Ero yinhîrî tak on wara xakn̂e kayaritomo, Nabukotonoso, tooto warai n̂irpekn̂e ooru. Kawno mîn n̂irpekn̂e, 27 metru kawnon. 2,7 metru xakn̂e akwerî. Tura woskaran pona n̂irpekn̂e. Babiron̂a rowonî rma mîn Tura woskaran.

2 Ero yinhîrî tmaywen komo takî tî nan̂ikpekn̂e kayaritomo. Ahnoro tî nan̂ikpekn̂e, antomano rin̂e komo, yuhnarino yîhtînon̂e komo, puranta kuknoman̂e komo, en̂ekano rin̂e komo, roowo raconho kopenaton komo ahnoro mak nan̂ikpekn̂e tîrowon raconho mko yenîn̂e kom ha. Amohcoko tî kayaritomo n̂irpotho poko ahwotaxi, tooto warai poko, kan̂e komo tî n̂en̂epekn̂e yîhyaka so.

3 Ero ke mokyatken̂e tak antomano rin̂e komo, enîno rin̂e komo, akîhreno rîn̂e komo, puranta kuknoman̂e komo, en̂ekano rin̂e komo, roowo raconho kopenato komo, ahnoro mak mohtîketken̂e noro yipu komo Nabukotonoso n̂irpotho poko ahwotaxi, tooto warai poko ha. Ero yamrinaw tak n̂ecececetken̂e.

4 Ero yinhîrî kayaritomo maywen tak nîmtapowakn̂e esenmexapu komo n̂entarî me. Kar̂pe xa kekn̂e. Ai tooto komo, kekn̂e, mîk hak yana komo amyamro, mîk hak rowon pono komo marha amyamro, mîn hak yaro tîmtapotaxmu komo marha amyamro.

5 On wara tî nîîke kayaritomo awya so, amn̂e mencexe raatî cecesom, tîyorkaxmu marha. Anarmerpan mencexe. Entache tak esewnapocoko. Kaanî ro xa amoro okre, kacoko tak Nabukotonoso n̂irpotho ya.

6 Esewnapora awexitaw so, Kaanî ro xa amoro, kahra awexitaw so marha yohno rma kr̂a metar̂mexe pokaw imo yaka, wehto cheka, kekn̂e. Ero wa kekn̂e Nabukotonoso maywen esenmexapu komo ya.

7 Ero yinhîrî tak anarmerpan n̂eceyatken̂e raatî, nîyorketken̂e marha. Ero ke raatî yentache tak n̂esewnapetken̂e, Kaanî ro xa amoro, ketken̂e tak ero ya. Ero wa xatken̂e ahnoro ro mak mîk hak yana komo, mîk hak rowon pono komo, mîn hak yaro tîmtapotaxmu komo. Ero wa nahwowatken̂e kayaritomo n̂ir̂potho poko, tooto warai poko ha.

8 Ero yinhîrî kayaritomo yaka takî tî cetken̂e anarî komo, Kawtew komo. Xutew komo ponanîmtoso tî cetken̂e.

9 On wara tî ketken̂e Nabukotonoso ya, Ai apa, kayaritomo xa amoro. Waipîn me ro mak awexi xe nas amna.

10 On wara tko mîîka amna ya tooto komo ya ahnoro, Raatî tak men mencexe amn̂e cecesom, tîyorkaxmu marha, anarmerpan kom ha. Ero yipu yentache awya so esewnapocoko tak men, Kaanî ro xa amoro, kacoko tak tooto warai ya, ooru ciixapu ya, mîîka.

11 Esewnapora awexitaw so tooto warai mamaka, Kaanî ro xa amoro, kahra awexitaw so marha kar̂mexe so kr̂a tak pokaw imo yaka wehto cheka, mîîka amna ya.

12 Taa, tan naxe anarî komo, Xutew komo, Babiron̂a rowon pono komo yenîn̂e me an̂irithîrî kom ha. Sarake, Mesake, Abecn̂eko, n̂examro awewetîra naxe kica. Ponaro awehtopo komo yewetîra naxe, Kaanî ro xa amoro, kahra marha naxe okwe an̂irpothîrî ya, tooto warai ya, ooru ciixapu ya, ketken̂e tî yîwya.

13 Ero wa entache tak nîrwonakn̂e xa takî tî Nabukotonoso. Sarake tî nan̂ikpekn̂e, Mesake, Abecn̂eko kom ha. Ero ke n̂ekyatken̂e yîhyaka.

14 On wara takî tî kekn̂e kayaritomo yîwya so, Ai Sarake, Mesake, Abecn̂eko, on wara wîîkes awya so, yaarono wa wenta apoko so ha. Ponaro oyehtopo ponarora ro makî tî mat okwe. Tooto warai wirpoi ero ya tî kahra mehcow, Kaanî ro xa amoro, kahra. Ero wa ma mehcow ke okwe?

15 Taa, oyewetî xe rma tko na matu. Raatî n̂eceyaxe xa hara amn̂e, nîyorkexe marha anarmerpan, ero yipu yentache tak na mesewnapetu. Kaanî ro xa amoro, mîîketu tak na tooto warai ya, on̂irpotho ya. Ero wa awexitaw so kir̂wan̂he rma keen̂axe so. Ero poko ahwotara rma awexitaw so yohno rma kr̂a kar̂mexe so pokaw yaka, wehto cheka oco. Ahto ma re nai kaan awya so akurunpen̂e komo awakn̂ipîra oyehtome? kekn̂e Nabukotonoso yîwya so.

