Taa, kayaritomo komo yehtoponho rma tan wekatîmyas awya so. Saromaw yehtoponho tan wekatîmyasî yihcirî me ha kapu. On wara tî xakn̂e Saromaw, Tapi pen mumutho, noro ponaro xa takî tî n̂ehtîketken̂e maywen komo. Kporin komo tî noro nakronomekn̂e, ponaro noro yehtopo rma. Kayaritomo ro xa mîkro, kacho me tî n̂iir̂akn̂e noro. Ero wa tî Saromaw n̂iir̂akn̂e Kaan.

2 Ero yimaw takî tî on wara xakn̂e Saromaw, Ixaw Yana yenîn̂e komo tî nan̂ikpekn̂e ahnoro. Sowtatu yantoman̂e komo nan̂ikpekn̂e, 1.000 yantoman̂e komo, 100 yantoman̂e komo marha, en̂ekano rin̂e komo meero, tîyanan komo yantoman̂e kom ha. Ahnoro enîno rin̂e komo tî nan̂ikpekn̂e.

3 Ero yinhîrî takî tî Xibeon pona cekn̂e Saromaw, Ixaw Yana komo marha cetken̂e noro yakro. Îh pona tî cetken̂e iitono pona. Iito tî xakn̂e Kaan yakro esentacho ro komo. Pahxan tî mîn xakn̂e Moises pen n̂irpotho rma, Kporin komo yanton pen n̂irpotho ha. Axawa imo po exitaw so tî n̂irpekn̂e. Ero yaka tî cetken̂e Saromaw komo.

4 Kaan yamatanî reha tî xakn̂e Xerusaren po. Pahxa rma tî Tapi pen n̂aar̂akn̂e iina Kiriace Xearin pononho. Xerusaren pona tî n̂iir̂akn̂e yîmîn roona mak. Ero yaka tî Kaan yamatan naar̂akn̂e Tapi pen.

5 Xibeon po reha tî xakn̂e Kporin komo ya tîmsom yakn̂itopo, bronse ciixapu ha. Besarew pen n̂iritho tî mîn xakn̂e, Uri pen mumutho n̂iritho ha, Uru pen parînho n̂iritho ha. Ero reha tî xakn̂e Kporin komo mîn mîtwo. Ero yaka tî cekn̂e Saromaw. Ixaw Yana komo marha cetken̂e noro yakro. Kporin komo mtapotarî yentaxi tî wa cetken̂e iina.

6 Kporin komo ya tîmsom yakn̂itopo yaka tî cekn̂e Saromaw, Kporin komo mîn mîtwono yaka. Kesentacho mîtwo xakn̂e. Ero yaka tî cekn̂e. Iito tak tokuthîrî pun nîmyakn̂e takn̂itîkaxmu me, 1.000 komo pun ha.

7 Ero yimaw takî tî kosope, Kporin komo rma tî n̂esenpekn̂e Saromaw ya. On wara tî kekn̂e yîwya, Ai Saromaw, yiixe awehtopo ka etacko. Ahce xa wîmya awya ha? kekn̂e tî yîwya.

8 Ero ke on wara tî n̂eyukyakn̂e Saromaw, On wara wîîkes awya Apa, apapa pen makronomekn̂e ro mak okre. Oroto tak ow miir̂e hara kayaritomo me apapa pen retawno me.

9 Ero ke on wara wîîkes awya Apa, amtapotachonhîrî yaw roro rma tak ow cirko, apapa ya mîîkekn̂e ero yaw roro ha. Mer̂pono pîn kayaritomon me ow miire ham. Axawa pupun wara ro mak naxe okyo omaywen komo yukuknomarî yopo ro mak.

10 Ero ke yuhnarino yîhtînon̂e me cma re ow miir̂asî. Mîn hak poko camkîno pîn me marha ow cirko. Ero wa ow cirko takîhso oyehtome moxam wero ro. Ahna so na owcetaw, ahn̂i xa omokyataw marha ero wa ow cirko. Onoke thakwa re ayanan komo yehtopo nîhtînoya takîhso. Mer̂pono pîn mîkyam, kekn̂e tî yîwya. Ero wa tî kekn̂e Saromaw Kaan ya.

