On wara marha tî kekn̂e Tapi esenmexapu komo ya, Kaanî n̂etacitho rma re moso omumuru Saromaw kayaritomo me. Kar̂pamxan me makî tko ka nasî ahce na ciitopo poko enpamra ka. Mer̂pora ro mak nas an̂irirî komo, Kaan mîn, ero yawno mko marha. Tooto mîn pîn mîn ha, Kporin komo mîn xa matko, ponaro kehtopo mîn ha.

2 Kekaricekn̂e ro mak Kporin komo mîn me ciisom yenmekrî poko. Ooru wenmekye ahce na me ciisom. Prata marha wenmekye ahce na me ciisom hara. Bronse marha wenmekye ahce na me ciisom hara. Pehu wenmekye ahce na me ciisom hara. Sahsamaxapu wenmekye ahce na me ciisom hara. Toopuci enporixapu mko marha wenmekye oon̂ixi, tpepeyurem, cucurem, tîswayem, anamerpan wenmekye mer̂pora toopuci. Mahmore marha wenmekye enporixapu. Mer̂pora wenmekye.

3 Ponaro oyehtopo mîn ciitopo ponaro xa wasî. Ero ke mehxarpa ekpoxapu mak pîn wenmekye Noro mîn me ciisom. Oyemyawno ro poyino meero marha wîmye ero me ciisom, ooru, prata.

4 3 miw tarentu wicakî wîmye ooru, Opi pononho okre. 7 miw tarentu wicakî wîmye prata, akir̂wamaxapu. Ero yipu wîmye mîîmo wacan yîmkarinomacho me.

5 Ooru wîmye ahce na me ciisom, prata marha wîmye ahce na me ciisom hara. Mîn hak me n̂iir̂axe ciin̂e ro komo. Ero ke on wara wîîkes awya so, onoke xa n̂etîmya hara Kporin komo ya oroto? kekn̂e tî Tapi yîwya so.

6 Ero yinhîrî takî tî cemyawno komo nîmyakn̂e hara esenmexapu komo tanme ro so rma. Tîyanan komo yantoman̂e komo, tribu yantoman̂e komo, 1.000 yantoman̂e komo, 100 yantoman̂e komo, kayaritomo yemyawno yenîn̂e komo, ero warai komo tî nîmyatken̂e cemyawnonhîrî tanme ro so rma.

7 Ooru tî nîmyatken̂e 5 miw tarentu wicakî, 84 kiru wicakî xa hara. Prata marha tî nîmyatken̂e 10 miw tarentu wicakî. Bronse tî nîmyatken̂e 18 miw tarentu wicakî. Pehu tî nîmyatken̂e 100 miw tarentu wicakî. Ero wicakî tî nîmyatken̂e Kaan mîn me ciisom, ero yawno me ciisom marha.

8 Anarî komo yaw tî xakn̂e toopuci enporixapu. Ero tî nîmyatken̂e Kaan mîn yawno yenîn̂e ya, cepethîkem yenîn̂e ya. Xeiew tî mîk xakn̂e ero mko yenîn̂e me, Xehson yepamtho. Ero ke noro ya tî nîmyatken̂e.

9 Ero wa tîmîche nahwowatken̂e takî tî esenmexapu komo. Kporin komo ponaro makî tî xatken̂e. Tanme ro so tî nîmyatken̂e, tahwore marha tî. Ero ke nahwowatken̂e. Tapi marha tî nahwowakn̂e, nahwowakn̂e ro makî tî.

10 Ero yinhîrî takî tî Kporin komo yakro nîmtapowakn̂e Tapi esenmexapu komo n̂entarî me. Kir̂wan̂he Noro yehtopo poko nîmtapowakn̂e. On wara tî kekn̂e, Kir̂wan̂he xa mai ham Apa okre, amna yîîm xa Amoro, ponaro Ixaw komo yehtopo ha. Kir̂wan̂he mai ham okre, kapore roro nas awya miya roro yîtîhkan me ro mak.

