Pahxa kayaritomo xakn̂e, Asueru tî mîk xakn̂e noro yosotî. Miyan komo kayaritomonî rma tî mîk xakn̂e. Inca pona rorono komo kayaritomon mîk xakn̂e, Eciopia pona rorono komo kayaritomon marha. 127 xakn̂e yîrowon raco mko.

2 Ero yimaw Susan xakn̂e kayaritomo yewton. Twacayem mîn xakn̂e ewto, Susan ha. Iito xakn̂e Asueru yapon, kayaritomo me esenpotopo ro. Ero po roro tî n̂eremekn̂e.

3 Taa, ero yinhîrî tak osorwaw cimn̂ipu xakn̂e kayaritomo me Asueru yehtoponho. Ero yimaw tak erewusmano n̂iir̂akn̂e. Pehsia komo n̂erewusmekn̂e, Mecia pono komo marha. Tmaywen komo nan̂ikyakn̂e enîno rin̂e kom ahnoro. N̂examro maywen komo marha nan̂ikyakn̂e. Sowtatu yantoman̂e komo marha nan̂ikyakn̂e, tîrowon raco mko yenîn̂e komo marha. Noro yipu komo nan̂ikyakn̂e eseresmachome so.

4 Taa, eseresmetaw so cemyawno tak n̂enpekn̂e kayaritomo tînan̂ikîthîrî komo ya. Mer̂pora ro mak xakn̂e noro yemyawno. Cepethîkem komo xa mîn xakn̂e. Tîmîn marha n̂enpekn̂e yîwya so kir̂wanî ro, tponon marha n̂enpekn̂e. Ero wa cehtopo n̂enpekn̂e. Kayaritomo me xa cehtopo n̂enpekn̂e yîwya so, cemyawnoyem me cehtopo marha. Pahkî ro mak n̂enpekn̂e ero yipu yîwya so, 180 kaamo.

5 Ero wicakî kaamo yenatîche tak erewusmano n̂iir̂akn̂e xa hara kayaritomo. 7 kaamo n̂eseresmetken̂e xa hara. Mer̂pora xatken̂e ceseresmaxmu komo ero yimaw Susan po. Miyan komo rma n̂erewusmekn̂e cemyawnoyem komo, emyanomnî komo marha. Kayaritomo natîrî yewtî tî xakn̂e. Ero mîtwo xakn̂e yîhroron. Roro po erewusmano n̂iir̂akn̂e tîmîn mîtwono po rma.

6 Ero yimaw tîmîn porokutopekn̂e kayaritomo poono ke anarmerpan ke so. Riin̂u kahxapu xakn̂e takriso mînto mînto wara mapata poko. Tumutwe so xakn̂e ero riin̂u kahxapu, tîswaye so marha. Toopu xakn̂e hara mapata, mahmore enporixapu. Prata ciixapu xakn̂e poono yahsîtopo, riin̂u kahxapu yahsîtopo. Iito marha xakn̂e kama warai mer̂pono pîn. Ooru ciixapu mîn xakn̂e ha, prata ciixapu marha. Toopu mko enporixapu mîn xakn̂e kayaritomo roron, anarmerpan komo toopu ha, cepethîkem kom ha. Cicwiye so xakn̂e toopu, tumutwe so marha. Ero wara xakn̂e toopu kayaritomo roron me ciixapu.

7 Parakweci marha xakn̂e mer̂pora, an̂ihxapu komo wokru yen ha. Ooru ciixapu mîn xakn̂e. Anarmerpa mîn xakn̂e parakweci. Mer̂pora ro mak wooku n̂irpekn̂e kayaritomo erewusmano rin̂e ro me cexirî ke.

8 Tanmero so makî tî wooku n̂eer̂atken̂e an̂ihxapu komo. Ero wara tî kekn̂e kayaritomo wok mîtîn komo ya. Tanme ro so mak wooku n̂eecowpe, kekn̂e tî yîwya so.

9 Wooxam komo marha tî n̂erewusmekn̂e kayaritomo pici. Pasci xakn̂e noro yosotî. Kayaritomo mîn yaw hara tî n̂examro n̂erewusmekn̂e, Asueru mîn yaw.

10 Taa, 7-nhîrî kaamo po tak tahwore xa takî tî xakn̂e Asueru wooku yerîrî ke. Ero ke takronoman̂e ro komo tî nantomekn̂e, 7 kom ha, ewnuku me cehsom kom ha. On wara xakn̂e n̂examro yosotî, Meuman, Bista, Ahbona, Bikta, Abakta, Seeta, Kahkas, ero wa xakn̂e n̂examro yosotî.

11 On wara tî kekn̂e kayaritomo yîwya so, Ai, amyamro, etocoko opici yan̂ihso, Pasci yan̂ihso. Kayaritomo pici yarokorî yaw mokope. Wooxam yenpotho me noro yehtopo yenpo xe wasî kayaritomo me cehsom komo ya, esenmexapu komo ya ahnoro, kekn̂e tî yîwya so. Cenporem xa tî mîk xakn̂e kayaritomo pici.

