Taa, on wara wîîkes awya so, on wara wîxakn̂e Keba yecihtaw oyexitaw. 30 cimn̂ipu xakn̂e ero yimaw oyewrutoponho. 4-nhîrî nuun̂i po iito wîxakn̂e, 5-nhîrî kaamo po. Opoino komo yakro wîxakn̂e waapa nahsîtho komo yakro. Iito oyexitaw n̂etahrunkekn̂e kaapu. Kaan n̂enpotho tak ween̂akn̂e.

2-3 5-nhîrî kaamo po xa Kporin komo mtapotarî wencekn̂e. 5 cimn̂ipu xakn̂e ero yimaw ahsîxapu me Xeoiakin yehtoponho, amna kayaritomonînho yehtoponho. Esekiew ow, Kaan ya tîmsom pokononho, Busi mumuru ow. Kawtew komo chew wîxakn̂e, eepu yecihtaw, Keba yecihtaw ha. Oyahsîn̂e wara xakn̂e Kporin komo, tamorî ke oyahsîn̂e wara.

4 Nohce wece ween̂akn̂e. Ocowo imo mokyakn̂e en̂exa. Woi woi woi kekn̂e. Tuuna yewru ken̂e xakn̂e ocowo, porin tuuna yewru ha. Wehto ken̂e marha xakn̂e tuuna yewru, rehrere kekn̂e. Tuuna yewru mamhoko katpape xakn̂e, katpape xa oco. Sîîpo warai n̂esenpekn̂e wehto chew rma.

5 Ero yeen̂ataw owya mîk hak warai komo tak n̂epataketken̂e wehto chei, 4 xatken̂e. On wara n̂examro ween̂akn̂e, tooto wara rma re xatken̂e.

6 4 so tko xakn̂e eepatarî komo, 4 so marha xakn̂e aporî komo, tarin̂em komo yaporî warai.

7 Cecepe xakn̂e yîhrepu komo. Anarme xakn̂e yîhtarî komo, paaka xîkrî tarî wara xakn̂e. Pepeyure ro mak xakn̂e yîhtarî, kuripara wara xakn̂e sekeseke kaxapu wara.

8 Tooto yamorî me rma re xakn̂e amorî komo. Aporî komo makataw tko xakn̂e amorî komo. Tamoke so xatken̂e yîrataw, yîmkaw, kar̂me, poowa me, ero wara. Ero wara xatken̂e mîk hak warai komo, eepatarî komo xakn̂e, aporî komo marha.

9 On wara xakn̂e aporî komo, teme kekn̂e etpoko so awxawno pona roro n̂esehyatkekn̂e. Esewkor̂mara ro mak xatken̂e n̂examro. Pataw mak cetken̂e.

10 On wara xakn̂e eepatarî komo, tooto yepatake so xatken̂e. Reaw yepatake so xatken̂e mehxa kar̂me. Paaka yepatake so xatken̂e poowa me hara. Yaimo yepatake so marha xatken̂e. Ero wara so xatken̂e eepatarî komo.

11 On wara xatken̂e aporî kom hara, tapockantaxi xatken̂e kahsî. Asakî aporî komo xatken̂e teme wara etpoko. Asak hakno ke hara tupun komo nahruyatken̂e.

12 Pataw so cetken̂e ceepatai so. Esewkor̂mara ro mak cetken̂e. Ekatî yanme mak cetken̂e.

13 On wara marha xatken̂e n̂examro mîk hak warai komo, tîroromutwe ro mak xatken̂e. Wehto roron wara xatken̂e, poturem wara marha xatken̂e etahsîxapu wara rma. Rehrere kekn̂e wehto n̂examro yotaw so. Kewkaranpen̂e mîn xakn̂e wehto oco. Pepe kacho marha n̂epatakekn̂e wehto chei.