11 Amoro xa kyopono ro Apa. Amoro xa karitî, Kir̂wan̂he xa mai ham okre, kacho, aaxatî pîn yar̂man̂e, kayaritomo xa. Noro yipu Amoro. Awyan me nasî kah yawno komo ahnoro, roowo pono komo marha ahnoro. Kayaritomo xa Amoro Apa. Miyan komo yantoman̂e rma Amoro.

12 Ahyawno rma mak amna nahsîyasî tupurantan. Amoro mak amna miir̂asî kyopono me cekaiporesom me. Miyan komo kayaritomonî rma Amoro, etpoyino pîn kayaritomon ha. Karitî xa mîn awamorî. Ero ke rma amna mîkaricesî. Amoro mak amna miir̂asî kyopono me.

13 Ero ke on wara kes amna awya Apa, ponaro amna yehtopo Amoro. Kir̂wan̂he xa mai ham okre. Kir̂wan xa marha mîn awosotî, kan̂e me nas amna.

14 Anarî komo xawyakan makî tko ow, anarî komo xawyakan marha moxam omaywen komo. Amna rma tko n̂etîmyasî awya tanmero so. Ahyainonho mak mîn ahnoro amna yemyawno. Awemyawnonhîrî poyino mak tan amna nîmyas hara awya.

15 Anarî yana warai mak amna awya. Ekemnî me tîtosom komo mak amna awero ro. Ero wa xa marha tî xatken̂e amna porin pen komo. Ahce na yekatî warai mak amna, kaamo n̂enpotho warai. Eroromerono mîkyam, kacho pînî ro mak amna okwe.

16 On wara marha wîîkes awya Apa Kaan, amna rma re nîîm awya amna yemyawnonho mer̂pono pîn. Amîn me ciisom tan amna nîîm, awosotî yekenî ro me ciisom ha. Kir̂wanî ro xa awosotî. Awemyawno rma tko on amna nîmrî awya, awyanî ro rma on ahnoro.

17 On warai me marha keen̂asî Apa, amna ropotarî yenîn̂e me keen̂asî. Kîr̂wan̂he amna meen̂asî kir̂wan me exitaw amna. Ero ke kir̂wan̂he cehsomu rma ow on wîmya awya. Oyanme ro mak on wîmye awya. Tawake marha wasî ayanan komo poko, oona esenmexapu komo poko. Tanme ro xa marha tîmrî ween̂asî yîwya so hara, awya tîmrî ha.

18 On wara marha wîîkes awya Apa, ponaro amna porin pen yehtopo Amoro, ponaro Abraaw yehtopo, ponaro Isake yehtopo, ponaro Xako yehtopo, noro yipu Amoro. Awya cetîmsom me roro moxam cirko miya roro yîtîhkan me ro mak. Aponarono me xa cirko. Ero wa xa moxam cirko.

19 Omumuru marha cirko aponarono me mak, Saromaw ha. Amtapotachonhîrî yewetîn̂e me roro cirko, amna panatanmetopo yewetîn̂e me roro ha. Amîn ciitopo ponaro marha cirko, ciisom wenmekyakn̂e mer̂pora ero ciitopo ponaro cirko, kekn̂e tî. Ero wa tî kekn̂e Tapi Kporin komo ya.

20 Ero yinhîrî takî tî on wara kekn̂e Tapi esenmexapu komo ya, Taa, amyamro makîrha amtapotacoko Kporin komo yakro, ponaro awehtopo komo yakro. Kir̂wan̂he mai ham okre, kacoko yîwya, kekn̂e tî. Ero ke ahnoro esenmexapu komo takî tî nîmtapowatken̂e Kporin komo yakro, ponaro tporin pen komo yehtopo yakro. Kir̂wan̂he mai ham okre, ketken̂e tî yîwya. Nutupenwatken̂e tî, n̂esewnapetken̂e marha tî Kporin komo mamakan me, kayaritomo mamakan me marha.

