Taa, omtapotarî tan mewres ow hara an̂enîrî komo. Remuew ow ha. Kaanî mtapotarî rma tko tan mewresî yememe pen ya opanatanmetoponho.

2 On wara kekn̂e yememe pen owya, Ahce wa wîîke awya okopuci? Omrerî cik amoro okwe oropotainonho xa. Moso omrerî panatanmekyasî apoko mak, wîîkekn̂e Kporin komo ya apoko. Yaaro xa ero wa wîîkekn̂e yîwya. Ahce warai poko kpanatanmekya?

3 On wara xa wîîke awya, Kar̂pe awehtopo yukuhkara esko wooxam komo poko. Kayaritomo komo yar̂man̂e ro mak mîkyam wooxam komo tweeno pîn komo kica.

4 On wara marha wîîkes awya Remuew, on wara nasî kayaritomo panatanmetopo, kayaritomo wokru mera nasî kawaxiyem. Kayaritomo wokru mera ro mak men nasî kica. Kawaxiyem yerîhra ro mak n̂ehcowpe antomano rin̂e komo marha.

5 Kawaxiyem yerîche kayaritomo ya, kpanatanmetopo tak na nîhcamnoya kica. Ero ke emetanmexapu komo yepanpîra na nai okwe. Ero wa na nai kayaritomo kawaxiyem yerîche.

6 Kawaxiyem erpoko waihporono komo ya mak, ahwokatîkaxapu komo ya marha.

7 Noro yipu komo ya mak erpoko kawaxiyem cesemetanmetopo komo yîhcamnotome tak. Ahwora ro mak wasî okwe, kachonho tak na nîhcamnoya.

8 On wara marha wîîkes awya, anarî komo naxe yîmtapotan wara. Noro yipu komo yanme amtapotakî. Twaihkaxmu komo yukurunpeko amtapotarî ke rma.

9 Tîtken̂e mak exihra esko okopuci, takîhso en̂ekano cirko. Emetanmekno rin̂e komo en̂ekakî takîhso. Cesemetanmesom komo marha akronomakî amtapotarî ke. Ero wa esko.

10 On wara marha wîîkes awya okopuci, Onoke thakwa re kir̂wanî ro n̂een̂a wooxam cipici me. Noro yipu yeen̂ataw cepethîke xa nasî noro hubi yopo ro mak.

11 Noro yipu pona n̂een̂asî iin̂o esemetanmekîra cehtome.

12 Ciin̂o yakronoman̂e me nasî miya roro twaihtopo pona roro okre. Yîwîrîman̂e me exihra ro mak nasî.

13 On warai pokono me nasî kir̂wanî ro wooxam, oper̂a poci n̂epor̂asî tînahsîrî, riin̂u marha n̂epor̂asî. Tamorî ke n̂etapickesî tahwore.

14 Twarawantaxmu kanawarî wara nasî, mooxe cesî tînahrî ka.

15 Kosope rma ka pakesî tîhyawno komo nahmachome. Tanton komo marha nînahmesî wooxam komo.

16 Mararî marha men̂ekesî kir̂wan. Tupurantan pona tak nahsîyasî, warawanasî ahsîxapu pona. Ero tak nîmyasî tînatîrî yepetho me uupa petarî yepetho me ha. Ahsîche n̂iir̂asî tak tînatîrî me.

17 N̂ekaricesî xa cemyawno poko. Taporî rma karihcesî kar̂pe n̂he cehtome.

18 Takîhso warawanwasî cemyawno poko. Kir̂wan mak men̂ekesî. Tweyuru yeihkara marha nasî kosope.

19 Poono kahtopo nahsîyasî tamorî ke, mawîrka yekposîtopo marha nahsîyasî. Ero yipu poko nasî.

20 Cesemetanmesom komo ponaro nasî wakrechome so. Emyawnomnî komo yakronoman̂e me marha nasî.

21 Okwe, komsînaxe men ohyawno komo okwe, kahra nasî n̂eepe mokyataw. Cucurem yaw naxe yîhyawno komo, poono yaw komsîmra ehtome so.

22 Tîkaman yaam kahyasî tmewrem. Riin̂u kahxapu marha natpesî tponon me. Tîswayem marha natpesî tponon me.

23 Ewto potaw cesentaxmu komo nîhtînorî me nasî noro yipu yiin̂o. Poritomo komo yakro n̂eremesî cesentaxmu komo yakro.

24 Poono marha natpesî noro yipu wooxam. Riin̂u kahxapu xa natpesî epethîrî pona tîmsom ha. Aan̂apotu marha natpesî twarawantaxmu komo ya tîmsom.

25 Kar̂pe ehtopo nasî noro yipu ponon wara. Takîhsom me ehtopo marha nasî ero wara. Nahwowasî tak noro yipu amn̂e.

26 Takîhso tîmtapotaxmu me marha nasî. Wakreno ritopo poko panatanmekno n̂iir̂asî.

27 Tîhyawno komo ponaro marha nasî. Yuwun̂ura ro mak nasî ceseresmetaw meero.

28 Kir̂wan mîk yememe, kexe tak yîmxîkrî komo tpor̂mamche so. Iin̂o marha ero wa kesî. Nahwowasî cipici poko.

29 Kir̂wan̂he xa rma re xatken̂e wooxam komo mer̂pono pîn komo. Amoro xa kir̂wan̂he xa tak mas okre okopuci, wîîkesî noro yipu ya wooxam ya.

30 Kemîknoyasî mak cenporem me wooxam yehtopo. Ero pîntho me n̂he nasî yupun yenporitopo. On wara tko cexpore nasî wooxam komo, Kporin komo ponaro xa cexpore nasî. Kir̂wan mîkro okre wooxam, kacho me xa tak naxe noro yipu komo.

31 Ero wa ehxapu komo n̂iritho mak tîmko yîwya yîn̂enporî me. Tamorî ke yin̂irithîrî rma nasî ehtopo yekatîmn̂e me. Kir̂wan mîkro okre, kan̂e wara nasî. Ero wa kan̂e me nasî yin̂irithîrî. Iina mak nasî awakîretopo okopuci, kekn̂e. Ero wa tî kekn̂e Remuew yon tîmrerî ya.