14 Miya xiya wara cetken̂e n̂examro. Kar̂pe so cetken̂e pepe kacho wara ro mak.

15 Ero yinhîrî tak onok na komo wentîkekn̂e, 4 ke ceepatakem kom ha. N̂examro panaw so tarara tarî ween̂akn̂e. Roowo po xakn̂e tarara tarî.

16 On wara xakn̂e tarara tarî, tarara tarî yecepu marha, pepeyure xakn̂e okre beriru wara. Etîme re xakn̂e 4 komo. Asakî so tî xakn̂e tarara tarî, anarî xakn̂e wahra so. Porin yaw so xakn̂e wahrai.

17 N̂etar̂akn̂e tarara tarî. Nohce yaw roro cekn̂e, anarimaw suu yaw roro cekn̂e, anarimaw resce yaw roro cekn̂e, anarimaw oesce yaw roro cekn̂e hara. Pataw ro mak cekn̂e, esewkor̂mara ro mak.

18 Kaw so xakn̂e tarara tarî yen̂etî. Keserepokekn̂e ro mak ero poko. Cewke so xakn̂e tarara tarî yen̂etî. Mer̂pora ro mak ewru ween̂akn̂e en̂etî poko hakî.

19 On wara cetken̂e, mîk hak warai komo cetaw tarara tarî marha cekn̂e akro so. Roowo poi awomyataw so hara onok na komo, tarara tarî marha nawomyakn̂e akro so rma.

20 Ahna so tîto xe cexitaw ekatî, tarara tarî marha cekn̂e. Awomyataw so hara, akro so rma nawomyakn̂e tarara tarî. Ero wa cetken̂e mîk hak warai komo yekatî exirî ke tarara tarî yaw.

21 Mîk hak warai komo cetaw so tarara tarî marha cekn̂e akro so. Ecececetaw so tak tarara tarî marha n̂ecececetken̂e. Kahsî awomyataw so mîk hak warai komo tarara tarî marha nawomyakn̂e akro so. Iito re cetken̂e n̂examro yekatî exirî ke tarara tarî yaw so. Ero wara cetken̂e.

22 N̂examro yepoi n̂esenpekn̂e kaapu tamtake ro mak. Kristaw wara n̂esenpekn̂e kaapu. Keserepokekn̂e ro mak ero poko.

23 Kaapu makataw xakn̂e mîk hak warai komo yaporî. Asakî so n̂esehyatkekn̂e aporî mko akno wece hara. Asak hakno ke so marha tupun komo nahruyatken̂e. Ero wa xakn̂e aporî komo.

24 Cetaw so tak n̂examro kahxi yewtunîmrî wara ro mak wencekn̂e. Karitî mtapotarî wara rma wencekn̂e. Nîyorwasî sowtatu komo mer̂pono pîn ero wara marha nîyorwatken̂e. Cecececetaw so tak tarore tak xakn̂e aporî komo.

25 Taa, cecececetaw so tarore xatken̂e. Ero wara exitaw so tooto mtapotarî warai wencekn̂e kah yawno. Onok na komo yepoyino wara nîmtapowakn̂e.

26 Mîk hak warai komo yepoi xakn̂e kaapu. Ero yepoi hara xakn̂e kayaritomo yapon. Sapira wara xakn̂e ero aapo, kaikokoro xa xakn̂e. Ero po xatken̂e tooto.

27 On wara Mîk xakn̂e tooto warai, awrutarî n̂esenpekn̂e sîîpo wara pepeyurem wara, wehto ken̂arî wara. Yîhrepu n̂esenpekn̂e wehto wara mak. Katpape ro mak xakn̂e Noro mîtwo.

28 Noro mîtpoko marha xakn̂e kukawa warai kewkaranpen̂e xa oco. Tuuna mokyataw kukawa n̂esenpesî tuuna yewru chew, ero wara xakn̂e Noro mîtwo. Ero wara ween̂akn̂e Kporin komo weyuru warai. Ero yipu yeen̂ataw owya kesewnapekn̂e. Tooto mtapotarî warai tak wencekn̂e. Ero warai wencekn̂e.