Taa, on wara takî tî xakn̂e Nabukotonoso, 2 cimn̂ipu exitaw kayaritomo me ehtoponhîrî, wosowakn̂e takî tî. N̂eserepokekn̂e xa takî tî twosotîmtoponhîrî poko. Yîwînkîra ro mak takî tî xakn̂e okwe.

2 Ero ke yaskomo komo takî tî nan̂ikpekn̂e, xir̂ko yenîn̂e komo marha, Kawtew komo marha. Noro yipu komo tî nan̂ikpekn̂e twosotîmtoponhîrî yekatîmtome. Ero ke tî mokyatken̂e. Kayaritomo yeepatai tî n̂ecececetken̂e.

3 On wara takî tî kekn̂e kayaritomo yîwya so, Kwosotmo kopi. Keserepokesî ro mak on̂enîtho poko. Ahce pokono na mîn wenwo owosoto me. Ero pokono mîn menwo, kacho yenta xe ro mak wasî, kekn̂e tî yîwya so.

4 Ero ke Kawtew komo takî tî kayaritomo n̂eyukyatken̂e. Siriu komo mtapotarî yaro tî ketken̂e. On wara tî ketken̂e yîwya, Ai ha apa. Waipîn me ro mak awexi xe nas amna. An̂enîthîrî cma re mekatîmyas amna ya. Ero yentache tak amna n̂ekatîmyas awya hara. Ero pokono xa mîn menwo ha, kes amna awya, ketken̂e tî.

5 On wara tko tî n̂eyukyakn̂e kayaritomo, Yaaro men tan wîîkes awya so, owosoto on̂enîtho yekatîmra awexitaw so owya kakpocaxe so kr̂a ha men. Amînthîrî komo tak wiir̂asî yukpurukpuruntho yar̂macho me mak.

6 Owosoto on̂enîtho rma na mekatîmyatu. Ero pokono mîn menwo ha, mîîketu marha na owya. Ero wa ketaw awya so kepemexe so tak okre. Kwakrexe so marha. Takîhsom me cekaiporesom me tak kiir̂axe so. Ero ke on̂enîtho ka ekatîmcoko owya. Ero pokono xa mîn ha, kacoko marha ka owya, kekn̂e tî yîwya so.

7 On wara makî tko tî ketken̂e yuhnarino yîhtînon̂e komo, tîmtapotachonhîrî komo wara xa marha tî ketken̂e xa hara. Awanton mak amna apa. Amna ya ka ekatîmko an̂enîthîrî. Entache, Ero pokono xa mîn ha, kesî tak amna awya, ketken̂e tî.

8 On wara tko n̂eyukyakn̂e kayaritomo, Awaikacho komo yenmamnopu xe mak maxe. Yaaro xa omtapotarî mentacow. Ero ke enmamnopu xe mat ham.

9 On̂enîtho yekatîmra awexitaw so owya on wara mak wîîkes awya so, kwaihkexe so kr̂a tak ha, wîîkesî. Anarme kahra ro mak wasî. On warai poko mesencet ham okwe, Cemaro kr̂a mak cekatîmcerî kayaritomo ya. Kicicitho mak cekatîmpore nasî yîwya, kacho poko mesentacow ham. Ero warai kr̂a mak cekatîmcerî yîwya pahkî anarî me tak esehtînotome noro, mîîket ham kica. On wara makî tko wîîkes awya so, on̂enîtho men ekatîmcoko owya. Ekatîmîche awya so, Yaaro ekatîmn̂e mîkyam ham okre, wîîkes apoko so. Ero pokono xa mîn ha, ketu marha mî owya, wîîkesî tak apoko so, kekn̂e tî.

10 On wara tko tî n̂eyukyatken̂e Kawtew komo, Awosoto an̂enîthîrî yekatîmn̂e exîhra ro thakwa mak nasî roowo poko hakî. Ero ke ero wa kahra ro mak xatken̂e kayaritomo komo tmaywen komo ya, yaskomo komo ya, yuhnarino yîhtînon̂e komo ya, xir̂ko yîhtînon̂e komo ya, noro yipu komo yantomara ro mak xatken̂e ero yipu poko.

11 Yuhnarino poko xa thakwa amna mantomesî. Kaan komo makî reha naxe ero yipu yekatîmn̂e me awya, yupumnî me cehsom kom ha. Noro yipu komo mak ero yipu n̂ekatîmyaxe, ketken̂e tî yîwya.

12 Ero yipu entache takî tî nîrwonakn̂e ro makî tî kayaritomo. Mayanakn̂e ro mak tî kopi. Ero ke on wara takî tî kekn̂e tîsowtatun komo yenîn̂e ya, Oroto kr̂a tak yuhnarino yîhtînon̂e komo waihkacoko Babiron̂a pono komo ahnoro, kekn̂e tî.

