Taa, pahxa tî xakn̂e Usu pono, Xoo tî mîk xakn̂e noro osotî. Kir̂wan tî mîk xakn̂e okre, Kicicitho mîkro kica, kacho pînî ro mak. Kaan ponarono tî mîk xakn̂e, kicicitho xatî pînî ro mak.

2 7 tî xatken̂e noro mumuru komo, 3 tî xatken̂e emsîrî kom hara.

3 Mer̂pora ro makî tî xakn̂e iyoh komo. Oper̂a tî xakn̂e 7.000, kameru tî xakn̂e, 3.000, bui tî xakn̂e 500, taknoye re cehsom komo, 500 marha tî xakn̂e buhu, woosî re. Ero wicakî tî xakn̂e noro yoku. Mer̂pora marha tî xakn̂e anton komo. Cemyawnoi xa tî mîk xakn̂e noro anarî komo yopono, resce n̂ixan komo yopono.

4 On wara tî xatken̂e Xoo mumuru komo amn̂e xa so, erewsî tî n̂iir̂atken̂e takno komo yakro ceseresmatopo komo. Anarî cokorî ka n̂iir̂akn̂e, ero yinhîrî anarî n̂iir̂akn̂e hara, anarî xa hara n̂iir̂akn̂e, ero wara n̂iir̂atken̂e ceseritîkaxi ro. Kaamo marha tî nukuknometken̂e, Noro mîn yaw tak ceseresmacerî ero kaamo po, kacho tî. Ero ke ero po tak cepeka komo tî nan̂ikyatken̂e takro so eseresmachome, wooku yeetome marha.

5 Yaake kaamo tî n̂eseresmetken̂e Xoo xîkrî komo. Eseresmatîkache so on wara takî tî xakn̂e yîîm komo, tîmxîkrî komo nan̂ikyakn̂e. Mokuche so n̂examro yehtoponho yahrutopo tî n̂iir̂akn̂e roro. Pahxaxaro tî pakekn̂e. Ero yimaw tî tokuthîrî puntho nakn̂iyakn̂e Kaan ya tîmsom me. Anarî pun ka nakn̂iyakn̂e poturu yehtoponho yahrutome. Ero yinhîrî anarî tî nakn̂iyakn̂e ponan yehtoponho yahrutopo hara, ero wa so tî tokuthîrî pun nakn̂iyakn̂e tîmxîkrî komo cirihtîkaxi ro. On wara tî kekn̂e Xoo, Ahce wa na xatken̂e omumuru komo, kicicme so na. Kicicme so na nîmtapowatken̂e okwe Kaan poko tîropotaw so. Ero ke n̂examro yakir̂wamachome tan wakn̂iyasî Kaan ya tîmsom ha, kekn̂e ha tî. Ero wara roro tî xakn̂e Xoo.

6 Taa, anarî kaamo po takî tî Kaan xîkrî komo n̂esenmekyatken̂e Kporin komo yaka. Iina esenmekyataw so tî Satanas marha mokyakn̂e akro so kica.

7 Ero ke on wara tî kekn̂e Kporin komo Satanas ya, Ai, Satanas, ahn̂i xa mîmoko? kekn̂e tî yîwya. Roowo pore etarixapu ow, miya xiya wara etarixapu ha, kekn̂e tî.

8 Ai ha, kekn̂e tî Kaan. Taa, oyanton na meen̂e iito, Xoo ha, noro yehtopo na meen̂e? Anarî exihra ro mak nasî noro warai roowo pono. Kicicme nasî kica, kacho pînî ro mak mîk, takîhsom xa. Kaan ponarono marha mîk ha, kicicitho xatî pîn marha, kekn̂e tî yîwya.

9 On wara tko tî n̂eyukyakn̂e Satanas, Epethîrî pona mak mexe Kaan ponaro nasî.

10 Noro mîwacantoi esemetanmekîra ro mak ehtome. Yîhyawno komo marha mîwacantoi, emyawno komo marha, ahnoro mîwacantoi. Ehn̂an me ro mak noro miir̂asî emyawno poko. Mer̂pora ro mak nasî iyoh komo, miya so cetakpaxi nasî roowo pore.

