Taa, kayaritomo komo poko tan kîmtapowas hara. Ahce poko Xenciu kayaritomon komo n̂etîrwonmekyatu kopi? Ahce kacho tohnawno poko mak n̂esencet okwe?

2 Kporin komo yanwecho poko mak n̂esencexe kica. Ero warai poko n̂esencexe kayaritomo komo, roowo poko hakno komo. N̂esenmekyaxe cesentachome so Kporin komo nîhkapetho poko, waihkacho poko mak okwe. Ero wa naxe okwe Kporin komo n̂iritho poko, kayaritomo me yin̂irithîrî poko ha.

3 On wara kexe kica, Kimin̂e wara mak nasî kica Kporin komo n̂iritho kayaritomo. Tawotocerî kr̂a kimicithîrî, tar̂macerî marha kr̂a, kexe kica. Ero wara kexe kayaritomo komo.

4 Kah yaw rma tko nasî Kporin komo ceremaxi. N̂ewresî mak Noro ero wa kan̂e komo poko. Tohnaw ro mak n̂esencexe kopi, kesî poko so.

5 Ero yinhîrî tak tîrwon̂e n̂examro pen n̂eeyasî hara. Nîrwonasî ro mak poko so, ero ke n̂erahtîmtîkexe Noro pona.

6 On wara kesî yîwya so, Onîhtînoputho men wiire kayaritomo me. Siaw yîpîn pona wekenmai oyekenî ro pona, kesî. Ero wa kesî Kporin komo kayaritomo komo ya.

7 Taa, on wara kesî Kporin komo mumuru, On wara kekn̂e Kporin komo owya hara, Yaaro xa tan wîîkesî, Omumuru xa Amoro. Oroto xa tak Aamo me was ha, kekn̂e owya.

8 On wara marha kekn̂e owya, On wara kasko owya, Ai, Apa, ahnoro mîk hak maywen komo xe was omaywen me, roowo mapitawno komo xe meero wasî, kasko owya. Ero wa kache awya amaywen me rma tak wiir̂asî miyan komo rma ahnoro, kekn̂e owya.

9 N̂examro pen tak makuhr̂apesî ro mak, awamoyin ke rma metapesî, kuripara warai ke. Mîcor̂or̂omesî ro mak parakwecitho wara, kekn̂e marha owya, kesî Kporin komo mumuru.

10 Ero ke on wara wîîkes awya so, kayaritomo komo amyamro. Ero ke takîhso men esehtînocoko awehtopo komo poko. Roowo pono komo yen̂ekan̂e komo amyamro hara awya so marha wîîkesî. Aweronomacho komo men ewetîcoko.

11 Kporin komo ewetîcoko. Twerî tak men Noro poko ehcoko. Ahwotacoko rma re tatan̂e mak ha tko.

12 Kaan mumuru men ewcokacoko yîrwomra tak ehtome Noro apoko so. Noro yîrwonîmîche na apoko so mîwaiyaxe men okwe esama yaw rma ka awexitaw so. Yohno men Noro yewetîn̂e me ehcoko wahra yîrwonataw ro ha ka apoko so. Tpona enîn̂e komo wakren̂e Mîk Noro okre. Ero ke ero wa ehcoko Kaan mumuru poko. Ero wa wîîkes awya so.