Taa, ero yinhîrî on wara tî xakn̂e Tapi, Ixaw Yana komo takî tî nan̂ikpekn̂e Xerusaren pona. Enîno rin̂e komo re nan̂ikpekn̂e, tribu yaan̂e komo, sowtatu raconho yantoman̂e komo, kayaritomo yanme ahce na yenîn̂e kom ha, 1.000 yantoman̂e komo, 100 yantoman̂e komo, kayaritomo yemyawno yenîn̂e komo, yumumuru komo yemyawno yenîn̂e komo, mîn hak yenîn̂e komo, karitî komo, erasîn komo marha. Ero warai komo tî nan̂ikpekn̂e Xerusaren pona.

2 Ero yimaw takî tî piiri tî nawomyakn̂e Tapi tîmtapotachome tak esenmexapu komo yakro. On wara tî kekn̂e yîwya so, Ai oyakno komo, oyanan komo amyamro ahnoro, kîmtapowasî cma re ka awakro so, on wara wîîkes awya so, Pahxa ka mîîmo ciri xe wîxakn̂e, Kporin komo mtapotachonho yen mîn ha, miya miya wara arîhnî me tak ehtome yîmînma xe wîxakn̂e. Kporin komo tarî yapon warai mîn ha yîmtapotachonho yen. Ero ke ero me ciisom wenmekye ha re.

3 On wara tko kekn̂e Kporin komo owya, Oyosotî mîn cirihra esko amoro. Waapa me toxapu roro thakwa amoro, kamxuku yen̂epen̂e roro ha. Ero ke omîn cirihra esko amoro, kekn̂e owya.

4 Wara rma on wara oriyakn̂e Noro rma Kporin komo, ponaro Ixaw Yana komo yehtopo, omen̂ekekn̂e Ixaw Yana komo kayaritomon me, eroromerono me ha. Anarî oyanan komo men̂ekara xakn̂e. Xakn̂e rma re yaake. Ow xa men̂ekekn̂e. Xuta yepamtho komo tî men̂ekekn̂e kayaritomo me cepamsom me, apapa mumuru komo marha tî men̂ekekn̂e kayaritomo yakno me, ow tak men̂ekekn̂e kayaritomo me xa tak, Ixaw Yana komo kayaritomon me ha.

5 Yaake tak naxe omumuru kom hara Kporin komo nîmîtho owya. N̂examro poyino takî tî men̂ekekn̂e omumuru Saromaw Kporin komo yanan komo kayaritomon me, Ixaw Yana komo kayaritomon me ha.

6 On wara kekn̂e Kporin komo owya, Amumuru Saromaw xa n̂iir̂asî omîn. Noro wahsîyakn̂e omumuru me. Noro yîîm me wa was Ow ha.

7 Noro marha wiir̂asî kayaritomo me eroromero. Ero warai me wiir̂asî owya tpanatanmetopo yewehcataw roro, Ero wara men ehcoko, kachonho yewehcataw roro ha. Oroto n̂ewehcasî ero wara roro ewehcataw miya roro kayaritomo me wiir̂asî noro eroromerono me, kekn̂e owya Kporin komo.

8 Ero ke Ixaw Yana komo n̂enîrî me rma tan kîmtapowasî, Kporin komo yanan komo n̂enîrî me, ponaro kehtopo komo n̂entarî me marha tan kîmtapowasî awakro so. On wara wîîkes awya so, Aporin komo Kaan ya kpanatanmetopo men entatîkacoko on pono ro me awehtome so. Kîrwan on roowo. Awaipuche so awepamthîrî komo yeken me marha exi xe wasî miya roro. Ero wa ehtome kpanatanmetopo ewetîcoko.

9 Okopuci Saromaw, on wara wîîkes awya hara, ponaro aamo yehtopo poko men ehcamhokatîkakî. Anarî ponarora ro mak esko. Tahwore Noro ewetko. Kropotarî komo yentîkan̂e xa Mîk Kporin komo. Kesehtînotopo meero n̂encetîkesî. Noro yepor̂ataw awya n̂eseporpesî rma awya. Noro yai awetowyataw reha awya awahsîpînkesî men okwe eroromero.

10 On wara men kasko aropotaw, Tîmîn ciin̂e me omen̂ekekn̂e ham Kporin komo, cekenî ro ciin̂e me ha, kasko. Ero ke kar̂pe esko ciitome tak ha, kekn̂e tî. Ero wa tî kekn̂e Tapi tumumuru ya, esenmexapu komo ya marha.

