Taa, ero kaamo po rma Moises karitan nîmtapotaretken̂e esenmexapu komo n̂entarî me. On wara kacho nîmtapotaretken̂e, Esenmekîra ro mak men n̂ehcowpe Amonita komo Ixaw Yana komo yakro Kaan yakan me esenmekyataw so. Ero wa xa marha esenmekîra n̂ehcowpe Moabita kom hara, kacho nîmtapotaretken̂e.

2 Ero wa esenmekîra n̂ehcowpe noro yipu komo on wara ehtoponhîrî komo yanme, Ixaw Yana komo tî iyurmara xatken̂e n̂examro Exitu poi mokyataw so, wokpara marha tî xatken̂e tuuna ke. Baraaw xa matko nan̂ikyatken̂e Ixaw Yana komo yeremkan̂e me okwe. Eremka xe ehtoponhîrî tko naknamekn̂e Kaan n̂examro yakronomacho me hara okre, kacho nîmtapotaretken̂e.

3 Ero wa kacho yentache esenmexapu komo ya anarî yana komo tak n̂en̂epetken̂e ahnoro tîchei so. Ero wa en̂epeno n̂iir̂atken̂e Ixaw Yana komo.

4 Taa, on wara tî xakn̂e Eriasibe, Kaan yaka cewomsom, Kaan ya tîmxapu yenîn̂e me marha xakn̂e, Kaan mîn yawno yenîn̂e me ha. Tobias yakronoman̂e me tko tî xakn̂e okwe.

5 Tobias yamtakpon me tî nîmyakn̂e Eriasibe. Tîmsom pokono komo nahrî yîmtotoponho mîn xakn̂e. Iina ka n̂enmekyatken̂e Kaan ya tîmxapu, puruma yatho, sepata yatho, kotoporem, Kaan mîn yawno mko, cisimu me tîmxapu puruma yatho, sepata yatho marha, uupa yukun ciixan, aseci, ero wara. Repita komo ya tîmsom n̂enmekyatken̂e iina, waano yaan̂e komo ya tîmsom, metata yenîn̂e komo ya tîmsom, tîmsom pokono komo ya tîmsom. Ero mko naar̂akn̂e Eriasibe anana Tobias yamtakpon me tak ehtome hara okwe.

6 Ero yimaw tko Xerusaren po exihra wîxakn̂e. Kayaritomo yenso kîwcekn̂e, Ahtaxexe yenso, Babiron̂a pono komo kayaritomon yenso. 32 cimn̂ipu tî xakn̂e kayaritomo me noro yehtoponho, ero yimaw kîwcekn̂e. Pahkî n̂he wîxakn̂e iito. Ero yinhîrî kesekatîmyakn̂e kayaritomo ya hara. Kîwces hara, wîîkekn̂e tak yîwya. Taa, etok hara, kekn̂e owya.

7 Ero ke Xerusaren pona kmokyakn̂e hara. Ero yimaw tak kicicme Eriasibe yehtoponho wencekn̂e. Okwe, wîîkekn̂e ro mak, Tobias yamtakpon me nîmye ham kica Eriasibe. Kaan mîn yawno rma nîmyakn̂e noro yeken me kica, wîîkekn̂e.

8 Ero ke kîrwonakn̂e ro mak. Tobias yemyawno ahnoro warpetîkekn̂e kr̂a hara Kaan mîn yai.

9 Ero yinhîrî Kaan mîn yawno yenîn̂e komo wantomekn̂e amtakpo yakir̂wamarî poko hara. Akîrwamache Kaan mîn yawno mko wekpekn̂e hara iina. Kaan ya tîmsom marha wekpekn̂e puruma yatho, sepata yatho marha, kotoporem marha. Ero wa wekpekn̂e iina hara.

10 Taa, ero yinhîrî on wara ween̂akn̂e hara, Repita komo ya tîmsom tîmîhra ehtopo ween̂akn̂e. Exihra tak xakn̂e iito Repita komo, waano yaan̂e komo marha exihra Kaan mîn pokono kom ha. Tmararîn komo pona totîkace haram okwe.

11 Ero ke antomano rin̂e komo wen̂ekekn̂e. On wara wîîkekn̂e yîwya so, Ahce kacho Kaan mîn nai pohnî me hara okwe? wîîkekn̂e yîwya so. Ero yinhîrî tak Repita komo wan̂ikyakn̂e hara, waano yaan̂e komo marha. Emyarîrî ro komo poko tak wantomekn̂e xa hara.

