2
On warai ow, epemrutun mak ow Saron pono warai okre. Tumutwem warai marha ow epemrutun warai, woskara pono warai.2 Epemrutun warai rma noro, yiixe oyehtopo, cekyekyem chewno warai. Ero wara noro ween̂asî anarî emasî komo yakro exitaw.
3 On warai moso, yiixe oyehtopo hara owya, masan yepu warai, comota chewno warai. Ero wara xa noro ween̂asî kar̂pamxan komo yakro exitaw. Tpoxwe ro mak keremesî noro yawarpanaw. Tpoxwe marha nasî noro yeperîrî warai owya.
4 Keseresmacho ro yaka oyar̂akn̂e mîîmo yaka. Ooxe cehtopo n̂enpesî mîk hak ya bandeira wara.
5 Ow ka karihtocoko uupa ke, yuturpamnoxapu ke. Ow exporeko hara masan ke. Okar̂kesî mak yiixe oyehtopo rma.
6 Ohtîpîrî n̂ecehcesî noro tamorî ke poowa n̂ixan ke. Opun nahsîyasî eeco ke hara kaari ke.
7 On wara wîîkes awya so emasî komo, Xerusaren pono komo, yiixe oyehtopo men enpakara ehcoko. Tanme ro mak pakape amn̂e. Yaaro ero wara wîîkesî, kooso n̂entarî me tan wîîkesî, pixkaru n̂entarî me marha.
8 Entacoko ka, noro ha yiixe oyehtopo. Encoko xe, noro mokyasî okre. Îîpî yepore mak nahronas okyo, matîwîn yepore marha.
9 Pixkaru warai mak noro, yiixe oyehtopo, kooso warai, kar̂pamxan me cehsom warai. Noro ha, kîmîn wacanî mkai n̂ececeto. Ewkanapan yaro n̂een̂asî. Xwaraxwarano yotari rma n̂een̂asî.
10 Yiixe oyehtopo tak nîmtapota oyakro. On wara nîîka, Yiixe oyehtopo amoro, amok ha. Cenporem amoro, amok ha oyakro.
11 Cwotu yimawnonho tak n̂enahce okre. Entamko xe. Tuuna marha nîtîtmamye. Mokuhra tak nasî.
12 Epemrutun tak nas okre miya so. Kewanomacho me tak nasî, Potkuku tak kesî kewton panaw.
13 Piku yepu yeperîrî tak n̂etakîcesî ciki. Poxwasî tak uupa yatî yepemrutun. Ero ke amok ha cîwya, cenporem ha, oyakro amok ha, kekn̂e. Ero wara kekn̂e owya.
14 Potkuku warai mak amoro, toopu yetîmtakaxapu yawno warai. Îh po ceseyamsom warai amoro. Awewru yenî xe wasî. Amtapotakî on̂entarî. Tpoxwe nas amtapotarî owya okre, cenpore marha nas awewru okre.
15 Rokohci xîkrî ahsîcoko amna yanme. Uupa yatî yîwîrîman̂e mîk rokohci xîkrî kica. Cepemrutwe so nas amna natîrî uupa yatî. Ero ke rokohci xîkrî ahsîcoko.
16 Oyin̂o mîk yiixe xa oyehtopo, noro pici ow hara. Epemrutun chew tooku nînahmesî noro tumutwem chew.
17 Ai, on wara esko cenmakaxi ro, cekatpankaxi ro ha, yiixe oyehtopo amoro. Etaknamakî, pixkaru wara esko, kooso wara, kar̂pamxan me cehsom wara. Ero wara esko îh po, Bete pono po.