11 Ero yinhîrî karita takî tî nîmyakn̂e Tapi tumumuru ya, Saromaw ya. Kaan mîn yamtakponî mko kuknon tî mîn nîmyakn̂e yîwya. Mîîmo potawno, mîîmo mkaino, puranta yamtakpon, eporino mko, mîîmo rakatawno mko, Amna pînîn yaw cma re masî, kacho yamtakpon marha, ero warai kuknon mîn nîmyakn̂e tumumuru ya.

12 Ahnoro ero yipu tî nîhtînoyakn̂e Kaan Yekatî yanme. Yîhroron kuknon, mîîmo mîtî pokono mko marha amtakpo mko, Kaan purantan yîmtotopo, ahce na Kaan ya tîmxapu yîmtotopo marha, ero mko kuknon tî nîmyakn̂e yîwya.

13 Tîmsom pokono komo yosotî mewrexapu marha tî nîmyakn̂e yîwya. Tîracoi so mewrexapu mîn nîmyakn̂e. Repita komo yosotî marha nîmyakn̂e yîwya. Ero pokono me cirko moxam Kporin komo mîn yenîrî pokono me, ero yawno yenîrî pokono me marha, kacho mîn nîmyakn̂e yîwya karita.

14 On wicakî ooru cirko ero me, kacho marha tî nîmyakn̂e yîwya. Ahce na me ciisom tî nukuknomekn̂e ahnoro, awsîn tî nukuknomekn̂e ooru ciisom kuknon. Ero wa xa marha tî nukuknomekn̂e prata ciisom kuknon hara, ahce na me ciisomu mko. Miyan kuknonî rma tî nîmyakn̂e yîwya mewrexapu ha.

15 Ramha yecepu me ciisom yawsîn tî nukuknomekn̂e ooru, ramha me ciisom yawsîn marha tî, ahnoro tî ero yipu nukuknomekn̂e. Prata marha tî nukuknomekn̂e ramha me ciisom hara, ramha yecepu me ciisom marha. Ero wicakî so ooru cirko ero me, ero wicakî so marha prata cirko ero me hara, kacho tî mewrekn̂e karita yaw mîn hak poko etpoyino pîn poko.

16 Ooru marha tî nukuknomekn̂e cuure warai yapon me ciisom, Kaan ya tîmxapu yapon me ciisom ha. Prata marha tî nukuknomekn̂e ahce na yapon me ciisom. Awsîn tî nukuknomekn̂e.

17 Ooru marha tî nukuknomekn̂e prata warai me ciisom, esmanî ro ooru. Kesemokacho me ciisom marha tî nukuknomekn̂e, tuuna yen me ciisom marha, weer̂a me ciisom marha. Paayu me ciisom marha tî nukuknomekn̂e. Prata marha tî nukuknomekn̂e paayu me ciisom.

18 Ooru marha tî nukuknomekn̂e kotoporem yakn̂itopo me ciisom, akir̂wamaxapu ooru ha, tarara warai me ciisom marha tî. Kerubin me ciisom marha nukuknomekn̂e. Taporarakawno me ciisom mîn xakn̂e kerubin, Kporin komo mtapotachonho yen yahrun̂e me, ero mko me ciisom tî nukuknomekn̂e.

19 On wara tî kekn̂e Tapi, Ahnoro ero warai nîhtînomexpekn̂e Kporin komo owya. Yîmtapotarî ow mewrekn̂e. Noro yamorî tî xakn̂e oyahsîn̂e wara. Etpoyino pîn nîhtînomexpekn̂e owya. Ero warai xa ciicoko, kekn̂e owya, kekn̂e tî.

20 On wara marha tî kekn̂e Tapi tumumuru ya Saromaw ya, Kar̂pe men esko, erasîra ro mak esko Kaan mîn ciitopo pona, ahwokara marha esko. Kporin komo Kaanî rma nasî awakroman̂e me, ponaro oyehtopo ha. Anomra ro mak wa nasî, apînînkara marha nasî. Miya roro awakronomesî onî mko ciitîkachome awya, Kporin komo mîn ciitîkachome ha.

21 Tîmsom pokono komo naxe Kporin komo mîn ciitopo ponaro, Repita komo marha. Tîracoi so naxe cemyawno ro pokono me, Kaan mîn yawno pokono me ha. Mer̂pora marha naxe yaana komo ahce na ciitopo poko. Tanmero so awakronoma xatî komo awakronomexe ahce na ciitopo poko. Ahnoro antomano rin̂e komo marha naxe amtapotarî yewetîn̂e me. Ahnoro kpoyino komo marha naxe anantomarî me, kekn̂e tî. Ero wa tî kekn̂e Tapi tumumuru ya Saromaw ya.