12 Ero yinhîrî tak cisimu me tîmsom tak n̂ekyatken̂e xa hara Xuta yepamtho komo ahnoro. Puruma yatho raconho, sepata yatho raconho, wooku raconho ciixan ha, aseci poyino, ero mko n̂ekyatken̂e xa hara Kaan ya tîmsom yamtakpon yaka.

13 Ero yinhîrî tak kîrkomo wiir̂akn̂e Repita komo nahrî yenîn̂e me. Serebias mîk wîîr̂akn̂e, Kaan yaka cewomsom mîk xakn̂e noro, Satoke marha wiir̂akn̂e ero pokono me. Kpanatanmetopo mewren̂e ro mîk xakn̂e noro. Repita komo marha wiir̂akn̂e ero pokono me, Petaias ha ka. N̂examro yakrono marha wiir̂akn̂e Anan, Saku mumuru ha, Matanias parî mîk ha Anan. N̂examro wiir̂akn̂e ero pokono me kemîknon̂e pîn me exirî ke so poyino komo ya. Tpoyino komo nahrî yekamtopo pokono me wantomekn̂e. Ero ke ero pokono me tak xatken̂e n̂examro.

14 Ero yinhîrî on wara wîîkekn̂e Kaan ya, Apa kah yawno, oyehtopo ponaro cma re masî. Amîn wakir̂wamapo, ero pokono komo nahrî yekamn̂e komo wiire. Awanorî yaan̂e komo marha wantomai waano yaatopo poko. Ero wa owya ciitoponho yîhcamnopîra cma re mas Apa, wîîkekn̂e. Ero wa wîîkekn̂e.

15 Ero yimaw marha on wara tak ween̂akn̂e anarî kom hara, Xuta yepamtho komo, kepokaretopo po kaamo po rma uupa yeperîrî yewkukacho poko xatken̂e okwe. Puruma yeputho yenmekrî poko marha xatken̂e anarî kom hara, awrutamixapu yenmekrî poko ha. Buhu mkahsî marha nakriyatken̂e wooku, eenî mko yawno ha. Uupa yeperîrî, piiku yeperîrî, mîn hak mak nakriyatken̂e buhu mkahsî. Ero yipu tak n̂ekyatken̂e Xerusaren pona kepokaretopo po rma okwe. Ero ke on wara wîîkekn̂e ekn̂e komo ya, Ero yipu pokohra ro mak tak ehcoko kepokaretopo po okwe. Ero po warawantara ro mak ehcoko kica, wîîkekn̂e yîwya so.

16 Ciru pononho komo marha xatken̂e iito Xerusaren po. Ootî n̂ekyatken̂e. Ero yipu poko marha warawanwatken̂e kepokaretopo po rma kica Xuta yepamtho komo yakro.

17 Ero ke Xuta yepamtho yantoman̂e komo wen̂ekekn̂e. On wara wîîkekn̂e yîwya so, Ahce kacho kicicme mat hara kica? Kepokaretopo komo mîwîrîmexe kica.

18 Ero wara rma tko tî xatken̂e kporin pen komo okwe. Ero wa exirî ke so kîwîrîmacho xa tak n̂ekmexpekn̂e Kaan, kewton komo yîwîrîmacho marha. Kaan mîrwonmetîkexe amyamro hara Ixaw Yana komo poko ero pîntho wara cirirî ke kepokaretopo komo, wîîkekn̂e yîwya so.

19 Ero yinhîrî tak kepokaretopo ponan po kaamo po Xerusaren wacan metatan wahrupekn̂e awarpanwataw. On wara wîîkekn̂e metata yenîn̂e komo ya, Metata men ka ahrunkara ro makî ehcoko. Kepokaretopo komo yenatîche mak ahrunkacoko hara, wîîkekn̂e. Omaywenî ro komo marha wantomekn̂e metata yenîrî poko. On wara wîîkekn̂e yîwya so, Tîmponoyem komo men porohkacoko metata mkaî rma, kepokaretopo po mokuhra ro mak ehtome so oona ewto pona, wîîkekn̂e.

20 Wara rma twarawantaxmu komo mokyatken̂e rma kepokaretopo ponan po. Waaca mkaî mak n̂enmayatken̂e. Cewn̂e ro mak ero wa mokyatken̂e anarî komo, asakî ro mokyatken̂e anarî kom hara okwe.

21 Ero ke noro yipu komo weeyakn̂e. On wara wîîkekn̂e yîwya so, Ahce kacho waaca mkai menmayatu kica? Kepokaretopo po men mokuhra ro mak ehcoko. Ero wa amokuche so xa hara kahruyaxe so men okwe, wîîkekn̂e. Ero ke mokuhra tak xatken̂e twarawantaxmu komo kepokaretopo po.

