On wara naxe anarî komo, emapona roro tîtwermacho komo n̂encexe. Cetanwesom me rma tko n̂ehtîkexe kica. Noro yipu komo n̂ehcamnoyaxe ponan̂e rma okwe. Emahcira ro mak naxe okwe.

2 Kir̂wan komo exitaw antomano rin̂e me, tahwore naxe yînantomarî komo. Kicicitho komo reha exitaw antomano rin̂e me, cewru komo mak naar̂axe okwe yînantomarî komo.

3 On wara naxe yîîm komo takîhso exitaw so yumumuru komo, tahwore naxe okre. On wara tko naxe anarî komo mumuru, wooxam pokono me mak naxe kica, tweeno pîn pokono me. Noro yipu komo naxe tupurantan komo yukuhren̂e me mak okwe.

4 On wara naxe anarî komo kayaritomo komo, yaaro en̂ekano rin̂e me naxe okre. Ero wa exirî ke so cerepore naxe maywen komo okre. On wara reha naxe anarî kom hara, kayaritomo komo, cen̂ekaxmu komo nîmrî nahsîyaxe esen̂ekapora ro mak ehtamci. Ero wara exitaw kayaritomo cemaywenkaxmu me tak nas okwe.

5 On wara nîmtapowaxe anarî komo tpoyino komo yakro, Kir̂wanî ro xa amoro okre, kexe ro kyam mak. Tpoyino komo yemcinon̂e wara mak naxe ero wa kan̂e komo kica, yîhtarî komo yamxikn̂e wara ha.

6 On wara naxe anarî komo, cemcinosom warai me rma naxe Kaanî mtapotarî yanwekrî ke okwe. Kir̂wan komo reha n̂ewanomexe tahwotachome so okre.

7 On wara naxe kir̂wan komo, emyawnomnî yemetanmekn̂e komo yen̂ekacho ponaro naxe. Emyawnomnî yemetanmekn̂e komo yen̂ekacho ponarora ro mak naxe kicicitho komo reha.

8 On wara naxe anarî komo, ero pîntho wara mak n̂encexe kpanatanmetopo komo. Noro yipu komo yanme tko enmapuyem komo naxe cetanwesom me okwe. Takîhsom komo reha naxe yîrwoxinkano rin̂e me reha okre.

9 Anarimaw akpîn n̂eseseyukyasî takîhsom yakro. Ero wa eseseyukyataw so akpîn na nîmtapowa tîrwon̂em wara. Anarimaw n̂ewre mak hara na kopi. Tawake exihra rma naxe okwe etpoko. Ero wara naxe okwe.

10 On wara naxe waapa me cexi xatî komo, kicicme exihnî xatî pîn me naxe. On wara reha naxe takîhsom komo, kicicme exihnî komo nakronomexe okre.

11 On wara naxe akpîra cehsom komo, anarme exino yeen̂ataw yohno rma nîwîrîyakexe. Anarme exino yeen̂ataw takîhsom komo reha yohno ekatîmra naxe. Ero wa naxe.

12 On wara naxe anarî komo, kayaritomo komo, cemaro ponaro mak naxe kica. Ero wara exitaw so kicicme n̂ehtîkexe kica maywen komo ahnoro.

13 On wara naxe cesemetanmesom komo, emetanmekno rin̂e komo marha, Etîme re rma naxe. N̂examro yesamarî nasî Kporin komo nweiporî me re.

14 On wara naxe anarî komo kayaritomo komo, emyawnomnî komo yanme en̂ekano rin̂e me natu, yaarono me mak en̂ekano n̂iir̂atu. Ero wara exitaw so pahkî ro mak naxe kayaritomo me.

15 Takîhso n̂he tak naxe rikomo komo maxkatapaxapu komo, yîtwermaxapu kom ha. Kicicme men por̂mamyaxe rikomo komo tanme ro mak cehtopo yîhtînon̂e. Noro yipu komo tak naxe amn̂e tînocwan komo yîhyapamnon̂e me okwe.

16 Kicicitho komo n̂epamtîkexe anarimaw. Ero wa exitaw so kicicme n̂ehtîkexe poyino komo meero okwe. Wara rma kicicitho pen komo n̂etwîrîmexe rma tak amn̂e kir̂wan komo wero ro rma.

17 Amumuru komo panatanmecoko kir̂wan̂he. Ero wa panatanmexapu komo tak awerepokara n̂he naxe, awahworexe so xa matko okre.

18 Kporin komo mtapotarî yentara ro mak exitaw so anarî rowon pono komo, twerîhra ro mak n̂ehtîkexe okwe. Tawake tko naxe kpanatanmetopo yewetîn̂e komo reha.

19 On wara naxe kanton komo anarimaw ahce wa na cexitaw so, On wara xa yo ehcoko, tîtketu na yîwya so. Kewetîra rma naxe kîmtapotarî yanme mak. N̂ence rma na re, ewetîra mak naxe okwe.

20 On wara na meen̂atu apoyino komo, yohno ro mak keyukn̂e me na meen̂atu. Ero wa wîhtînoyas ow ha, kan̂e me na nai yohno ro mak. Noro yipu komo naxe epanatanmekpon me n̂he okwe. Wara n̂he re n̂epanatanmekyaxe akpîn komo rma yohno keyukn̂e mera cexitaw so.

21 On wara na matu awanton komo poko, amumuru komo wara rma na miir̂atu. Mehxa ro rma ero wa miir̂atu, yîmrenai ro. Ero wara ciriche amumuru me rma tak nas amn̂e tpor̂mamîche.

22 On wara naxe yîrwonpontho yakrono komo, Ceseseyusom me mak tak n̂ehtîkexe yîrwonpontho poyero rma. Emapona roro kpanatanmetopo nanwekyaxe tîrwon̂em komo okwe.

23 Akpîn me cehtîkexe kpoyino komo yopono me kesehtînoyataw so. Kir̂wan mîkro okre, kacho me reha tasî anarî komo xawyakan me kesehtînoyataw.

24 On wara nasî cen̂epan̂em yakrono, cetwaika xatî wara nasî kopi. On wara kesî takrono ya, Yaarono mak tan wekatîmyasî, Kaan n̂entarî me xa tan wîîkesî, kesî yîwya. Ahce wa so na cehtopo komo yekatîmra rma tko nas okwe.

25 Tooto pona keraswataw so ero rma nasî kemcinotopo warai me okwe. Kporin komo pona enîn̂e me kexitaw so reha tukurui xa taxe okre.

26 Mer̂pora naxe kayaritomo yakro tîmtapota xatî komo, Oyemetanmekn̂e cma re men̂ekesî, ka xatî kom ha. Kporin komo xa tko nasî yaaro xa kepanîn̂e me.

27 Poxumra ro mak naxe kicicitho komo kir̂wan komo ya. Poxumra xa marha naxe kir̂wan komo kicicitho komo ya hara okwe. Ero wa naxe.