16 On wara tko tî Sarake komo n̂eyukyatken̂e kayaritomo mtaka, Ai apa, amtapotarî yeyuhtopo poko eserepokara nas amna.

17 Pokaw yaka amna yar̂metaw awya amna kurunpen̂e me rma nasî Kaan, ponaro amna yehtopo ha, Amna yakn̂ipîra n̂iir̂asî wehto. Kayaritomo rma re amoro apa. Amna kurunpen̂e me tko nasî Noro amna yakn̂ipîra awehtome.

18 Amna yukurunpera rma tko exitaw on wara xa yîhtînoko, ponaro awehtopo pokohra ro mak nas amna. Tooto kuknon mirpoi ooru rma, ero poko ahwotara nas amna, Kaanî ro xa amoro, kahra nas amna ero yipu ya, ketken̂e tî kayaritomo ya.

19 Ero yipu yentache tak nîrwonakn̂e xa takî tî Nabukotonoso. Cewîrwoxe ro mak takî tî xakn̂e Sarake komo poko. Tmaywen komo takî tî nantomekn̂e wehto kamehtotopo poko. On wara kekn̂e yîwya so, Wehto tak men kamehtocoko ero kamehtotopo ro yopo n̂he. 7 ro xa kamehtocoko ocoro xa tak etahsîtome, kekn̂e tî.

20 Ero yinhîrî takî tî sowtatu komo nantomekn̂e hara Sarake komo yapomitopo poko. Karitî komo mîkyam nantomekn̂e ero poko, erasîn komo marha. On wara kekn̂e yîwya so, Apomiche awya so ar̂macoko kr̂a pokaw imo yaka wehto cheka, kekn̂e.

21 Ero ke Sarake komo napomiyatken̂e tponoye so rma, kamisai so rma, tîxapikai so, ahnorono ke tponoye so rma. Ero yinhîrî tak wehto cheka nar̂metken̂e pokaw imo yaka rma oco.

22 On wara tko xatken̂e ar̂man̂enhîrî pen komo, n̂ecakyatken̂e tak oco n̂examro rma, waihyatken̂e thakwa okwe. Cerewre ro mak kekn̂e kayaritomo wehto kamehtotopo poko. Ero ke ocoro xa tak xakn̂e. Ero ke ar̂man̂enhîrî pen komo waihkekn̂e thakwa okwe.

23 On wara tko xatken̂e Sarake, Mesake, Abecen̂eko komo, tapomiso so rma tî n̂epîrketken̂e wehto cheka oco pokaw imo yawno cheka.

24 Ero yinhîrî takî tî n̂eserepokekn̂e xa takî tî Nabukotonoso. Sai, nawomyakn̂e piiri. On wara tî kekn̂e cesentayem komo ya, Osorwaw makî cma re tar̂macow oroto wehto cheka apomixapu komo, kekn̂e tî. Yaaro mîîkes apa, ketken̂e tî yîwya.

25 Enko xe okyo, kekn̂e takî tî kayaritomo. 4 mexe ween̂asî yimihnî komo rma. Wehto chere mak n̂etar̂axe kopi ecakîra rma. Anarme ween̂asî 4-nhîrî, Kaan mumuru warai me ween̂asî noro kopi, kekn̂e tî.

26 Ero wa kache pokaw imo metatan mîtkoso takî tî cekn̂e Nabukotonoso. On wara tî kekn̂e, Ai Sarake, Mesake, Amecn̂eko, Kaan maywenî ro xa amyamro ham, yîtîhkathîrî maywen ha. Xiya ka epatakacoko, kekn̂e tî yîwya so. Ero ke n̂epataketken̂e tak Sarake komo wehto chei.

27 Epatakache so cow wara tak mokyatken̂e kayaritomo me cehsom komo, roowo raco mko kopenato komo. Sarake komo takî tî mamcetken̂e entome. Ecakîra ro mak exirî tî n̂een̂atken̂e. Yîhpoci komo meero amririntara xakn̂e, kamisan komo marha ecakîra. Yîsînkoto me kotohra ro makî tî xatken̂e. Ero wa exirî komo tî n̂een̂atken̂e.

28 Ero yinhîrî on wara takî tî kekn̂e Nabukotonoso esenmexapu komo ya, Tahwotapore xa nasî ponaro Sarake komo yehtopo poko. Noro n̂en̂epew tancun moxam yukurunpetome. Kaan pona n̂encow moxam. Ero ke kayaritomo mtapotarî rma nanwecow omtapotarî ha. Tupun komo rma nîmyatken̂e wehto cheka tar̂maxmu me anarî ro poko ahwotara ro mak cehtome so. Ponaro cehtopo komo poko mak nahwowat ham.

29 Ero ke on wara tak wîîkesî an̂ewetîrî komo me. Mîk hak yana komo ya wîîkesî, mîk hak rowon pono komo ya, mîn hak yaro tîmtapotaxmu komo ya, ponaro Sarake komo yehtopo yîwîrîyakara ro mak ehcoko. Yîwîrîyakache awya so takpotusom me kr̂a tak maxe okwe. Amînthîrî komo tak nasî yukpurukpurun yar̂macho me ciisom me. Ero wa wîîkesî Noro poko Sarake komo yukurunperî ke oroto. Ero wa yukurunpeno rin̂e exihra ro mak wa nas anarî, ponaro kehtopo komo, kekn̂e tî. Ero wa tî kekn̂e kayaritomo.

30 Ero yinhîrî tak kopenato me tak n̂iir̂akn̂e Sarake komo, Babiron̂a rowon pono komo yenîn̂e me. Ero wa n̂examro n̂iir̂akn̂e Nabukotonoso.