Taa, omtapotarî mewres ow hara apanatanmetopo komo rma. Aku ow ha, Xake pen mumutho. Kaanî mtapotarî rma tan mewresî. On wara wîîkesî Iciew ya, Ukaw ya marha tan wîîkesî,

2 On warai ow, camkîno ro mak ow okwe. Camkî na re natu anarî komo. Owî xa tko wasî iyopo so camkî xa. Tooto warahra ro mak wasî camkî xa okwe.

3 Oyakîretopo yentan̂enho pîn ow okwe. Kir̂wanî ro yehtopo yentan̂enho pîn marha ow.

4 On wara tko wîîkes awya so, onoke xa wa cekn̂e kah yaka, ero yinhîrî nîhcekn̂e hara? Onoke xa ocowo nahsîyakn̂e tamoyeretarî ke? Onoke xa ahnoro tuuna womcekn̂e poono ke? Onoke xa roowo yenatîtopo n̂iir̂akn̂e? Onoke Noro yosotî? Onoke Yumumuru yosot hara? Mencet ha na?

5 Kicicme exihnî ro mak mîn Kaanî mtapotarî. Kporin komo nasî kecen̂an wara, tpona cetkurunpesom komo yecen̂an wara ha.

6 Noro mtapotachonho yîhremara men ehcoko amtapotarî komo ke. Ero ke yîhremetaw atwermes ha men. Cemarontaxmu me awenpexe so tak okwe.

7-8 Taa, Apa kah yawno, awakro cma re kîmtapowasî yiixe oyehtopo poko. Asak hak nasî yiixe oyehtopo. Ero cma re amenmekîra masî owaipîrarî ka. Tohnaw ekatîmn̂e komo cma re men̂epes ohyai, cemarontaxmu kom ha. On wara marha wîîkes awya, oyemyawno cma re epamnotîkara masî. Emyawnomnî me marha cma re ow cirihra masî. Oyecenarîno ke mak ow yînahmakî.

9 Cemyawnoi xa oyexitaw awanwekn̂e me tko na wehtîke kica. Onoke Mîk Kporin kom hara awya so? wîîke tak na kica. Emyawnomra ro mak oyexitaw hara cen̂epan̂em me na wehtîke hara kica. Kaan xatî pîn me tak na natu tooto komo opoyero rma okwe. Ero wa tak na wai cemyawnoi xa oyexitaw, emyawnomra ro mak oyexitaw marha, wîîkes awya Apa.

10 Taa, oyakno komo, on wara wîîkes hara awya so, tooto yanton yîwîrîyakara ro mak ehcoko antoman̂e n̂entarî me. Noro yipu yîwîrîyakache awya so on wara tak na nîîke anton Kaan ya apoko, Noro cma re mîwîrîmesî Apa, nîîke. Kaan tak na nîmtapowa apoko hara, Kicicme mas okwe, nîîke na apoko.

11 On wara kexe anarî komo tîîm komo ya rma kica, Awîrîma xe kr̂a wasî Kporin komo ya, kexe. Awakronoma xe wasî Kporin komo ya, kahra marha naxe tînocwan komo ya hara.

12 On wara naxe anarî kom hara, Kir̂wanî ro ow ha, kan̂e me naxe. Ero wa kan̂e komo rma naxe korokan me rma, kicicme rma naxe okwe.

13 On wara naxe anarî kom hara, kyopono me cesensom me naxe kica. Ewru komo rma n̂enpesî kyopono me esehtînotopo komo kica.

14 On wara naxe anarî kom hara, iyorî komo nasî kacipara wara. Mariya wara nasî iyopoturu komo oko. Ero wa nas iyorî komo cesemetanmesom komo yeskan̂e wara ehtome so. Emyawnomnî komo yermomn̂e wara ro mak naxe roowo po exihra ehtome so tak. Cesemetanmesom komo waparî me naxe tpoyinonhîrî komo chewra tak ehtome so okwe.