22 Repita komo marha wantomekn̂e metata yenîrî poko. On wara wîîkekn̂e yîwya so, Etakir̂wamacoko amyamro hara. Ero yinhîrî etocoko metata mîtkoso. Kepokaretopo po twarawantaxmu komo mokyataw so porohkacoko hara Kaan ponaro mak kehtome so ero po, wîîkekn̂e. Ero yinhîrî Kaan yakro tak kîmtapowakn̂e xa hara. On wara wîîkekn̂e yîwya, Apa kah yawno, ero wa oyehtoponho yîhcamnopîra cma re masî. Opînîn yawno me cma re masî amna pînîn yawno ro me awexirî ke, wîîkekn̂e. Ero wa wîîkekn̂e Kaan ya.

23 Ero yinhîrî tak Xutew komo ween̂akn̂e anarî yana wosîn ke cihyem komo. Astocita komo wosîn ke, Amonita wosîn ke, Moabita wosîn ke, ero warai wosîn ke cihyem komo ween̂akn̂e okwe.

24 Anarî xîkrî komo nîmtapowatken̂e Astocita komo mtapotarî yaro, anarî yana komo mtapotarî yaro nîmtapowatken̂e anarî xîkrî kom hara. Xutew mtapotarî yaro kahra thakwa xatken̂e okwe.

25 Ero ke yîîm komo weeyakn̂e. Kaan nîwîrîmarî me men maxe okwe, wîîkekn̂e yîwya so. Anarî komo wetapekn̂e oyamorî ke, wîhpokekn̂e marha re oco. On wara wîîkekn̂e yîwya so, Awemsîrî komo men tîmîhra ro mak ehcoko anarî yana komo mumuru ya. Noro yipu komo yemsîrî ahsîra marha ehcoko amumuru komo pici me, apici komo me marha ahsîra ehcoko. Taa, ero warahra tak wasî, kacoko tak owya. Yaaro men kacoko Kaan n̂entarî me.

26 Ero wa xa marha kicicme tî xakn̂e Saromaw pen, Ixaw Yana kayaritomon pen. Kir̂wan̂he ka xakn̂e noro anarî yana kayaritomon komo yopo ro mak. Yiixe Kaan yehtoponho xa mîk xakn̂e. Ahnoro Ixaw Yana komo kayaritomon me noro n̂iir̂akn̂e Kaan. Noro yipu rma tko n̂ikiciciretken̂e anarî yana wosîn komo kica.

27 Ahce kacho awehtopo tak n̂esence hara okwe, kicicme xa awehtopo kom ha. Kaan yanwetopo rma mîn anarî yana wosîn yahsîtopo awya so okwe, wîîkekn̂e yîwya so.

28 Iito rma xakn̂e Xoiata mumuru, Eriasibe parî ha. Noro rma xakn̂e Sambarace yemsîrî yin̂o me okwe, Orono pono yemsîrî yin̂o me ha. Ero ke noro wen̂epekn̂e ohyai.

29 Ero yinhîrî on wara wîîkekn̂e Kaan ya, Apa kah yawno, n̂examro poko twen̂ekano wara exihra esko. Amîn yenîn̂e komo nîwîrîmexe kica. On wara cma re kexe, Kaan yanme mak wasî Noro mîn yenîn̂e me, Repita komo yemyawno pokono me marha, kexe cma re. Ero wa kan̂enho rma kicicme mak n̂esenpexe ero yipu poko cehsom komo, wîîkekn̂e.

30 Ero wa tîmsom pokono komo wakir̂wamekn̂e. Anarî ponarono komo wen̂epekn̂e yîhyai so. Kaan mîn yenîn̂e komo marha wantomekn̂e emyawno ro komo poko so. Ero wa xa marha Repita komo wantomekn̂e hara, emyawno ro komo poko so hara.

31 Anarî komo wantomekn̂e takn̂isom kamerî yenmekrî poko. Ehtopo ro yimaw xa tak enmecoko, wîîkekn̂e yîwya so. Anarî komo wantomekn̂e xa hara mararî pono yeperîrî yenmetopo poko Kaan mîn yaka, yihcirî me epetaxapu yenmetopo poko ha. Enmetopo ro yimaw so xa ero enmecoko, wîîkekn̂e marha yîwya so hara. Ero wa wîîkekn̂e. Ero yinhîrî on wara wîîkekn̂e Kaan ya, Apa kah yawno, oponaro cma re masî oyakronomachome, wîîkekn̂e. Ero wa wîîkekn̂e Kaan ya.