Taa, pahxa tî Siru xakn̂e Pehsia komo kayaritomon me. Ero yimaw noro takî tî Kporin komo n̂iir̂akn̂e Xuta yepamtho komo ponaro xa. N̂examro yen̂epetopo ponaro xa tî xakn̂e, ekenhîrî komo pona en̂epetopo ponaro. Ero wa tî noro n̂iir̂akn̂e Kporin komo tîmtapotachonhîrî yaw roro rma ehtome Xuta komo. Xeremiasî mtari kekn̂e ero wa kacho yaw roro n̂examro ciri xe xa tî xakn̂e. Ero ke tîmtapotarî takî tî n̂ekatîmyakn̂e Siru tmaywen komo ya miyan komo ya rma. Ero wa kacho marha tî mewrekn̂e yîn̂enîrî komo me.

2 On wara tî kekn̂e, Ai, omaywen komo amyamro, on wara wîîkes awya so. Siru ow ha akayaritomon komo, Pehsia komo kayaritomon ha. On warai me oriyakn̂e ham Kporin komo Kaan, kah yawno ha, kayaritomo komo kayaritomon me oriyakn̂e. Roowo poko hakno komo kayaritomon me oriyakn̂e. Noro rma tak nîmtapowakn̂e oyakro. On wara kekn̂e owya, Ai, Siru, omîn cirpoko Xerusaren pona Xuta komo rowon pona, kekn̂e owya. Ero wa kekn̂e Kporin komo owya.

3 Ero ke on wara wîîkes awya so, ahto matu amyamro Noro yanan komo? Kaan nakronomarî me awexi xe so wasî, ponaro awehtopo komo nakronomarî me. Oroto tak awto xe so wasî Xerusaren pona, Xuta rowon pono pona. Iina tak ciri xe wasî Kporin komo mîn awya so, ponaro Ixaw Yana komo yehtopo mîn ha. Kaanî ro xa Mîk Kporin komo. Xerusaren pona yîmîn ciri xe was awya so.

4 On wara marha wîîkesî tohnî komo ya hara, tîtosom komo exitaw amîtwono komo noro yipu komo men wakrecoko. Prata tîmcoko yîwya so, ooru marha. Ahce na mko tîmcoko yîwya yiixe ehtopo komo. Iyoh komo marha tîmcoko yîwya so. Awanme ro so marha tîmcoko ahce na mko yîwya so Kaan mîn ciitome yîwya so, Xerusaren pono ciitome. Ero wara men ehcoko, kacho tî n̂ekatîmyakn̂e Siru. Ero wa kacho tî mewrepekn̂e miyan komo n̂enîrî me rma. Ero wa tî xakn̂e Siru.

5 Ero ke Xerusaren pona tîtotopo komo takî tî nîhtînoyatken̂e Xuta yepamtho komo, Benxamin yepamtho komo marha. Noro re cehsom yantoman̂e komo tî nîhtînoyatken̂e. Mer̂pora tî xatken̂e iina tîtotopo yîhtînon̂e komo. Tîmsom pokono komo marha tîtotopo komo nîhtînoyatken̂e, Repita komo marha. Kaanî rma tî n̂examro n̂iir̂akn̂e iina totopo komo ponaro. Ero ke tîtotopo komo nîhtînoyatken̂e. Kporin komo mîn ciiso tîto xe xatken̂e, Xerusaren pono ciiso ha.

6 N̂examro tî nahworetken̂e yîmîtwono komo marha. Yîwya so tî nîmyatken̂e prata ciixapu mko, ooru ciixapu mko, ahce na cepethîkemu mko, mîn hak nîmyatken̂e yîwya so emyawno komo. Tookuthîrî komo marha tî nîmyatken̂e yîwya so. Kporin komo ya tîmsom marha tî nîmyatken̂e yîwya so. Ero wa tîtosom komo nahworetken̂e yîmîtwono komo. Tanmero tîmsomu mko marha nîmyatken̂e yîwya so.

7 Kporin komo mîntho yawnonho marha tî n̂en̂emhatakekn̂e Siru. Pahxa erotho yawnonho tî naar̂akn̂e Nabukotonoso Babiron̂a pona. Ponaro cehtopo mîn yaka tî n̂iir̂akn̂e. Ero mko tî n̂en̂emhatakekn̂e hara Siru.

8 Mitîretace tî nantomakn̂e ero yen̂emhatakacho poko kayaritomo purantan yenîn̂e. En̂emhatakache nîmyakn̂e takî tî Sesbasa ya, Xuta komo yenîn̂e ya. Nukuknomekn̂e tîmyataw yîwya, Ero wicak ham, kachome.

9-10 On wicakî tî nîmyakn̂e yîwya, 30 paayu porin, ooru ciixapu, 1.000 paayu porin, prata ciixapu hara, 29 mariya, 30 basia, ooru ciixapu, 410 basia, prata ciixapu hara. Mîn hakî mko marha tî nîmyakn̂e yîwya, 1.000.

11 Yaake xakn̂e ooru ciixapu mko, prata ciixapu mko marha, 5.400 tî xakn̂e. Ero mko takî tî naar̂akn̂e Sesbasa Babiron̂a poi, Xerusaren pona. Ixaw Yana komo yakro rma tî naar̂akn̂e, waapa narîthonho komo yakro. Ero wa tî naar̂akn̂e noro.