12 Ero ke cetken̂e kayaritomo yakronoman̂e komo yipici yan̂ihso. Kayaritomo mtapotachonho tko tî nanwekyakn̂e yipici. Mokuhra tî xakn̂e okyo. Ero ke nîrwonakn̂e xa takî tî kayaritomo.

13-15 Ero ke takî tî kayaritomo n̂esencekn̂e xa hara panatanmekno ritopo yîhtînon̂e ro komo yakro, cesentayem komo yakro. En̂ekano ritopo poko ehcamhokaxapu komo yakro n̂esencekn̂e roro kayaritomo, kpanatanmetopo pokono yakro marha. Yîmtapotarî komo ponaro tî xakn̂e. On wara xakn̂e n̂examro yosotî, Kahsena, Seta, Acmata, Tahsis, Meres, Mahsena, Memukan, 7 me xatken̂e. Pehsia komo mîkyam xatken̂e, Mecia pono komo marha mîkyam xatken̂e anarî komo. Antomano rin̂e me cehsom komo mîkyam xatken̂e anarî komo yopo. Ero ke on wara tî kekn̂e yîwya so, Ahce wa kapore nai opici ya, Pasci ya? Kayaritomo ow ha, omtapotarî nanwekî kica ewnuku komo n̂ekatîmîtho yîwya. Ahce wa nîîke panatanmekno ritopo mewrexapu noro yipu poko awya so? kekn̂e tî yîwya so.

16 On wara takî tî n̂eyukyakn̂e Memukan kayaritomo n̂entarî me, antomano rin̂e komo n̂entarî me marha, On wara ow wîhtînoyasî, kayaritomo yîwîrîman̂e me rma re n̂eexi apici Pasci, awîrîman̂e mak pîn me ha tko. Ahnoro kayaritomo me cehsom komo yîwîrîman̂e me marha n̂eexi kica. Miyan komo yîwîrîman̂e me rma n̂eexi ahnoro arowon pono komo yîwîrîman̂e me kica.

17 Apici ya awanwetoponhîrî men n̂encexe amn̂e wooxam komo miyan komo rma kopi. Ero ke tak ciin̂o komo nîwîrîyakexe hara kopi. On wara kexe, Cipici cma re nan̂ikye kayaritomo Asueru. Pasci tî mîk nan̂ikye. Mokuhra tko tî xakn̂e, kexe men okwe.

18 Oroto rma kayaritomo pici yehtoponho tak men n̂encexe Pehsia wosîn komo, Mecia pono komo wosîn marha. Ero ke ero wa xa marha naxe ciin̂o komo poko hara kica. Enîno rin̂e me cehsom pici komo rma men ero wa naxe. Miyan komo rma ciin̂o komo nîwîrîyakexe. N̂eseiyaxe marha okwe ciin̂o komo yakro.

19 Ero ke on wara cma re wîîkes ow, kir̂wan̂he exitaw awya, panatanmekno ritopo me cma re mîmtapowasî. Amtapotachonhîrî tak mîmewrepesî Pehsia komo panatanmetopo me, Metu komo panatanmetopo me marha. Etowîn me ro mak nasî ero wa mewrexapu. On wara kacho cma re mîmewrepesî, Mokuhnî me ro mak tak n̂expe Pasci kayaritomo yaka Asueru yaka, kacho cma re mîmewrepesî. Ero yinhîrî anarî tak meen̂asî kayaritomo pici me cehsom hara, kir̂wan tak.

20 Ero wa kacho yentamexpoche tak miyan komo ya rma arowon pono komo ya, ciin̂o komo ponaro tak naxe wooxam komo. Ero wa tak naxe cemyawnoyem komo pici, emyawnomnî komo pici marha, kekn̂e. Ero wa tî kekn̂e Memukan yîwya.

21 Kir̂wan̂he tî n̂encekn̂e yîmtapotarî kayaritomo, antomano rin̂e komo marha. Ero ke ero wara kacho rma tî mewrepekn̂e kayaritomo Memukanî mtapotachonho yaw roro rma.

22 Ero yinhîrî takî tî tîkaritan narpekn̂e kayaritomo tîrowon raconho pono komo yaka, miyan komo yaka rma. Miyan komo n̂enîrî me rma narpekn̂e. Anarî yana komo mtapotarî yaro mewrepekn̂e yîmtapotarî ro yaro entachome tak ero yipu kukman̂e komo ya. On wara kacho narpekn̂e, Ai, omaywen komo amyamro, on wara men wîîkes awya so, kîrkomo n̂ehcowpe cipici komo yantoman̂e me, tîhyawno komo yantoman̂e me ahnoro, kacho ha. Ero wa kacho tî narpekn̂e kayaritomo.