13 Ero ke ero wa kacho tak tî n̂entamexpekn̂e sowtatu komo ya. Yuhnarino yîhtînon̂e komo takî tî waihkacoko, kacho tî n̂entamexpekn̂e. Ero ke Taniew komo takî tî n̂epor̂atken̂e n̂examro pen meero waihkachome okwe.

14 Arioke tî mîk cekn̂e yuhnarino yîhtînon̂e komo waihkaxi. Kayaritomo kurunu ro komo yantoman̂e mîk xakn̂e. Taniew yaka toche takîhso tak nîmtapowakn̂e Arioke yakro, kir̂wan̂he nîmtapowakn̂e.

15 On wara kekn̂e Arioke ya, Ahce kacho cerewre ro mak nîmtapota kayaritomo? kekn̂e yîwya. Ero ke kayaritomo mtapotachonho takî tî n̂ekatîmyakn̂e Arioke Taniew ya. Yuhnarino yîhtînon̂e komo mtapotachonho marha n̂ekatîmyakn̂e yîwya.

16 Ero ke kayaritomo yaka tak cekn̂e Taniew hara. On wara kekn̂e yîwya, Apa, on wara cma re wîîkes awya, yuhnarino yîhtînon̂e komo cma re ka waihkara masî. Amn̂e n̂he cma re an̂enîthîrî wîhtînoyasî. Ero pokono mîn ha awosoto an̂enîthîrî, wîîkes awya. Ahri ka wîhtînosî, kekn̂e yîwya. Taa, ero wa kam, kekn̂e kayaritomo yîwya.

17 Ero yinhîrî tak tîmîn yaka cekn̂e Taniew takrono komo yaka, Ananias, Misaew, Asarias, n̂examro yaka ha. Yîwya so tî n̂ekatîmyakn̂e kayaritomo mtapotarî.

18 On wara marha kekn̂e yîwya so, Kaan yakro tîmtapotacerî kayaritomo n̂enîtho poko kîpînîn yaw so ehtome Noro, ero yenpotome marha kîwya so, kekn̂e yîwya so. Kayaritomo n̂enîtho yîhtînopu xe xatken̂e waipîra cehtome so iitono komo yakro ro, yuhnarino yîhtînon̂e komo yakro. Ero wa xatken̂e Taniew komo.

19 Ero ke kosope tak kayaritomo n̂enîtho n̂enpekn̂e Kaan Taniew ya. Wosoto xa hara n̂enpekn̂e. Ero ke Kaan poko tak nahwowakn̂e noro. Kir̂wan̂he xa Kaan nai ham okre, kekn̂e tak.

20 On wara marha kekn̂e Taniew, Kaan yosotî poko tahwotapore nasî miya roro yîtîhkan me ro mak. Noro yaw mak nasî takîhso kesehtînopo komo, kar̂pe kehtopo komo marha.

21 Noro mak naknamesî ahce na poko kehtoponhîrî komo. Kayaritomo me ciino rin̂e Mîk ha, kayaritomo mera ciino rin̂e marha. Takîhso cesehtînosom komo yakîhretîkan̂e Mîk ha. Yuhnari yîhtînon̂e komo yîhcamhokatîkan̂e marha Mîkî ahce na poko.

22 Yuhnarino yenpon̂e Mîkî, eyamxapunhîrî yenpon̂e ha. Awarpanawno yenîn̂e Mîkî. Katpan marha nasî yîhyaw. Noro yipu Mîk Kaan okre.

23 Apa kah yawno, ponaro oporin pen komo yehtopo Amoro. Kahwowasî xa apoko. Kir̂wan̂he xa mai ham okre, wîîkes awya. Owya tak menpo yuhnawnonhîrî. Ow marha mîkarito. Amna mtapotarî menta ham. Ero ke yiixe kayaritomo yehtopo tak menpo owya, kekn̂e. Ero wa kekn̂e Taniew Kaan ya.

24 Ero yinhîrî Arioke yaka tak cekn̂e Taniew. Yuhnarino yîhtînon̂e komo waihkak ahnoro, kacho poko antomaxapu yaka, kayaritomo nantomatho yaka ha. On wara kekn̂e yîwya, Ai apa, yuhnarino yîhtînon̂e komo waihkara ro mak esko. Owî cma re maar̂asî kayaritomo yaka. Noro ya tak wekatîmyasî yîn̂enîthîrî. Ero yîhtînomexpotopo xa mîn menwo, wîîkesî marha yîwya, kekn̂e.

