Taa, Taniew yehtoponho tan wekatîmyas awya so. Pahxa tî xakn̂e Xuta yepamtho komo kayaritomon, Xeoiakin tî osot ha. Kayaritomo me ka xakn̂e noro 3 cimn̂ipu. Ero yimaw tak mokyakn̂e Nabukotonoso Xerusaren pono komo waparî me. Babiron̂a pono komo kayaritomon tî mîk xakn̂e Nabukotonoso. Xerusaren pona tmokuche ewto pen tak wamcetken̂e noro sowtatun komo ero pono pen komo wahkototome okwe.

2 Ero yinhîrî tak Xeoiakin pen nahsîpekn̂e Kporin komo Nabukotonoso ya. Kaan mîn yawnonho mko marha nahsîpekn̂e yîwya ahnoro makî. Ero mko tak naar̂akn̂e Nabukotonoso mîya anarî roowo pona, Sina pona. Iito tak ponaro cehtopo mîn yaka n̂iir̂akn̂e, noro ya tîmxapu komo yîmtotopo yaka.

3 Taa, ero yimaw Aspenas tî xakn̂e Nabukotonoso maywen me. Noro maywen komo yenîn̂e me tî xakn̂e, ewnuku komo yenîn̂e me. On wara tî kekn̂e kayaritomo yîwya, Ixaw Yana komo poyino men̂ekakî. Kayaritomonhîrî yepamtho komo xa men̂ekakî, enîno rin̂enho komo marha.

4 Kar̂pamxan komo re mak men̂ekakî, tupunporem komo mak, enpotho kom ha, yuhnari yîhtînon̂e komo, mîn hak poko ehcamhokaxapu komo, yohno so cehcamhokaxmu komo, kayaritomo mîn yawno poko enpamxapu komo. Noro yipu komo men̂ekakî omîn yaka ehtome tak. Ekîche Kawtew komo mtapotarî poko yîhcamhokakî, karita poko marha yîhcamhokakî Kawtew komo nmewretho poko.

5 Oyotî poi rma n̂examro erewusmakî. Owokru poi marha wokpakî. Osorwaw cimn̂ipu yîhcamhokano cirko. Ero yinhîrî omaywen me tak cîrko, kekn̂e. Ero wa tî kekn̂e Nabukotonoso Aspenas ya.

6 Ero ke noro yipu komo takî tî men̂ekekn̂e Aspenas, Xuta komo poi. Yaake men̂ekekn̂e. 4 mak tan wetahcasî, Taniew, Ananias, Misaew, Asarias, ero wa n̂examro yosotî xakn̂e.

7 Ekîche osohtono takî tî n̂iir̂akn̂e hara ewnuku komo yenîn̂e. Taniew tî nosohcekn̂e Bewtesasa me, Ananias tî nosohcekn̂e Sarake me, Misaew tî n̂osohcekn̂e Mesake me, Asariasî tî nosohcekn̂e Abecneko me. Ero wa tî osohtono n̂iir̂akn̂e ewnuku komo yenîn̂e.

8 Ero yinhîrî on wara takî tî kekn̂e Taniew tîropotaw, ekicicirera ro mak wasî kayaritomo yotî ke, kawaxiyem ke marha, kekn̂e. Ero ke on wara tak kekn̂e ewnuku komo yenîn̂e ya, Apa, anarme nasî kayaritomo yotî owya, noro wokru marha. Ero ke tono xera cma re wasî, erî xera marha wasî. Ero yipu ke oyeseresmetaw kicicme wasî kica, kekn̂e yîwya.

9 On wara tî xakn̂e ewnuku komo yenîn̂e, tawake tî xakn̂e Taniew poko, yîpînîn yaw marha xakn̂e. Kaanî rma tî ero wara n̂iir̂akn̂e.

10 On wara tko kekn̂e noro Taniew ya, Kopi, keraswasî ro mak okayaritomon pona. Ero yipu ke xa n̂examro erewusmakî, kekn̂e thakwa owya. Anarimaw cewyakporoso na awen̂atu so. Awakrono komo reha n̂een̂a cenporem me xa. Ero wa enîche opîmkoce thakwa men okwe, kekn̂e.

