Taa, Saromaw wanorî tan wentamexpes awya so. Kir̂wanî ro on anarî waano mko yopono.

2 Tîmtarî ke oyewcoka xe wasî noro ya. Tpoxwe ro mak nas owya ooxe awehtopo. Uupa yukun yopo xa nasî tpoxwe owya.

3 Tpoxwe marha mîkotowasî akotopetopo ke. Kotoporem wara nasî awosotî, arkaxapu wara. Ero ke aaxe naxe emasî komo.

4 Ow arko awakro. Yohno kaika. Taa, tamtakpon yaka oyar̂akn̂e tak kayaritomo. Tawake nas amna apoko. Tahwore amna nas awakro okre. Kir̂wan̂he nasî etîxe awehtopo, kes amna. Kir̂wan̂he xa nasî wooku yopo, kes amna.

5 On wara wîîkes awya so wooxam komo, Xerusaren pono komo, cicwiye nas opun. Wooxam yenpotho rma ow. Cicwiye nasî opun Keta pono komo mîn wara, Saromaw mîn yahruru wara marha.

6 Owî entîkara ehcoko cicwiye n̂he oyexirî ke. Kaamo opun n̂icwirei kica. Yememe mrerî komo nîrwonatken̂e opoko. Uupa yepu yatkacho poko oyantometken̂e okwe. Ero ke onatîrî ro pokohra rma wîxakn̂e okwe.

7 Ai, on wara wîîkes awya, yiixe xa oyehtopo amoro. Ahna maar̂a awoku oper̂a yînahmachome? Ahna n̂ereme awoku kamarakataw? Ahce kacho cesewoponso wai awakrono komo yoku panaw?

8 Ai ha, taa, on wara wîîkes awya hara, anarî wooxam komo yopono ro mak amoro cenporem. Oyoku nahmacho yenîhra awexitaw oper̂a wenatîkakî mak. Oyoku yenîche awoku tak eeko iina kabritu. Noro tak yînahmakî iito oyoku yenîn̂e komo mîn mîtwo.

9 On wara keen̂asî, yiixe oyehtopo, kawaru woosî wara keen̂asî. Kir̂wan kawaru komo nasî Paraw tararan yihxikn̂e komo. Noro yipu wara keen̂as okre.

10 Cenpore xa nasî awepatarî apanatarîn yotaw. Kir̂wan̂he marha ween̂as awarî.

11 Amn̂e anarî tak amna n̂iir̂asî apanatarîn hara. Ooru amna n̂iir̂asî ero me, prata ke tporokye amna n̂iir̂asî.

12 Taa, on wara wîxakn̂e ow hara kayaritomo yeseresmetaw, kotoporem ken̂e wîxakn̂e. Kîkotowakn̂e okre miya ro mak.

13 Miiha wara mak nasî yiixe oyehtopo owya, kapatu yawno wara. Omanatîrî yotaw n̂etakriyasî cenmakaxi ro.

14 Eena yepu yepemrutun wara marha nasî yiixe oyehtopo owya. En Xeci po nasî eena yepu, uupa chew, ero yepemrutun wara nasî noro owya okre.

15 On wara wîîkes ow hara, cenporem amoro, yiixe oyehtopo, cenporem xa okre. Potkuku yewru wara mak nasî awewru, wîîkesî.

16 On wara wîîkes ow apoko hara, cenporem marha amoro hara. Cerepora wasî awakro okre. Ketîrapotopo nasî tîxkukuyure katayarî wara.

17 Setru mîn kîmîn makwanan. Siprexte mîn kamru hara. Ero wara nasî kîmîn okre.