25 Ero ke Taniew tak n̂aar̂akn̂e Arioke kayaritomo yaka cerekan̂e. On wara kekn̂e kayaritomo ya, Ai apa, Moso tak wenwo Xuta yepamtho, anahsîthîrî komo poyino rma. Moso takî tî n̂ekatîmya awya awosoto an̂enîthîrî. Ero pokono xa wa mîn meen̂e, nîîke marha tî awya, kekn̂e.

26 Ero ke on wara tak kekn̂e kayaritomo Taniew ya. Bewtesasa rma mîk xakn̂e Taniew. On wara kekn̂e yîwya, Ai ha, on̂enîtho ma mekatîmya owya? Ero pokono xa meen̂e ha, mîîke ha ma owya? kekn̂e.

27 On wara tak n̂eyukyakn̂e Taniew, Apa, on wara mîîkai amaywen komo ya, yuhnari yîhtînon̂e komo ya, yaskomo komo ya, xir̂ko yenîn̂e komo ya marha. Owosoto on̂enîtho men ekatîmcoko, mîîkekn̂e yîwya so. Camkî makî tko n̂ehce okwe.

28 Nasî rma tko Kaan, kah yawno reha. Yuhnarinonhîrî yîhtînomexpon̂e Mîk Noro ha. Noro rma Mîk n̂enpoi awya ciino ritopo tîwya. Amn̂e tî anarmerpa so ciino n̂iir̂a, ero rma n̂enpoi awya, Nabukotonoso amoro, awya n̂enpoi. On warai tî meen̂e awosoto awînîkyataw,

29 awînîkyataw tak amn̂e pahxaro tooto komo yehtopo n̂enpoi awya. On wara xa naxe tooto komo amn̂e, kacho mîn n̂enpoi Kaan awya. Enîhnînhîrî yenpon̂e Mîk ero yipu n̂enpoi awya.

30 Ahce kacho takî reha n̂enpoi Kaan an̂enîthîrî owya? Anarî komo yopo yîhtînon̂e me oyehtopo yanmera ro mak on yuhnarino nîhtînomexpo owya. Amna yanme xa n̂enpo awya awosoto an̂en̂îthîrî yekatîmn̂e yanme. Awanme marha n̂enpoi awya awesehtînotopo yîhtînomexpotome awya. Ero ke mak an̂enîthîrî n̂enpo owya.

31 On warai mîn meen̂e Apa, tooto warai meen̂e awepatai. Porinî ro mak mîn meen̂e. Cepethîkem ciixapu xa mîn meen̂e, tooto warai me ciixapu. Cececetoso xakn̂e awepatai. Aweserepokacho xa mîn xakn̂e.

32 Ooru mîn xakn̂e tooto warai tîpîrî me, kir̂wan ooru. Prata tak xakn̂e awrutarî me hara, aporî me marha. Bronse tak xakn̂e wethîrî me hara, petî me marha.

33 Pehu tak xakn̂e yîhrepu me. Yîhtarî reha xakn̂e ceske. Pehu rma mîn xakn̂e kawau yakro ceske.

34 Ero yipu yeen̂ataw awya toopu tak n̂ehkocekn̂e tooto yamorî ken̂ehra ro mak. Tooto warai me ciixapu tak n̂etapekn̂e yîhtarî poko. Pehu poko n̂etapekn̂e, kawau yakro ceskem poko ha. Yîhtathîrî tak nakuhr̂apekn̂e.

35 Ero yinhîrî ahnoro tak nakuhr̂apekn̂e, pehu, kawau, bronse, prata, ooru ahnoro nakuhr̂apetîkekn̂e yupupunthîrî me cehso ro. Puruma pîpîtho wara mak tak xakn̂e okwe, yîpîpîtîkacho pononho wara. Ero yipu tak naatîkekn̂e ocowo tîhcamnoso ro. Yupupunthîrî exihra ro makî tak xakn̂e. Toopu mak takî tî xakn̂e iito rma tooto warai yetapan̂enho. Por̂mamtîkekn̂e tak toopu îîpî imo me cehso ro. Roowo tak nawronohketîkekn̂e ro mak.

36 Ero yipu wa meen̂e apa, awosoto. Kayaritomo amoro. Oroto tak amna n̂ekatîmyasî awya, Ero pokono xa mîn meen̂e, kes amna awya.

37 On warai xa Amoro apa, kayaritomo komo kayaritomon amoro. Kaan xa Mîk awir̂akn̂e ero warai me, kah yawno Kaan ha. Karitî me awir̂akn̂e, anarî komo yopono xa mîk ha, kacho me marha.

