Taa, omtapotarî tan mewresî an̂enîrî komo. Kaanî mtapotarî yekatîmn̂e ow ha. Tapi pen mumutho ow, kayaritomo, Xerusaren pono. Noro yipu ow ha.

2 On wara wîîkesî, Tohnaw ro mak tas okwe, tohnaw ro mak tasî, wîîkes ow, Kaanî mtapotarî yekatîmn̂e ha. Tohnaw ro mak tasî, tohnaw ro mak okwe. Ahnoro nasî tohnawno me ro mak okwe, wîîkesî.

3 Cetapickexe xa tan roowo po, kaamo makataw. Ahce re tahsîyatu ketapickachonhîrî komo yepetho?

4 On wara taxe ahnoro tooto komo, tîtwaiyaxe. Ero yinhîrî kepamthîrî komo tak naxe hara kîhretawno me so. Ero yinhîrî n̂examro yepamtho komo tak naxe n̂examro yîhretawno me hara. Eroromerono me exihra taxe. Iito rorono me reha nasî roowo, kapon kom ha.

5 On wara nasî kaamo hara, n̂epatakes ha ka. Ero yinhîrî n̂emihcas hara. Ero yinhîrî yohno cesî cepatakachonhîrî pona xa hara.

6 On wara nasî ocowo hara, suu yaw roro ka cesî. Ero yinhîrî n̂etaknames hara, nohce yaw roro tak ces hara. Emapona roro n̂etaknamesî ocowo. Cesamathîrî yaw xa marha ces hara.

7 On wara nasî tuuna hara, tuuna imo kwaka nîhce tuuna yepu ahnoro. Copoyi ehtîkara rma tko nasî tuuna imo. Yaw xa marha n̂etîrames hara tuuna cehtoponhîrî pona hara.

8 Ahnoro mak nasî kpokaren̂e me okwe. Tîtpokexe ekatîmrî yopo ro mak okwe. Ero wicakî mak enî xe wasî, kahra ro mak nasî kewru komo miyan komo yenîche rma. Ero wicakî mak enta xe wasî, kahra marha nasî kpanarî komo miyan komo yentache rma hara.

9 Pahxan pen komo xatken̂e mîn hak pokono me, ero poko xa marha taxe kîwyam hara. Ero poko xa marha naxe kepamthîrî komo amn̂e. On wara kacho exihra nasî, Oroto tak pahxan pen komo warahra ro mak taxe, kacho exihra. Ero pokohra ro mak xatken̂e pahxan pen komo, kacho exihra marha nasî. Ero wa taxe ahnoro kaamo makatawno komo.

10 Nai ha katî poko kehtopo komo, On yipu pokohra ro mak xatken̂e pahxan pen komo, kacho? Pîra ro mak. Pahxanî ro mak mexe mîn ero wa kemyawno ciitopo ahnoro mak.

11 Pahxan pen komo yehtoponho nasî tîhcamnoso. Kepamthîrî komo n̂ewruyaxe amn̂e. N̂examro pen waihyaxe hara. Ehtoponhîrî komo poko meero naxe twen̂ekarî n̂examro pen yepamtho kom hara. Ero wa thakwa tas okwe.

12 Taa, kesekatîmyasî tan awya so. Kaanî mtapotarî yekatîmn̂e ow. Ixaw Yana komo kayaritomon marha owî, Xerusaren pono ha.

13 Pahxa on poko wîxakn̂e, ahce na poko tooto komo yehtopo yentîka xe wîxakn̂e. Takîhso ehtopo komo yenî xe wîxakn̂e, Ai ha, ero wa ma tai ke tooto, kachome owya. On wara tooto yehtopo ween̂akn̂e. Tawsîn̂em ke tîmponoyem wara kiir̂axe so Kaan okyo, wîîkesî tak.

14 Ahnoro ween̂akn̂e kaamo makatawno komo yemyawno, poko ehtopo kom ha. Tohnawno poko ro mak naxe okwe. Ocowo yahsî xatî wara mak naxe kopi.

15 Ahce na yetatukmache pexunkara thakwa taxe hara okwe. Ahce na exihra exitaw yukuknomara thakwa taxe okwe.

16 On wara kesehtînoyakn̂e, On warai xa ow, yaana me ehtîkaxapu ow. Ketakîrekn̂e marha pahxan pen komo yopo, Xerusaren pono komo yopo. Miyanî rma wîhtînoyakn̂e kakîhretopo mko. Miyan poko rma kehcamhokekn̂e marha mer̂pono pîn poko.

17 Ero yimaw kakîhretopo yentatîka xe ro mak wîxakn̂e. Tohnaw kehtopo yenta xe marha wîxakn̂e, wara mak kesehtînotopo yenta xe ha. Wara rma tohnaw ro mak tak ween̂akn̂e ero wa ketakîretopo, kehcamhokacho kom ha. Ocowo yahsî xe kehtopo marha mîn okwe.

18 Miyan poko rma ketakîretaw kahwokacho marha kepor̂axe so hara okwe. Miyan poko rma kehcamhoketaw miya xe xa marha kahwokacho n̂epamyas hara okwe. Ero wa thakwa tas okwe.