15-16 On wara nasî kamuxpa ciki kîkamxukru yeen̂e, cemsîkem wara nasî. Asak nas emsîrî warai. Owya xa tîmko, owya xa tîmko, kan̂e ro mak mîkyam emsîrî warai. Osorwaw xa nasî erepotanî ro komo. 4 xa nasî, N̂ex ha, ero wicakî mak eeko, kan̂e pînî ro komo. Wehto imo, yîmxîtanî ro wooxam, roowo, kir̂wan̂he tîpîhnî, wehto tak, Ero wicakî mak wakn̂iyasî, kan̂e pînî ro. Ero warai komo, N̂eexi tak ha, ero wicakî makî yiixe wasî, kan̂e pîn kom ha.

17 On wara naxe anarî komo, akpîntho me mak n̂een̂axe tîîm komo. N̂ewrexe marha tantometaw so tînocwan komo ya. Noro yipu komo yewtho tak nowyas amn̂e kwacinama. Yaimo xîkrî marha non̂esî. Ero wa nas amn̂e noro yipu komo yewtho oko.

18 Osorwaw nasî poko oyeserepokacho xa, 4 xa nasî, Ahce wa xa nai ero kopi? kacho owya.

19 Ero wa nas owya yaimo totopo kaikokoro, okoi totopo marha toh pore, kanawa imo totopo marha tuuna imo kwari, kîîrî yeserepokacho marha emasî poko. Ero yipu poko keserepokesî xa.

20 On wara reha naxe wooxam komo, tweeno pîn komo, n̂eseresmexe ha ka. Ero yinhîrî tîmtarî n̂ickexe. Kicicme exihra rma weexi, kexe kica.

21 Osorwaw nasî roowo pono komo yîwîrîman̂e komo. 4 xa nasî yînîmrî yarono pîn komo okwe tpoyino komo ya.

22 Ero wa nasî tooto yantonînho kayaritomo me cexiche tak hara kica. Ero wa xa marha nasî akpîn tmaxmitache hara kica.

23 Ero wa xa marha nasî wooxam, kîîxatî pînî ro, ciin̂o yahsîche tak. Ero wa xa marha nasî wooxam, tooto yantonînho, tantoman̂enhîrî yekenho yakan me cexitaw hara. Noro yipu nasî ahwokano rin̂e me xa okwe.

24 Taa, 4 naxe wahrai komo ciki, rooporeno ciki, takîhso cehsom komo rma ha tko.

25 Kar̂pen mîk min̂iri warai ciki. Kaamo yimaw tko tînahrî komo n̂enmekyaxe.

26 Kar̂pen marha mîk wiir̂a warai hara. Toopu yetîmtakaxapu yaka rma tko n̂esekenmesî.

27 Makaka warai kayaritomon exihra ro mak nasî. Iina re tko n̂etîywecexe emapipo.

28 Xokoko warai n̂etahsîyasî tamorî ke. Kayaritomo mîn yaw so rma nasî. Noro yipu komo naxe takîhso cehsom me xa.

29 Osorwaw naxe cenpore xa tîtosom komo, 4 xa nas ero wa tîtosom kom ha.

30 Reaw cesî cenpore xa. Kîî, kan̂e pîn me ro mak nasî noro onok na komo yeen̂ataw.

31 Kapikara hara, kîîrî, woosî n̂enîrî me cetar̂ataw, boce hara, kayaritomo hara cenpore cesî, iyoponkanî ro. Ero warai komo cenporem me xa cexe.

32 On wara marha wîîkes awya, anarimaw na akpîra mesehtînoi. Apoyino komo yopono me na mesehtînoi kica. Anarimaw apoyino komo yemetanmecho poko mesehtînoi kica. Ero wa ehxapunhîrî me awexitaw emtayahruko men awamorî ke.

33 Paaka mownu karmetaw katî tak n̂etamnonohyasî. Kewnarî yekmiyataw kamxukwasî tak oko. Ero wa xa marha tîrwon̂em yewrucpetaw kîwya so, kpoko so nîrwonasî tak men okwe. Ero wa nasî.