11 Taa, noro yemyawno etapakî awamorî ke. Ahnoro yîwîrîmakî yîmton me. Ero yinhîrî tak kicicme ro mak tak nîmtapowasî apoko awepatai rma, kekn̂e tî Satanas Kaan ya kica.

12 Ero ke on wara tî n̂eyukyakn̂e Kporin komo, Taa, ahnoro noro yemyawno tak wîmyasî awemyaka. Awanme ro mak cirko. Yupunu tko apehra men esko, kekn̂e tî. Ero wa tî kekn̂e Kporin komo Satanas ya. Ero ke cekn̂e takî tî Satanas Kporin komo yai.

13 Taa, ero yinhîrî takî tî anarî kaamo po Xoo mumuru komo n̂eseresmetken̂e xa hara potuthîrî mîn yaw. Wooku marha tî n̂eer̂atken̂e iito. Akro so marha tî n̂eseresmetken̂e epeka komo.

14 Ero yimaw tak waapa yekaiporen̂e takî tî mokyakn̂e Xoo yaka. On wara tî kekn̂e yîwya, Apa, mararî pomorî poko n̂eexi amna awanton kom ha. Paaka ke amna poomo. Iito marha n̂eexi buhu komo meyehra, cuupu yahrî poko.

15 Ero yimaw tak mohcow Sabew komo waapa me kopi. Paaka pen naatîkacow ahnoro okwe, buhu pen marha. Awantonînhîrî pen komo waihkacow kacipara imo ke oko. Ow makî cma kemahciw ekatîmtome, awya, kekn̂e tî.

16 Ero yipu yekatîmyataw rma anarî takî tî mokyakn̂e hara. On wara tî kekn̂e noro hara, Apa, Kaan wehtorî n̂epîrka kah yai oco. Awokuthîrî pen nakn̂itîka oper̂a. Amna pen marha nakn̂itîka awantonînhîrî pen okwe. Ow mak kemahciw ekatîmtome awya, kekn̂e tî.

17 Ero wa ketaw rma anarî xa hara mokyakn̂e. On wara kekn̂e noro hara, Apa, waapa komo mohcow okwe Kawtew komo. Osorwaw yatî mohcow. Kameru pen nahsîcow, naacow marha. Awantonînhîrî pen komo waihkacow kacipara imo ke oko. Ow mak kemahciw ekatîmtome awya, kekn̂e tî.

18 Ero wa ketaw rma anarî tak mokyakn̂e hara. On wara kekn̂e noro hara, Apa, on wara n̂ehcow amumuru komo, awemsîrî komo marha. N̂eseresmacow amumuru mîn yaw, tpoturu komo mîn yaw, wooku marha n̂eecow.

19 Ero yimaw rma tak ocowo imo moko mehxa axawa imo n̂ixa. Yîmînthîrî tak nahsî okwe eknutaw. Ero yanme mîîmo pen tak n̂emacaka amxîkîthîrî pen komo pona okwe. Waihtîkacow okwe. Ow makî cma kemahciw ekatîmtome awya, kekn̂e tî yîwya. Ero wa tî ketken̂e Xoo ya.

20 Ero yipu yentache takî tî piiri nawomyakn̂e Xoo. Tpononthîrî takî tî nahxaikekn̂e, n̂ehpokekn̂e marha. Ero yinhîrî roowo pona takî tî n̂esewnapekn̂e. Kir̂wan̂he xa Kaan yehtopo poko makî tî nîmtapowakn̂e.

21 On wara tî kekn̂e, Ponomra ro mak kewruyakn̂e onocwan ropotai. Ponomra marha kîwce haram iina hara. Oyemyawno nîmye Kporin komo, oroto tak now hara. Kir̂wanî ro me cekaiporesom me ro mak n̂expe Kporin komo yosotî, kekn̂e. Ero wara makî tî kekn̂e.

22 Ero yipu chew rma tî kicicme yîmtapotara ro makî tî xakn̂e Xoo. Kicicme ro mak nasî Kaan kica, kahra ro makî tî xakn̂e. Ero wa tî xakn̂e Xoo.