On wara marha kesî Kporin komo awya so, Oyapon on kaapu. Ohtarî yapon mîn roowo. Ero ke ahto ma re nai omîn me an̂irithîrî komo? Ahto ma re nai oyeremacho?

2 On̂iritho mîn ahnoro. Oyanme mak nas ahnoro, kesî Kporin komo. On warai komo ponaro xa tko wasî, anarî komo xawyakan mak ow ha, kan̂e komo, Kicicme weexi kica, kan̂e komo marha, tatan̂e omtapotarî yentan̂e komo, noro yipu komo ponaro xa wasî.

3 On wara tko n̂examro ween̂asî, bui waihketaw yîwya so owya tîmsom me ween̂asî tooto waihkacho wara rma. Oper̂a pun yakn̂iyataw owya tîmsom me ween̂asî xapari pîmîxwotopo wara rma. Puruma yeperîrî yakn̂iyataw owya tîmsom me, kuuxi kamxukutho yakn̂itopo wara rma ween̂asî kica. Kotoporem yakn̂iyataw yîwya so mîk hak warai me ciixapu poko tahwotacho komo wara rma ween̂asî. Tanme ro mak cexi xatî komo mîkyam. Tpoxwe ro mak nasî yîwya so kicicitho me ro mak cehtopo komo kica.

4 Ero ke n̂examro panarecho wîhtînoyas Ow hara. Nasî ahce na pona erahtîmtopo komo, ero yipu ke rma wemetanmekyasî. Omtapotarî yeikura ro mak exirî ke so ero wa wiir̂asî. Omtapowataw akro so omtapotarî yentara ro mak xatken̂e kica. Kicicme xatken̂e owero ro rma. Yiixera oyehtopo mak nîhtînoyatken̂e poko cehtopo komo me kica. Ero wara xatken̂e kica. Ero ke n̂examro panaresî, kesî Kporin komo.

5 On wara wîîkes awya so hara, Kporin komo mtapotarî yentan̂e ro komo amyamro, tatan̂e entan̂e ro kom ha, Aaxera so naxe ayanan komo, aporokexe so Kaan mîn yai okwe. Kaan yosoken pîn komo amyamro kica, kexe okwe apoko so. On wara marha kexe aporoketaw so, Kaan poko xa yo ahwotacoko. Tahwore ehcoko amna wero ro, kexe kica. Cehn̂axmu me mak naxe ero wa kan̂e komo amn̂e.

6 Entacoko ka. Ahce mîn n̂esence, ewto pono wa kesî kopi? Wara ro mak karî n̂esencesî kopi. Kaan mîn yawno rma kesî kopi. Kporin komo xa Mîk nîmtapowasî. Tîîxatî pîn komo poko cesepansom xa Mîk ha kopi. Noro rma mencexe, kesî Kporin komo awya so.

7 On wara marha kesî Noro awya so, Wooxam wara rma nasî Xerusaren, cewrusom wara. On wara nasî, Aka aka, kahra rma ka cexitaw n̂ewruyasî kopi. Erewra ro mak cexitaw n̂ewruyasî kîîrî ciki.

8 Onoke ma re n̂examro yehtopo warai n̂ence? Onoke ma re n̂examro yehtopo warai n̂eena? Anarî yana komo yeken ma re n̂ecir̂a ero kaamo po rma? Cewn̂e kaamo po rma katî anarî yana komo n̂ewruyatu tkayaritomoi? Ero wara rma tko nasî Siaw, ewto ha. Erewataw rma n̂ewruyasî yîmxîkrî komo.

9 Ahce wara wai awya so? kesî Kporin komo awya so. Rikomo pormamnoyasî Ow yîson ropotaw takîhso cehso ro. Ero yinhîrî ewrunokara ma re wai awya so? Rikomo yewrunokan̂e ro Ow. Takîhso ehxapu ciki ewrunokara ma re wai awya so?

10 On wara wîîkes awya so Xerusaren xatî komo, ahwotacoko iitono komo yakro, tawake esko iitono komo poko. Iitono komo pînîn yaw tîwrataxmu komo, awya so wîîkesî, ahwotacoko xa tak iitono komo yakro.

11 Anocwan komo wara nasî Xerusaren. Pahxaro tak moomo yeen̂e wara maxe cerepotaxi ro okre. Noro manatîrî awexporexe so okre. Mer̂pora ro mak nasî kir̂wanî ro me iitono komo yehtopo. Ero poi een̂e wara maxe okre. Ero ke mahwowaxe xa okre.

12 On wara marha kesî Kporin komo Xerusaren poko, Ero yimaw tak ahwokan me ro mak wiir̂asî iitono komo. Tuuna yepu wara wiir̂asî ero wara ehtopo komo. Xenciu komo yemyawnonho tak wekpesî ahyaka so mer̂pono pîn, tuuna yepu wara mokyas emyawnonhîrî komo, kar̂pe tîhtosom wara. Ero yimaw ewto mownu yeen̂e wara maxe okre. Enaw taasom wara marha maxe okre. Tosokmuru po awenîman̂e wara marha nasî ewto awerepotametome so.