11 Ero ke on wara tî Saromaw n̂eyukyakn̂e Kaan, Taa, kir̂wan̂he xa amtapotarî wencesî. Kir̂wan ponaro mex ham okre. Tupurantai xa oyexi xe wasî, cemyawnoi marha, kahra meexi. Cekaiporesom me xa oyexi xe wasî, kahra marha meexi. Ooxatî pîn komo yar̂man̂e ro me oyexi xe wasî, kahra marha meexi. Pahkî ro makî oyexi xe wasî waipîn me, kahra marha meexi. Ero yipu yetacira meexi. Yuhnari yîhtînon̂e me mak oyexi xe wasî, mîn hak poko camkîno pîn me marha oyexi xe wasî, mîîka mak. Ero wa oyexi xe wasî, mîîka oyanan komo yenîn̂e me awehtome. Oyanan komo kayaritomon me kiire, n̂examro yehtopo yîhtînon̂e me awexi xe mai ham okre, takîhso yîhtînon̂e me ha.

12 Ero ke yuhnari yîhtînon̂e me tak kiir̂asî, mîn hak poko camkîno pîn me marha. Tupurantai meero marha kiir̂asî, cemyawnoi marha. Cekaiporesom me xa kiir̂asî. Cekaiporesom me rma re xatken̂e anarî kayaritomo komo pahxan pen komo. Cekaiporesom me marha naxe anarî komo xa hara amn̂e ahretawno komo. Iyopono me so tko kiir̂asî cekaiporesom me xa tak, kekn̂e tî. Ero wa tî kekn̂e Kaan Saromaw ya.

13 Ero yinhîrî takî tî Xerusaren pona n̂etîramekn̂e hara Saromaw. Kporin komo yakro esentacho ro mokyakn̂e, Xibeon pono yai, îh pono yai. Kporin komo yakro esentacho komo mîtîn̂i mokyakn̂e. Ero ke on wara takî tî xakn̂e noro, Ixaw Yana komo yentopo poko takî tî xakn̂e.

14 On wara marha tî xakn̂e Saromaw, tarara takî tî nahsîyakn̂e mer̂pono pîn. Tarara yaan̂e komo marha tî nahsîyakn̂e tmaywen me. 1.400 tî xakn̂e noro tararan, 12.000 tî xatken̂e tarara yaan̂e kom hara. Noro yipu komo tî n̂ekenmekn̂e tarara yewtonî ro pona so. Tîmîtkoso marha tî n̂ekenmekn̂e anarî kom hara Xerusaren pona rma.

15 Prata marha tî n̂epamnoyakn̂e Saromaw Xerusaren pona mer̂pora cehso ro. Ooru marha tî n̂epamnoyakn̂e. Tohkarara wara ro mak tak xakn̂e iito mer̂pora. Setru yepu marha tî n̂epamnoyakn̂e iina. Sikomoro yepu wara ro mak takî tî xakn̂e, tuuna yecihtawno wara mer̂pora ro mak.

16 Kawaru marha tî n̂ekpekn̂e Saromaw Exitu poi. Noro maywen komo tî nahsîyatken̂e epethîrî pona, on wicakî nasî epethîrî kacho ro pona ha.

17 Exipsiu komo tararan marha tî nahsîyatken̂e epethîrî pona, 600 sikru pona so. Kawaru tî nahsîyatken̂e 150 sikru pona so. Kayaritomo maywen komo tî ero yipu nahsîyatken̂e, Ixaw Yana komo yaka tî n̂ekyatken̂e. Ero yinhîrî takî tî tînahsîthîrî komo nîmyatken̂e hara Ixaw yana komo Etew kayaritomon komo ya, Siriu kayaritomon komo ya marha. Ero wa tî warawanwatken̂e Saromaw maywen komo.