Apa kah yawno, amna yîwîrîmacho ponaro cma re masî. Amna nîwîrîyakexe tooto komo. Enko xe.

2 Anarî yana komo tak naxe amna yekenho po. Amna mîntho yaw naxe okwe anarî rowon pononho komo.

3 Rikomo wara ro mak tak nas amna, yîmîhnî wara, yînocwamnî wara marha. Amna nocwan komo tak naxe in̂omnî wara okwe.

4 Epethîrî pona mak twokru nahsîyas amna tuuna. Cepethîke marha nas amna wehtorî.

5 Amna wenatîkexe, amna nahsîyasî amna pîmîrî poko oko. Amna n̂ekar̂kesî ro mak. Epokaren me rma tko nas amna okwe.

6 Amna n̂etantomapesî Exitu pono komo ya, Asiriu komo ya marha. Ero wara amna n̂etantomapesî amna nahrî yepetho me mak.

7 Kicicme xatken̂e amna porin pen komo. N̂examro pen tak waihyatken̂e. Kicicme n̂examro yehtoponho yepeman̂e me nas amna okwe.

8 Anto me cehsom komo mak tak naxe amna yantoman̂e me hara okwe. Amna town̂e komo exihra ro mak nasî n̂examro yantonînho.

9 Amna cesî miya pohnîntaka tînahrî yeposo. Iito so rma tko nasî kacipara imo ke cemyarkem komo. Wara rma tînahrî yeposo thakwa amna cesî.

10 Yupuxapu wara ro mak nas amna cîpîrî. Ocoro amna nasî rooma yanme, cerewrem yanme.

11 Wooxam komo nahsîyatken̂e okwe Siaw pono pen komo. Emasî komo marha nahsîyatken̂e Xuta yewton pono pen komo.

12 Antomano rin̂enho pen komo namhosocetken̂e amorî poko so oko. Poritomo komo moxam. Ero ke n̂ehcowpe emetanmekîra, kahra ro mak xatken̂e okwe.

13 Kar̂pamxan komo napicketken̂e puruma yaposokacho poko. Kîîrî mren komo ya reha weewe narpetken̂e tawsîn̂em oko. Cepîrkarî yaro so naar̂atken̂e okwe.

14 Esenmekîra tak naxe amna poritomon komo, ewto wacan metatan yaka. Waano yarîhra tak naxe kar̂pamxan kom hara.

15 Tahwore amna yehtoponho tak n̂ehcamnoi okwe. Tmanîmsomînhîrî amna tak nîwraces hara okwe.

16 Cepîrkaxi tak nas amna yarokotho. Amna kanahtai n̂epîrkekn̂e okwe. Amna n̂etwîrîmesî ro mak kicicme amna yehtoponho yepetho me.

17 Ero wara amna exirî ke ahwora ro mak nas amna. Ero wara amna exirî ke amna n̂ewxîrîyasî mak okwe.

18 Ero wara nas amna Siaw Yîpîn pînîn yaw amna exirî ke, pohnîtho pînîn yaw okwe. Rokohci mak tak n̂etar̂asî ero pore okwe. Ero wara nas amna okwe.

19 On wara tko mas Amoro Apa, ehcamnopîn me ro mak mas okre. Kayaritomo me masî miya roro tooto komo cesepamkaxi ro.

20 Ahce kacho amna ponarora mai miya roro? Ahce kacho amna mahsîpînke pahkî ro mak okwe?

21 Amna tak aknamak Apa awece hara. Amna yaknametaw awya cetaknamaxi xa tak nas amna awece okre. Pahxa amna xakn̂e aponaro ero wara xa marha amna cirko oroto.

22 Eroromero katî amna mahsîpînkai? Amna poko katî mîrwonîmtîke? Ero wara kesî amna awya Apa. Ero wa mak.