13 Tîmxîkrî n̂erepotanmekya yîson ero wa Xerusaren werepotanmekyasî.

14 Ero ke ero wara Xerusaren yeen̂ataw awya so mahwowaxe okre. Cuupu natîkwasî tahwore ero wa mahwowaxe amyamro. Cekaritotopo n̂enpesî Kporin komo tanton komo ya reha. Tîîxatî pîn poko reha nîrwonasî.

15 Encoko ka, mokyasî tak Kporin komo wehto chew rma oco. Ocowo chewno wara nasî Noro tararan, cetapomrisom chewno wara. Nîrwonasî xa tak roowo pono komo poko. Wehto n̂uru ke rma eino n̂iir̂asî.

16 Wehto ke n̂esepanîyasî Kporin komo, tkaciparan imo ke marha, cemyawno ke ha. Ahnoro n̂epemesî. Mer̂pora tak naxe amn̂e Kporin komo nwaikatho kom okwe. Ero wara naxe amn̂e okwe.

17 On wara naxe anarî komo okwe, yiixe cehtopo komo nahsîpînkexe, tupun komo marha nakir̂wamexe. Ero wara n̂etakir̂wamexe naatî cheka tîtotome so enporixaputho yaka, naatî rakatawno yaka. Iito kuuxi pun non̂exe kica, onoke na pun non̂exe kicicitho pun, mukuku pun marha non̂exe kica. Noro yipu komo waihyaxe iito re rma, kesî. Ero wa kesî Kporin komo.

18 On wara marha kesî Kporin komo, N̂examro yehtopo ween̂asî, esehtînotopo komo meero ween̂asî. Ero yimaw tko mîk hak rowon pono komo wenmekyasî ahnoro, anarmerpan yaro tîmtapotaxmu kom ha. N̂examro mokyaxe iina, kir̂wanî ro me oyehtopo n̂een̂axe okre.

19 Ero yimaw cirihnî tak wiir̂asî n̂examro wero ro. Ero yinhîrî etîmtoxapu komo tak wen̂epesî mîk hak rowon pono komo cheka. Tahsisi pona wen̂epesî, Puru pona, Ruce pona marha. Waiwî yar̂man̂e ro komo mîkyam Ruce pono komo. Tubaw pona marha wen̂epesî, Xapan pona, miyan komo cheka rma wen̂epesî, ciwya pono komo cheka meero wen̂epesî. Kir̂wanî ro me oyehtopo yentan̂e pîn komo mîkyam, enîn̂e pîn komo marha mîkyam. Noro yipu komo cheka wen̂epesî oyekatîmn̂e komo. Iitono komo ya tak n̂ekatîmyaxe kir̂wanî ro me oyehtopo, Xenciu komo ya.

20 Ero yimaw tak ayanan komo n̂ekyaxe oyekenî ro pona, îh pona, Xerusaren pona ha. Mîk hak rowon pono komo chewnonho n̂ekyaxe. Kporin komo ya tîmsom me rma n̂ekyaxe. Kawaru mkaw so n̂ekyaxe, mura mkaw so, kameru mkaw so. Sowtatu tararan yaw so n̂ekyaxe, anarmen yaw so marha. Kporin komo mîn yaka puruma yeperîrî n̂ekyaxe Ixaw yana komo Kaan ya tîmsom me, kir̂wan yaw mak n̂ekyaxe, ero wara xa marha ayanan komo n̂ekyaxe anarî yana komo Noro ya tîmsom me hara.

21 Ehxapu komo poi tak Ow men̂ekesî owya tîmsom pokono me, Repita warai me marha wiir̂asî anarî komo, kesî Kporin komo.

22 On wara marha kesî Noro, Amn̂e tak yaxan wakîhcesî kaapu komo, yaxan marha wakîhcesî roowo hara. Ero tak nasî on̂enîrî me ehcamnopîn me ro mak. Ero wa xa marha naxe awepamthîrî komo, ehcamnopîn me ro mak naxe. Ero wa xa marha nas awosotî komo, ehcamnopîn me marha nasî.

23 Ero yimaw ahnoro tooto komo tak mohtîkexe opoko ahwotaxi. Anarî nuun̂i po so mokyaxe, anarî sabatu po so marha mokyaxe. Miyan komo rma mokyaxe opoko ahwotaxi. Oporin Amoro, kexe owya, kesî Kporin komo.

24 Ero yinhîrî tak cexe oyanwekn̂enho pen komo yokoputho yenso. N̂examro pen yakrî waipîra nasî, wehto marha eseikara nasî. Ero yipu chew thakwa naxe okwe. Okwe, kexe tooto komo ahnoro n̂examro pen yeen̂ataw. Ero wara kexe, kesî Kporin komo. Ero wa mak kesî Noro. Iina mak nai on̂ekatîmrî.