ro mak naxe tuuna imo yecihtawno wara. Yukuknoman me ro mak nasî axawa, ero wara xa marha naxe n̂examro. Tan wîîkekn̂e yîwya so, Oyanan pîn amyamro okwe. Ero ke tan xa marha wîîkes hara yîwya so, Kaan xîkrî komo xa amyamro, waipînî ro xîkrî kom ha, wîîkesî yîwya so.

11 Ero yimaw noro re me xa hara naxe Xuta yepamtho komo, Ixaw Yana kom ha. Cewn̂e tak nasî n̂examro yantoman̂e. Mehxan poi mokyaxe oona roowo poi. Aweserepokacho me so tak n̂enmayas amn̂e Xisirew pono komo owya wakrecho kaamo, kekn̂e. Ero wa kekn̂e Kporin komo Ooseias ya.