38 Roowo yakwerî poko hakno komo ahnoro n̂iir̂akn̂e amaywen me. Ahto so na natu tooto komo, wooto komo, woskara pore cetarisom komo, tarin̂em komo, kah ratari tîtosom komo, noro yipu komo ahnoro n̂iir̂akn̂e amaywen me, awok me marha. Ero ke apokono rma mîn n̂ehxe tooto warai tîpîrî, ooru.

39 Awenatîwo tak amn̂e anarî komo tak naxe kayaritomo me hara. Yukurumîkno me rma re naxe axawyaka n̂he ha tko. Ero yinhîrî anarî komo xa hara naxe kayaritomo me. Bronse warai me naxe n̂examro hara. Roowo yakwerî poko hakno komo kayaritomon me rma tko naxe.

40 Ero yinhîrî anarî komo xa hara naxe kayaritomo me hara. Ceipuru mîn peehu, kakuhr̂apon̂e, kîcor̂or̂oman̂e xa. Ero wa xa marha naxe n̂examro, kayaritomo komo, anarî maywen pen komo nar̂mexe ro mak okwe akuhr̂apon̂e wara tak.

41 Taa, tooto warai tarî meen̂e pehu, kawau ke ceskem. Ero wa xa marha meen̂e yîhtayaran. Ero wa naxe amn̂e n̂examro, kayaritomo komo. Pehu warai me naxe ceipuru warai me ha. Kawau warai me reha naxe anarî kom hara.

42 Yîhtayaran marha meen̂e pehu, kawau ke ceskem. Ero wara rma naxe noro maywen komo, anarî komo naxe karitî me. Anarî komo reha naxe kar̂pen me.

43 Pehu rma re meen̂e ceskem ha tko, kawau yakro ceskem. Kir̂wan̂he esesmara nasî pehu kawau yakro. Ero wa xa marha naxe ero yimawno maywen komo, tooto yepamtho chew rma re naxe. Iito re esehtînopîn me tko naxe okwe.

44 Taa, yîhtayaran warai komo exitaw kayaritomo me ero yimaw anarî tak n̂iir̂asî Kaan kayaritomo me hara. Miya roro xa tak nasî Noro kayaritomo me ar̂man me ro mak. Anarî komo mak n̂ehcowpe kayaritomo me, kahra tak nasî Kaan ero yimaw. Kayaritomonhîrî pen komo tak nar̂metîkesî ro mak. Kaan n̂iritho reha tak nasî kayaritomo me miya roro towîhnî me ro mak.

45 Noro pokono mîn meen̂e awosoto toopu, tanme ro ehkotoxapu ha. Pehu pen nakuhr̂apekn̂e, bronse pen, prata pen, ooru pen ahnoro mak. Ero warai Kaan n̂enpoi awya, kyopono ro xa Mîk n̂enpoi awya. Pahxarono komo yehtopo tak n̂enpoi awya. Yaarono xa mîn meen̂e awosoto. Anarme exihnî me ro mak nasî, kekn̂e. Ero wa kekn̂e Taniew Nabukotonoso ya.

46 Ero wa ekatîmtîkache tak n̂esewnapekn̂e tak kayaritomo Taniew mamaka. On wara tak kekn̂e tmaywen komo ya, Cepethîkem ehtatko moso ya tîmsom, kotoporem marha akn̂icoko tawakeretopo, kekn̂e.

47 On wara tak kekn̂e kayaritomo Taniew ya hara, Yaarono xa tak Mîk ham ponaro awehtopo. Ponaro tooto komo yehtopo yopono ro mak Mîk ham. Kayaritomo komo kayaritomon marha Mîk ham. Yuhnawnonhîrî yîhtînomexpon̂e marha Mîk ham. Ero wa tak wîîkesî ponaro awehtopo poko owosotîmtoponho yekatîmrî ke awya, kekn̂e. Ero wa kekn̂e kayaritomo Taniew ya.

48 Ero yinhîrî kayaritomo me tak Taniew n̂iir̂akn̂e. Cepethîkem marha nîmyakn̂e yîwya. Mer̂pora ro mak nîmyakn̂e yîwya. Babiron̂a rowon pono komo kopenato me marha n̂iir̂akn̂e. Yuhnarino yîhtînon̂e komo yenîn̂e me marha n̂iir̂akn̂e, Babiron̂a pono komo yenîn̂e me ha.

49 On wara tko kekn̂e Taniew kayaritomo ya, Oyakrono komo xa na miir̂a Babiron̂a pono komo yantoman̂e me. Sarake, Mesake, Abecn̂eko, n̂examro mak xa na miir̂a antomano rin̂e me, kekn̂e. Ero ke ero warai me tak n̂examro n̂iir̂akn̂e Nabukotonoso. Taniew reha xakn̂e kayaritomo mîn potawno me mak. Ero wa xakn̂e Taniew.