21 Ero yinhîrî takî tî enmapuche hara Kporin komo ya tîmsom nakn̂iyatken̂e. Takn̂itîkaxmu tî nakn̂iyatken̂e. 1.000 bui pun, 1.000 kahn̂eru pun, 1.000 oper̂a xîkrî pun marha. Ero yakro tîmsom marha tî wooku narketken̂e. Mer̂pora ro makî tî nakn̂iyatken̂e Ixaw Yana komo nîmîtho, etpoyino pîn nîmîtho ha.

22 Ero yinhîrî takî tî n̂eseresmetken̂e ero kaamo po rma. Wooku marha tî n̂eer̂atken̂e. Tahwore tî n̂eseresmetken̂e. Saromaw takî tî n̂iir̂atken̂e xa hara kayaritomo me. Tapi mumuru tî mîk noro n̂iir̂atken̂e kayaritomo me. Tantoman̂e komo me tî nîhkapetken̂e Kporin komo yeepataw rma. Satoke marha tî nîhkapetken̂e Kaan yaka cewomsom me hara.

23 Ero ke kayaritomo yapon pona takî tî n̂eremekn̂e Saromaw Kporin komo yanan komo kayaritomon me. Tîîm retawno me tî iina n̂eremekn̂e. Ehn̂an me takî tî xakn̂e noro ahce na poko, cemyawno poko. Noro takî tî n̂ewehcatken̂e Ixaw Yana komo ahnoro.

24 Ixaw Yana komo yantoman̂e komo marha tî n̂ecir̂atken̂e Saromaw yewetîn̂e me. Noro xa amna n̂ewehcasî anwekîn me ro mak, ketken̂e tî. Yaaro xa tî ketken̂e. Ero wa xa marha tî ketken̂e sowtatu komo, karitî kom ha. Tapi mumuru komo marha tî ero wa ketken̂e.

25 Kayaritomo ro me xa takî tî Saromaw n̂enpekn̂e Kporin komo Ixaw Yana komo ya. Kayaritomo ro me tî n̂iir̂akn̂e anarî komo yopo, pahxa Ixaw Yana kayaritomon me xatken̂e n̂examro yopo. Ero wa tî Saromaw n̂iir̂akn̂e Kporin komo.

26 Taa, ero wa tî xakn̂e Tapi, Xese pen mumutho. Ahnoro Ixaw Yana komo kayaritomon me tî xakn̂e.

27 40 cimn̂ipu tî xakn̂e Ixaw Yana komo kayaritomon me. 7 cimn̂ipu tî xakn̂e kayaritomo me Ebron po. 33 cimn̂ipu tî xakn̂e kayaritomo me Xerusaren po hara.

28 Ero yinhîrî takî tî waihyakn̂e okwe. Poritomo me rma xakn̂e. Cemyawnoi tî xakn̂e. Kir̂wan mîkro, kacho me marha tî xakn̂e. Waipuche yumumuru takî tî xakn̂e kayaritomo me yîhretawno me hara, Saromaw ha.

29 Miya rma tî nai Tapi pen yehtoponho. Tmewreso nas ahnoro, kayaritomo me ciixan me ka ehtoponhîrî, miya roro waihtopo ponaro ro ehtoponhîrî hara. Ahnoro ehtoponhîrî nasî tmewreso Samuew nmewretho yaw, Kaan n̂enporî yenîn̂e ro nmewretho yaw ha. Natan nmewretho yaw marha nasî. Kweronoman̂e tî mîk xakn̂e Natan. Kace nmewretho yaw marha nasî. Kaan n̂enporî yenîn̂e ro tî mîk xakn̂e Kace.

30 Kayaritomo me noro yehtoponho nasî tmewreso, karitî me xa ehtoponhîrî. Ahce wa so na ehtoponhîrî nasî tmewreso, Ixaw Yana komo yehtoponho marha, mîk hak rowon pono komo yehtoponho marha nasî tmewreso. Ero wa nasî tmewreso Tapi pen yehtoponho karita mko yaw. Iina makî ka nai ekatîmtopo.