Anatoce pononho, Benxamin komo rowon pononho ha. Iitono komo yakrono ow ha.

2 Kporin komo mtapotarî wencekn̂e Xosias exitaw Xuta komo kayaritomon me. Amon pen mumutho tî mîk xakn̂e Xosias. 13 cimn̂ipu xakn̂e kayaritomo me Xosias yehtoponho. Ero cimn̂ipu po takî Kaanî mtapotarî wencekn̂e.

3 Emapona roro tak Kaanî mtapotarî wencekn̂e. Pahkî exiche Xosias pen mumutho tak xakn̂e kayaritomo me hara, Xuta komo kayaritomon pen mumutho. Xeoiakin mîk xakn̂e noro yosotî. Ero yinhîrî tak Setekias xakn̂e kayaritomo me hara. Xosias pen mumutho marha mîk xakn̂e Setekias. Ero yinhîrî Xerusaren pononho pen komo tak naar̂atken̂e waapa komo okwe. 11 cimn̂ipu xakn̂e kayaritomo me Setekias yehtoponho ero po tî naar̂atken̂e. 5 po naar̂atken̂e nuun̂i po. Ero wicakî pahkînon xakn̂e Kaanî mtapotarî yentachonho owya.

4-5 On wara wencekn̂e Kporin komo mtapotarî, Ai, Xeremias, on wara wîîkes awya, Pahxa rma onîhtînoputho amoro. Anocwan ropotaka awakîtonaw rma owya kîhtînoyakn̂e. Ewrura rma ka awexitaw anarî komo warahra kiire. Waronomano rin̂e me kiire mîk hak rowon pono komo n̂entarî me.

6 Ero ke on wara tko wîîkekn̂e yîwya, Okwe, Apa, Kaan Amoro, camkî tîmtapotaxmu ro mak ow okwe. Kar̂pamxan mak ow okwe, wîîkekn̂e yîwya.

7 Omtaka tko n̂eyukyakn̂e Kporin komo. On wara kekn̂e, Kar̂pamxan mak ow okwe, kahra ro mak esko. Tooto komo yaka men ken̂epesî mîk hak yaka. On wara xa amtpotakî n̂examro ya, wîîkes awya, Ero wa kacho men ekatîmko omtapotarî ha.

8 Amtapotarî yentan̂e komo yewru yeen̂ataw awya erasîra esko. Owî rma tko was awakro. Kukurunpes Owî. Aporinî rma Ow ero wa wîîkesî.

9 Ero wara kache napockanwakn̂e tak Kporin komo owece. Teme kekn̂e omtarî poko. On wara kekn̂e owya, Omtapotarî tak wiirî amtaka.

10 Enko xe, oroto mîk hak rowon pono komo yopono me tak kiirî, kayaritomo maywen komo yopono me ha. N̂examro mohkan̂e me kiirî, yixkan̂e me marha, waihkan̂e me marha, ar̂man̂e me marha. N̂examro ciin̂e me marha kiirî mîîmo ciin̂e wara, n̂examro ciin̂e me marha kiirî mararî ciin̂e wara. Ero wara ciin̂e me kiirî oroto, kekn̂e. Ero wara kekn̂e Kporin komo owya.

11 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, Xeremias, ahce meen̂a? kekn̂e. Amentoera peremtho ween̂asî yîhkotoxapu, wîîkekn̂e yîwya.

12 Yaaro menwo ham, kekn̂e owya. Mîk hak pono komo ciitopo me tak nasî omtapotachonho yaw roro rma, kekn̂e. Ero wara kekn̂e Kporin komo owya.

13 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, ahce tak meen̂a hara? kekn̂e. Tahrem tak ween̂asî cenuhsom. Tmackape ween̂asî nohce yaw roro, wîîkekn̂e.

14 On wara kekn̂e Kporin komo owya, Taa, nohce n̂ixa tak mokyasî yîwîrîman̂e komo okwe, on roowo pono komo yîwîrîmatîkan̂e.

15 Pahnoke tak nasî kayaritomo maywen komo yan̂ihtopo owya. Nohce n̂ixan komo wan̂ikyasî ahnoro. Iitono kayaritomon komo mokyaxe amn̂e Xerusaren pona, tmaywen komo yakro rma mokyaxe. Tapon komo tak n̂iir̂axe ewto metataka rma. Ewto wacan wamcetîkexe ro mak okwe. Mîn hak pono komo waparî me marha cexe, Xuta rowon pono komo waparî me.

16 Ero yimaw tak iitono komo yîwîrîmacho wekatîmyasî yîwya so, kicicme ehtopo komo yepetho. On wara xatken̂e okwe, oyahsîpînketken̂e okwe. Kotoporem nakn̂iyatken̂e anarî komo tawakeretopo me. Tîn̂enporithîrî komo yakro rma nîmtapowatken̂e. Oporin amoro, ketken̂e kica. Ero yanme yîwîrîmacho komo wekatîmyasî yîwya so.

17 On wara marha wîîkes awya, Xeremias, n̂examro n̂entarî me an̂ekatîmrî men yîhtînoko. Piiri awomko. Ow wîîkes awya ero rma ekatîmta yîwya so. Erasîra ro mak esko n̂examro pona. Pona so aweraswataw n̂examro wero ro rma keraspes amoro hara.

18 Oroto tak ewto warai me kiirî, sowtatu ke tukuruyem warai me. Mîîmo mapatan warai me marha kiirî, pehu warai me. Ewto wacan warai me marha kiirî bronse warai me. Ero warai me tak kiirî oroto on roowo pono komo yukurunkan̂e me awehtome. Kayaritomon komo yukurunkan̂e me kiirî, antoman̂e komo yukurunkan̂e me marha, yînmîthîrî komo pokono ro komo yukurunkan̂e me marha, ahnoro on roowo pono komo yukurunkan̂e me kiirî.

19 Awakro rma re n̂etar̂mexe, ayopo exihra tko naxe. Awakrono ro me was Owî rma akurun me, wîîkes Ow Aporin komo, kekn̂e owya. Ero wara kekn̂e Kporin komo owya.