1-2 Taa, tawake kehtopo tan wekatîmyas awya so. On wara cexpore nasî tawake kehtome so, Kaan xatî pîn komo mmtapotarî ewetîra cexpore nasî, kicicme cehsom komo yakrono ro me exihra marha cexpore nasî, kir̂wan komo yîwîrîyakara marha cexpore nasî. Kporin komo ya kpanatanmetopo ponaro xa matko cexpore nasî, tpoxwe ro mak centapore nasî. Ponaro cexpore roro nasî katpanaw, kosope marha. Ero wa kexitaw so tawake taxe okre.

3 On wara tak kiir̂axe so Kaan noro yipu komo, weewe wara kiir̂axe so tuuna yepu yecihtawno wara. On wara nasî weewe ecihtawno, n̂eperwasî roro epetatopo me exitaw. Aawaipîra marha nasî. Ero wa xa marha kiir̂axe so Kaan. Ahce poko so na kexitaw so ehn̂an me ro mak kiir̂axe so.

4 Ero warahra reha naxe Kaan ponarono pîn komo, puruma pîpîtho wara mak naxe kica. Puruma pîpîtho naar̂asî kr̂a ocowo, ero wa xa marha naxe Kaan ponarono pîn komo, ocowo narîrî wara mak naxe okwe.

5 Ero ke en̂ekano riyataw Kaan ya, Kir̂wan komo amyamro, kacho mera ro mak naxe noro yipu komo. Kir̂wan komo yesenmekyataw yîchew so exihra ro mak naxe. Ero wara naxe Kaan ponarono pîn komo.

6 Kir̂wan komo yesamarî yenîn̂e me nasî Kporin komo. Kaan ponarono pîn komo yesamarî reha nasî waihtopo komo yakan me okwe. Ero wa nasî.