11 Iito tko xakn̂e anarî hara enîn̂e komo. Taniew, Ananias, Misaew, Asarias, n̂examro nahman̂e me tî xakn̂e noro ewnuku yenîn̂e ro yanme rma. Ero ke on wara tak kekn̂e Taniew yîwya,

12 Ai, apa, on wara wîîkes awya, yohno makî cma re amna mukukmesî. Amna cma re ka mînahmesî mak. Amna yotî ekîhra ro mak esko. Tuuna mak eeko amna wokru hara. Ero warai poko cma re ka amna mukukmesî 10 kaamo mak.

13 Ero yinhîrî amna enko tupurukye amna yexirî. Anarî komo marha enko kar̂pamxan komo, kayaritomo yotî tonon̂e komo, noro wokru yeen̂e komo marha. Tupurukye amna yeen̂ataw awya ero wara roro mak tak amna yînahmakî yiixe awexitaw.

14 Ero ke tak yîmtapotarî n̂ewehcakn̂e enîn̂e komo. Taniew komo nukukmekn̂e 10 kaamo yîmtapotachonhîrî yaw roro rma.

15 10 kaamo yenatîche tupurukye so n̂he takî tî xatken̂e Taniew komo, kar̂pe so n̂he marha okre. Yupurukura so n̂he reha xatken̂e kayaritomo yotî tonon̂e komo, kar̂pera so n̂he marha xatken̂e.

16 Ero ke tak kayaritomo yotî yekîhra xakn̂e n̂examro yotî me. Kawaxiyem ke marha n̂examro wokpara xakn̂e. Tahsom ke mak nînahmekn̂e. Ero wa tî n̂examro n̂erewusmekn̂e enîn̂e komo.

17 Ero ke on wara tak xatken̂e n̂examro, 4 kar̂pamxan komo, Kaan xa n̂iir̂akn̂e cehcamhokaxmu me xa ahce na poko, karita poko marha. Takîhsom me marha n̂iir̂akn̂e. Taniew xakn̂e camkîra enîhnî yentopo poko, wosoto enxapu yîhtînon̂e me marha xakn̂e.

18 Ero yinhîrî tak yîhcamhokacho komo n̂enahcakn̂e, Ero wicakî men n̂examro yîhcamhokakî, kachonho kayaritomo ya. Ero ke ewnuku komo yenîn̂e ro tak aano n̂iir̂akn̂e kayaritomo yaka. Ahnoro kar̂pamxan komo naar̂akn̂e, Xuta kom ha.

19 Ero ke akro so nîmtapowakn̂e kayaritomo. Kir̂wan̂he xa tî n̂encekn̂e Taniew komo mtapotarî, Ananias, Misaew, Asarias, n̂examro mtapotarî kir̂wan̂he n̂encekn̂e. Wara n̂hema reha tî n̂encekn̂e anarî komo mtapotarî. Ero ke tmaywenî ro me takî tî Taniew komo nahsîyakn̂e kayaritomo.

20 N̂examro mtapotarî n̂encekn̂e roro kayaritomo takîhso exirî poko, yuhnari yîhtînorî komo poko marha. Ero yipu poko encetaw kir̂wan̂he xa tî n̂encekn̂e yîmtapotarî komo. Mer̂pora rma re xatken̂e yuhnari yîhtînon̂e kom ha tî re, xir̂ko yîhtînon̂e komo marha. Miya so tî xatken̂e noro yipu komo kayaritomo rowon poko hakî. Noro yipu komo yopo ro mak nîhtînoyatken̂e Taniew komo. Cewn̂e ro mak camkîra eyukyataw n̂examro, 10 ro camkîra n̂eyukyatken̂e Taniew komo.

21 Ero yinhîrî kayaritomo maywen me rma xakn̂e Taniew pahkî. Pahkî exiche tak Siru xakn̂e kayaritomo me hara. Cewn̂e cimn̂ipu xakn̂e kayaritomo me noro yehtoponho. Ero yimaw kayaritomo maywen me rma xakn̂e Taniew. Ero wa xakn̂e.